←  Luke (11/24)  →
1. Tum khat chu hmun pakhatah Isu a tongtai a. A tongtai zo chun a zirtirhai laia pakhat chun, "Lalpa, Johanin tongtai dan a zirtirhai a'n chuktir ang bokin mi'n chuktir ve rawh" a ta.
2. Ama chun, "In tongtaiin hieng hin ti hlak ro:Pa,I hming inzaum sien,I ram hung tlung raw se;
3. Ni tin kan fak khop bu mi pe la,
4. Kan chunga thil suol thawtuhai,Kan ngaidam hlak ang bokin,Kan suolnahai mi ngaidam la,Thlemnaah mi thuoi lut naw rawh"wtiin.
5. Isun an kuomah, "Nangni lai tuin amani ruol nei sien, zan rilah a inah fein, 'Ruolpa, bei phek pathum mi'n puktir rawh,
6. ka ruolpa inzinin a mi hung sir a, hang pek ding ieng khom ka nei der nawh' va ti sien,
7. in sunga mi chun, 'Mi hung sukbuoi naw rawh, tuhin chu kot khom kan kal vong tah a, ka nauhai leh khumah kan zal tah a, thoin ka hung pek thei naw che' tisan sien khom,
8. ka hril cheu hi, a ruolpa a ni leiin thoin va pe el naw sien khom, a hni tlut tlut leiin tho a ta, a mamaw zat zat peng a tih.
9. "Chuongchun, ka hril cheu hi, hni ro, peng an ti cheu; zong ro, hmung in tih; kik ro, hongpek an ti cheu.
10. Tu khom a hni phot chun a dong a; tu khom a zong chun a hmu a; tu khom a kik chu hongpek ning a tih.
11. Nangni pahai lai tu khom a naupan bei hni sien, tuin am lung peng a ta? Nga hni sien, tuin am rul a pek ding?
12. Artui hni sien, tuin am ainuvet a pek ding?
13. Nangni mi suolhai hmanin in nauhai thil tha pek nachang in hriet si chun in Pa vana mi chun a hnituhai chu tam nawk zuolin Thlarau Thienghlim a va pek awm ngei cheu de!" a ta.
14. Ramhuoi man, tong thei lo mi pakhat sunga inthokin Isun ramhuoi chu a hnot suok a, a hung suok hnung chun a hung tong suok el tah a, mipui chun mak an ti hle a.
15. Sienkhom, anni laia thenkhat chun, "Ramhuoi lal Belzebub lei annawm ramhuoi a hnot suok hi" an ta.
16. Mi thenkhat ruok chun ama fiena dingin vana inthoka inchikna thilmak inentir dingin an phut a.
17. Isun an ngaituohai a lo hriet a, an kuomah, "Khaw lai ram khom mani le mani indo taphot chu an ram hlak; insung khom mani le mani indo chu an tlu hlak.
18. Setan khom ama le ama indo sien, iengtin am ram inngir a ta? Nangnin Belzebub leia ramhuoihai hnot suok dama in mi hril leiin hi thu hi ka hril a nih.
19. Kei hi Belzebub leia ramhuoihai hnot suok hlak ka ni chun, in mihaiin tu leiin am ramhuoi an hnot suok hlak a? Chuongchun, anni kha annawm in chungthu reltu dinghai chu.
20. Amiruokchu, Pathien kut leia ramhuoi hnot suok ka ni si chun in kuomah Pathien ram chu a hung tlung tah tina a nih.
21. "Mi hrat chun hriemhrei famkim leh in a veng chun, a thil neihai chu a him hlak.
22. Nisienlakhom, a neka hrat lemin a hung bei a, a hne chun a ringsan tak ralthuom chu lakpek a ta, a rallakhai chu a nuom nuomin sem dar a tih.
23. Keima tienga thang naw taphot chu mi dotu a na, mi lakhawmpuitu naw chun a sukdar a nih", a ta.
24. Thlarau tirdakum a hnot suok chu mi sunga inthoka a hung suok chun chawlna hmun zongin thlalerah a'n vak a'n vak a, sienkhom umna ding hmun a hmu naw leiin 'Ka in suoksana khan kir nawk el ka tih' a ta.
25. Chun, a va tlung chun phit faia chei diemin a hmu a.
26. Chuongchun, a fe a, a neka suol lem ngot thlarau pasari a va thuoi a, an hung lut a, chu taka chun umhmun an khuor tah a. Chu mipa ngirhmun chu a hmaa nekin a hung se lem dai tah a nih" a ta.
27. Chuong thu chu Isun a hril lai mipui laia nuhmei pakhat chu a khek suok a, "A hringtu che chu a hamtha, i nene nek ngei khom" a ta.
