←  Luke (14/24)  →
1. Sabat ni tum khat chu Farisaihai laia mi challang pakhat inah bu fa dingin Isu a fe a, an lo enthlak nasa hle a.
2. Chun, ngai ta, a hmaa chun damnaw invung pakhat a um a.
3. Isun Dan hretuhai le Farisaihai chu a biek a, "Sabat nia sukdam a thieng am a thieng naw?" tiin a'n don tawl a.
4. Anni ruok chu an to zing a. Ama chun damnaw chu a chel a, a sukdam a, a'n fetir tah a.
5. Anni rawi chu a biek a, "Nangni lai in naupad amanih in bawngchal amanih Sabat niin tuikulah tla tah ang sien, in lak suok nghal naw ding maw?" a ta.
6. Chu khom chu an don thei naw bok a.
7. Bu faa an fielhai chun thungna tha tha an inchu pei ti a hmuin an kuomah tekhinthu a hril a.
8. "Tuin amanih inneina ruoi kil dinga a fiel che chun thungna tha taka thung inchu naw rawh, nangma neka mi lien lem lo fiel pal hlauh rawi a tih.
9. A fieltu chein, 'Hi pa thungna ding hi inkien rawh' a hung ti el chun hmai mawk takin thungna tha naw takah i'n son a ngai ding a ni si a.
10. Chuleiin, an fiel chang che khom thungna tha naw tak inchu lem la, chuongchun a fieltu che chu hung a ta, 'Ruolpa, thungna tha lemah hung inson raw khai' hung ti lem a ta, thlaithleng i kilpuihai mithmuah chawimawiin um i tih.
11. Inngaihlu taphot chu tlawm an ta, inngaitlawm taphot chawimawiin um an tih" a ta.
12. Ama fieltu kuoma khom chun Isun, "Sun amanih zan amania ruoi i the pha leh i ruol hai, i unau hai, i laibung hai le in venga hausa hai chu fiel naw rawh; i fiel chun fiel veng an ti che a, rul nawk hlauh an ti che.
13. Ruoi i the chun pasie hai, piengsuol hai, kebai hai, mitdel hai fiel lem rawh.
14. Anni chun rulna ding che an nei naw leiin malsawmin um i ta, mifelhai thonawkna nia chun rulin i um ding a ni si a" a ta.
15. A thlaithleng otpui laia mi pakhatin chu chu a hrietin, "Pathien rama ruoi kiltu ding chu a hamtha ie!" a ta.
16. Isu ruok chun, "Mi tuin amanih zanah ruoi ropui tak a buotsai a, mi tam tak a fiel a.
17. A fak huna chun a mi fielhai kuomah, 'Hung ta ro leh, tuhin iengkim inpei a ni tah' tia hril dingin a siehlaw a tir a.
18. Sienkhom, an renga inthuruol ang elin suonlam an lo siem seng a.
19. A hmasa tak chun, 'Lo ka'n chawk a, a ena fe a tul a, lunginsiet takin mi hung inphapek el rawh' a ta.
20. A dota mi chun, 'Bawngchal sor ding tuok nga ka'n chawk a, va sor sin dingin ka fe ding a na, lunginsiet takin mi hung inphapek el rawh' a ta. Mi dang chun, 'Nuhmei nei hlim ka na, chuleiin ka hung thei naw a nih' a ti bok a.
21. Siehlaw chu a kir a, chuong thu chu a pu a hril a. Inneitupa lung chu a sen hle a, a siehlaw kuoma chun, 'Suok nawk nghal la, kotthler le kawmkara hai fe la, pasie hai, piengsuol hai, mitdel hai le kebai hai chu hi taka hin hung thuoi tawl rawh' a ta.
22. Siehlaw chun, 'Pu, i thupek ang khan ka thaw a, sienkhom hmun ruok a la um ta rop' a ta.
23. A pu chun, 'Suok nawk la, lamliena hai, khawhnawma hai fe la, ka in sip ding mi hung thuoi khawm hram rawh.
24. Ka hril che hi, mi ka fielhai khan tu khomin ka ruoi kil ve naw ni hai' tiin" a ta.
25. Isu ruolin mipui tam tak an fe ve a, a hang ngha kir a, an kuomah,
26. "Ka kuoma hung taphot chun an pa hai, an nu hai, an nuhmei hai, an nau hai, an unau hai, an farnu hai, a nih, anni hringna chenin an theidae naw chun ka zirtir ni thei naw ni hai.
27. Mi zui nuom sia mani kraws put si lo chu ka zirtir ni thei bok naw nih.
28. "Nangni lai in sawngsang bawl tumtu chun thung meua a seng zat ding le a bawl zona khop sum a nei le nei naw hisap hmasa phot lo tu am um an ta?
29. A lungphum rem ta zet sia a bawl zo thei naw chun a hmu taphotin,
30. 'Hi pa hin in a rel uoia chu a bawl zo thei si naw a' tiin nuisan an tih.
31. Chun, lal tu khom lal dang do dinga inthok ding ni sien, sipai sing hni ama do dinga hung inthokhai chu sipai sing khat le chauh a lo bei ngam ding le ding naw thung meua ngaituo hmasa zet lo tu am um an ta?
32. A bei ngam naw ding a ni chun hla fea an um laiin inremna thu hril dingin palai tir a tih.
33. Chuong ang bokin nangni khom nei po po maksan vong nawtu chu ka zirtir ni thei naw nih.
34. " Machi hi a tha a, sienkhom machi hi da ta sien, iengin am suk-al nawk a ta?
35. Hnuoi thatna dingin a tlaktlai naw leiin an dehawn el hlak. Ngaithlakna dinga na nei chun ngaithla ngun raw se" a ta.
←  Luke (14/24)  →