←  Luke (13/24)  →
1. Chu lai chun, Galili rama mi, Pathien kuoma ran thisena an inthawi lai, an inthawina thisen leh inpol nuoia Pilatin a that tawl thu chu chu taka um mi thenkhat chun Isu an hung hril a.
2. Isun an kuomah, "Chuong Galili mihai chun chuong ang thil an tuor lei chun Galili mi dang po neka suol bik niin in ring am?
3. Suol bik lo e! Ka hril cheu hi, nangni khom in sim naw chun chuong ang bok chun bohmang in tih.
4. An leh, Siloama in insang chimin mi sawmpariet a del hlumhai khom kha Jerusalema chenghai po po neka suol bik dingin in ring a ni?
5. Suol bik lo e! Ka hril cheu hi, nangni khom in sim naw chun chuong ang bok chun bohmang veng in tih" a ta.
6. Chun, hi tekhinthu hi a hril a. "Mi pakhatin a grep huonah theichang kung khat a'n phuntir a, a ra a zong hlak a, pakhat khom a hmu ngai naw a.
7. Grep huon enkoltu kuoma chun, 'En ta, kum thum zet hi theichang hi a ra ka zong tah a, ka hmu ngai naw a. Phur el rawh. Hnuoi tha a fak hek mei mei an naw maw?' a ta.
8. Ama chun, 'Pu, tu kum bek hi chu la um sien, a bul vel hi cho ka ta, hnuoi thain la hang vur phot ka tih.
9. Kum nawk ra a'n suo leh a tha ning a ta, a'n suo naw ruok chun phur chauh lem rawh' tiin" a ta.
10. Sabat ni voi khat chu Sunagog pakhatah Isun a zirtir a.
11. Nuhmei pakhat, kum sawmpariet zet thlarau suolin a kei kon tah a um a. A ruongzang a sukmar thei naw leiin a kul zing hlak a.
12. Isun a hmu chun a ko a, "Nuhmei, i natna chun a'n thla ta che" a ta.
13. A chunga chun kut a'n nghat a, a hung ngir tlun ta nghal a, Pathien a'n pak a.
14. Isun Sabat nia mi a sukdam lei chun Sunagog hotu chu a lung a sen hle a, mipuihai kuoma chun, "Sin thawna ding ni ruk sung a um a, chu sung chun hung inla, insukdam ta unla, Sabat ni kher kher ni loin" tiin a vin thur thur tawl a.
15. Lalpa ruok chun an kuomah, "Nangni lemderhai, Sabat ni khomin mani bawngchal amanih sabengtung amanih chu sutin, a thlungna hmuna inthokin tui indawntir dingin in thuoi suok seng hlak an naw maw?"
16. Chuong a ni si chun hi nuhmei, Abraham naunu, kum sawmpariet zet Setanin a lo khuopna hi Sabat khom ni sien sutpek a ni naw ding am a ni?" a ta.
17. Chuong thu a hang hril chun a khingtuhai hmai chu a mawk hle a, mipui ruok chu a thilthaw ropui takhai lei chun an lawm hle thung a.
18. Chu zoa chun Isun, "Pathien ram chu ieng ang am a na? Ieng le am hrilkhing ka ta?
19. Antam mu khat mi pakhatin a lak a, a huonah a the a, a hung inthang a, thing a hung ni a, a zarah chungleng vatehai an riek hlak ang hi a nih" a ta.
20. Ama bok chun, "Pathien ram chu ieng le am hrilkhing ka ta?
21. Nuhmeiin chol a lak a, beia hmet ding beiphit fongc thum chie tho vong dinga a phul ang chu a nih" a ti nawk a.
22. Jerusalem pana an fe lai chun khaw lien le khaw tehai sirin Isun a zirtir malam pei a.
23. Mi pakhat hin, "Lalpa, sandama um chu mi tlawmte chauh an ni ding a ni?" tiin a'n don a.
24. Ama chun, "Kotkhar china chun lut tum hram ro; ka hril cheu hi, mi tam takin lut tum an ta, lut thei naw ni hai.
25. Inneitupa chu tho a, kot a kal ta hnung chun nangni tuola ngirin, 'Pu, kot mi hung hongpek rawh' tiin kik inla khom ama chun, 'Khaw lai mi am in nih ka hriet ngai naw cheu' tiin lo don a ti cheu.
26. Nangnin, 'I rawiin fain ei dawn hlak kha, kan kotthlera hai khom i zirtir hlak kha' la ting in ta,
27. ama ruok chun, 'Ka hril cheu hi, khaw lai mi am in nih ka hriet naw cheu; nangni thilsuol thawtu po pohai, ka kuoma inthokin fe hmang ro' la ting a ti cheu.
28. Abraham hai, Isak hai, Jakob hai le zawlneihai po po Pathien ramah an um ti hmu a, nangni ruok chu tuola hnot suok in nih ti in hriet suok pha chun tapin ha la rawt in tih.
29. Sak le thlang, sim le hmara inthokin mi hung an ta, an hmun ruot seng hluoin Pathien rama ruoi chu hung kil an tih.
30. Ngai ta u, a nuhnung takhai khom a hmasa tak ni ding an um a, a hmasa tak khom a nuhnung tak ni ding an um" a ta.
31. Chuong lai tak chun Farisai thenkhat Isu kuomah an hung a, "Hi taka inthok hin suok la, fe hmang rawh. Herodan sukhlum a tum che a nih" tiin an hung hril a.
32. Ama chun an kuomah, "Fe unla, chu sihal chu hieng ang hin va hril ro, 'Ngai rawh, voisun le zinga hin ramhuoihai hnot suokin damnawhai sukdam ka ta, ni thum niah zo ka tih' a tih tiin.
33. Ieng khom ni sien, voisun le zinga le a zing nawk chenin ka thaw pei ding a nih; indik tak chun, Jerusalem puo tieng zawlnei an thi ngai nawh.
34. Aw Jerusalem, Jerusalem, zawlneihai thattu, i kuoma an hung tirhai lunga lo deng hlumtu! Arpuiin a tehai a thla hnuoia a op khawm angin i nauhai voi ieng zat am op khawm ka tum tah hlak a ? Sienkhom i nuom si naw kha.
35. En ta, i in le ram chu rausanin a um tah hi! 'Lalpa hminga hung chu a hamtha' i ti hma khat chu mi hmu nawk ta naw ti nih ti ka hril che hi" a ta.
←  Luke (13/24)  →