Luke (12/24)  

1. Chuong lai chun mipui sang tam tak, kepha insir de nuk nuk khopa tam an hung pung khawm a. A zirtirhai kuoma chun thu a hril hmasa a, "Farisaihai chol, lemderna laka inthok chun fimkhur ro.
2. Puong lang lo dinga thup ieng khom a um naw a, hriet lo dinga ip hmang ieng khom a um bok nawh.
3. Zan thima in hril chu zing khaw varah la hrieng an ta, pindan sungrila in inbiek ruk khom in chung sipa inthokin tlanginsampui an tih.
4. "Ruolhai, ka hril cheu hi, taksa sukhluma chu hnunga ieng khom tawk poi thei ta lo chu ti naw ro.
5. Tu am in ti ding hril ka ti cheu: taksa a sukhlum hnung khoma hremhmuna pei theitu cheu chu ti ro; a nih, ka hril cheu hi, ama mol chu ti ro.
6. Chongzong panga poisax hniin an zor hlak an naw maw? Pathien ruok chun anni laia pakhat te khom hi a theinghil ngai nawh.
7. In sam zai chen khom a tiem vong annawm! Chuleiin ti naw ro, chongzong tam tak nekin in hlu lem si a.
8. "Ka hril cheu hi, mihai hmaa mi tantu taphot chu Pathien vantirkohai hmaah Mihriem Naupa hin tan veng a tih.
9. Sienkhom, mihai hmaa mi'n phattu chu Pathien vantirkohai hmaah inphat veng a tih.
10. Mihriem Naupa chu an soisel khomin an soiselna chu ngaidam ning a ta, Thlarau Thienghlim hrilsetu ruok chu ngaidam ni naw nih.
11. Chun, Sunagog hotuhai le roreltuhai le thuneituhai hmaa an thuoi pha cheu chun in thiemna thu ieng tin am in hril ding ti thuah lungkham naw ro;
12. in hril ding chu a hun takah Thlarau Thienghlimin a hril ding cheu a ni si a" a ta.
13. Mipui laia mi pakhat chun, "Zirtirtu, ka unaupa kuomah ka pa ro mi sem ve dingin mi hrilpek rawh" a ta.
14. Ama chun, "Mihriem, nangni unau kara roreltu le ro semtuah tuin am a mi ruot a?" a ta.
15. Chun, an kuoma bok chun, "Fimkhur unla, duamna tinreng laka inthok chun inveng tha ro; mihriem hringna hi neinungnaa innghat a ni nawh"y a ta.
16. An kuomah tekhinthu a hril a: "Mi hausa pakhat lo tharsuok chu a hung hlawk tah em em a.
17. Chuongchun, "Iengtin am thaw tang ka ta? Ka lohma suokhai ka bu inah a'n leng naw ding a ni si a' tiin a'n ngaituo a.
18. Ama bok chun, 'Hieng hin thawng ka tih. Ka bu in thiek ka ta, a lien lem bawl ka ta, chu taka chun ka bu le bal le ka thil neihai sek khawm ka ta.
19. Ka thlarau kuomah, 'Kum tam tak dai ding thil tha tam tak i khawl khawm tah hi. Tuhin chu chawl hadam la, fain dawn la, hlim takin chen ta rawh' ting ka tih' a ta.
20. Nisienlakhom Pathienin a kuomah, 'Mi invet! Voizan hin i hringna an lakpek ding che a nih. I ta dinga i thawsuokhai po po kha tuin am nei tang a ta?'a ta.
21. Mani ta dinga sum le pai inkhawl hnur a, Pathien tienga pasie si chu, chuong ang chu a nih"z a ta.
22. A zirtirhai kuomah, "Chuleiin ka hril cheu hi, in hringna ta dingin ieng am fain in bar ding, in taksa ta dingin ieng am silin in bil ding ti lungkham naw ro.
23. Fak ding nekin hringna a poimaw lem a, silfen nekin taksa a poimaw lem bok.
24. Vaakhai hi ngaituo ro, bu an tu naw a, an sik naw a, bupang an nei naw a, bu in an nei bok nawh; nisienlakhom Pathienin a chawm tawl si a. Nangni chu vatehai nekin in hlu lem dai si a!
25. Nangni lai lungkham leia mani hringna darkar khat suksei thei tu am in um?a
26. Chuong ang thil chauh hman thaw thei si loin ieng dinga thil dang lem chu in lungkham am a na?
27. "Lili par dam hi ngaituo ro, an inthang dan chenin. Sin an thaw naw a, pat an kher bok nawh. Nisienlakhom, ka hril cheu hi, Solomon meuh khom a ropui thei ang tawpa a'n thuom khan hieng lili par pakhat tluk khom hin chei a ni nawh.
28. Hlo hna, voisun hringa a zinga meia raw hmang nawk el ding hman chuong ang lawma Pathienin a chei chun, aw nangni ringna tlawmhai, chuonghai nek chun a va'n thuom nasa lem cheu awm de!
29. Nangni chu fak le dawn ding ngaituoin buoi rak rak naw unla, chuong thil chu lungkham bok naw ro.
30. Hieng hi khawvel mi po po buoipui tak a na, in Pain hieng thil hi in mamaw ve ti a hriet.
31. A ram chu zong lem ro, chuong thil po po khom chu a pek belsa ding cheu a nih.
32. Pawl tlawmhai, ti naw ro, a ram pek cheu hi in Pa lawmzawng tak a nih.
33. In neihai zor unla, pasiehai kuomah pe ro, rukru an lut thei nawna, hangthimin an fak siet thei nawna le tangka ip a phai thei nawna vana chun in ro ding khawl khawm ro.
34. In ro umna taphotah in lungril khom a um hlak si a.
35. "Rongbawl dinga inchei sa diemin, in khawnvarhai sita inpei zingin um ro.
36. Inneina ruoi kila fe an pu hung inlawiin kotkhar a hung kik phaa hongpek nghal dinga lo nghaktu siehlawhai ang hin um ro.
37. An pu hung inlawiin ama lo nghak zingtu siehlaw a hung hmuhai chu an hamtha ie. Thu dik tak ka hril cheu hi, ama chun rongbawl thuom inbel nghal a ta, anni chu dawkanah inthungtir a ta, bu thurpek a tih.
38. Zan ril amanih, khaw var tieng amanih a hung inlawi a, chuong ang siehlaw a hung hmu chu a hamtha.
39. Hi hi hre ro: inneituin rukru hung hun ding a hriet chun a in chu veng thang a ta, rok thei naw nih.
40. Nangni khom inpei sa zingin um ro, Mihriem Naupa chu in beisei naw hunah hung palh rawi a tih"a ta.
41. Peter chun, "Lalpa, hi tekhinthu hi keini chauh amanih i mi hril, an naw leh mi po po?" tiin a'n don a.
42. Lalpa chun "Sum enkoltu ringum le var tak, a puin ama siehlawhai inrawitu le a hun taka an chan ding bu sempektu dinga a ruot chu tu tak am ning a ta?
43. A pu a hung phaa chuong anga thaw siehlaw a hung hmu chu a hamtha.
44. Thu dik ka hril cheu hi, a nei po po chungah hotuah siem a tih.
45. Amiruokchu, chu siehlaw chun, 'Ka pu hung vak naw nih' ti lungril putin a siehlawhai chu vaw sien, faa dawnin inrui buoi sien,
46. a pu chu a'n ring naw niah, a hriet naw kar a hung chun, bong tam insuong a ta, mi ringum nawhai chan inchangtir a tih.
47. A pu ditzawng hre zing sia thaw lo le inpei loa um siehlaw chu na taka vuok ning a tih.
48. Amiruokchu, hriet naw leia hremna khop thil thawtu chu nep deua vuok ning a tih. Tam tak peka um taphot laka chun tam tak phut ning a ta, tam tak an inkoltir taphot laka chun tam nawk zuol phut an tih.
49. "Hnuoia hin mei insuo dinga hung ka nih, tu khom hin chok tah sien ka va ti de!
50. Nisienlakhom, baptisma chang ding ka la nei a, chu chu ka hlen hma chun ka ning a va hang inip ngei de!
51. Hnuoia hin remna inlengtir dinga hung in mi sawn maw? Teu lo e! Ka hril cheu hi, indo inlengtir dinga hung ka ni lem.
52. Tuta hnung chu sung khata mi panga khom inthe phok an ta, pathumhai chun pahnihai, pahnihai chun pathumhai chu do an tih.
53. Pain a naupa do a ta, naupain a pa; nuin a naunu do a ta, naunuin a nu; nuin a mo do a ta, moin a tarpi" a ta.
54. Mipuihai kuoma khom chun, "Tlak tienga inthoka sum hung suok in hmu changin, 'Ruo a sur ding a nih' in ti nghal a, a sur ngei bok hlak.
55. Sim thli a hung hrang hlakin, 'Khuo a lum ding a nih' in ti a, a lum ngei bok hlak.
56. Nangni lemderhai, hnuoi le van enin khawmuol um dan ding in hril thei si chun ieng dinga tu lai hun um dan hi in hriet fie thiem naw?
57. "Ieng dinga thil indik chu nangni khomin in man thiem el naw?
58. I khingpui leh roreltu hmaa inhek dinga in fe laiin ama chu lampuiah inrempui dan zong hram hram rawh, chuong naw chun roreltu hmaah kei lut a ti che a, roreltu chun pulis kutah inhlan a ti che a, pulis chun lung inah khum hlauh rawi a ti che.
59. Ka hril cheu hi, poisab hlek khom in tlak zo hmakhat chu, chu taka inthok chun suok naw top in tih" a ta.

  Luke (12/24)