28. Isu ruok chun, "Pathien thu hrea zawmtuhai hi an hamtha lem" a ta.
29. Mipui hung pung khawmhai kuoma chun Isun, "Tu lai ruoltharhai hi mi rilo tak an nih; inchikna thilmak an phut a, Jona inchikna chauh naw chu inchikna thilmak hrim inentir ni naw ni hai;
30. Jona chu Ninevi khaw mihai ta dinga inchikna a ni ang khan, Mihriem Naupa hi tu lai ruoltharhai ta dinga inchikna ning a tih.
31. "Sim tieng lalnu kha Rorelna nia chun tu lai ruoltharhai ruol hin ngir veng a ta, thiem naw inchangtir a tih; Solomon varna ngaithla dingin kawlkawdonga inthokin a hung si a; ngai ta u, Solomon neka ropui lem chu hi taka hin a um.
32. Ninevi mihai chu Rorelna nia chun tu lai ruoltharhai leh hin ngir tlang an ta, thiem naw inchangtir an tih, Jona thu hril leiin an sim si a. Ngai ta u, hi taka hin Jona neka ropui lem chu a um.
33. "Tu khomin khawnvar sitin kilkhawrah an sie ngai naw a, leikhawrin an khup khum ngai bok nawh, a hung luthaiin a var an hmu thei dingin a sienaah an sie lem hlak.
34. I mit hi i taksa ta dinga khawnvar a nih. I mit a tha chun i taksa pumin var a ta, a tha naw ruok chun i pumin inthim a tih.
35. Chuleiin, fimkhur rawh, nangmaa var um chu thim lo ni pal hlauh rawi a tih.
36. I taksa pum a'n thimna lai um loa a var suok vong chun, khawnvar varin a sun var ang chein i pumin var suok i tih" a ta.
37. Thu a hril zo chun Farisai pakhatin bu fa dingin a hung fiel a, ama chu a zui lut a, dawkana thlaithleng chu a ot nghal a.
38. Kut sawp loa thlaithleng a ot hmutu Farisai chun mak a ti hle a.
39. Lalpa chun an kuomah, "Nangni Farisaihai hin no le thleng puo tieng in sawp fai takluo a, in sung tieng ruok chu duamna le ritlonain a sip si a.
40. Mi intlawhai, a puo tieng siemtu chun a sung tieng khom a siem nawm a nih?
41. No le thleng sunga um chu mi retheihai pe unla, in ta dingin iengkim fai el a tih.
42. "Nangni Farisaihai, in chung a rik ie! Pudina dam, lengmaser dam le huona thlai hna tinreng dam sawmapakhat in pek hlak a, sienkhom indikna le Pathien hmangaina tieng ruok chu in ngaitha si a; chu chu annawm in nuna in hmang hlak lem ding chu, a danghai khom ngaitha chuong loin.
43. Nangni Farisaihai, in chung a rik ie! Sunagogah thungna hmatawng le dawr hmuna hai mi chibai buk in ngaina hlak si a.
44. In chung a rik ie! Thlan hmun inchik lo, hre loa mi'n an hraw hlak ang chu in nih" a ta.
45. Dan zirtirtu pakhat chun, "Zirtirtu, hieng thu i hril hin keini khom i mi khak sa ve a nih" tiin a suosal a.
46. Isun a don a, "Dan zirtirtuhai, nangni khom in chung a pik ie! Phurrik tak tak mi liengkoah in innghat a, nangni hlak chun phur chu in kut hmawr khomin in tawk nuom si nawh.
47. In chung a rik ie! In thlatuhai that zawlneihai thlan in dam in bawl a;
48. in thlatuhai thilthaw chu in hrietpui a, in remtipui tina a nih; annin a that an tum a, nangnin an thlan in bawl in bitum thung a.
49. Chu lei chu annawm Pathien varnain, "An kuomah zawlnei le tirkohai tir ka ta, a then that an ta, a then sukbohmang an tih" tia a lo hril reng kha.
50. Chuongchun, leilung insieng tira inthoka zawlnei that ta po po hai thisen maw chu tu lai ruoltharhai hin phur an tih;
51. a nih, ka hril cheu hi, Abel an thata inthoka maicham le Hmun Thienghlim inkara Zakari an that chena thisen phuba chu tu lai ruoltharhai chunga hin lak ning a tih.
52. "Nangni Dan zirtirtuhai, in chung a rik ie, Varna chabi chu in chawi hmang dai a, nangni lut nuom si loin mi dang lut ding hlak in dang bok si" a ta.
53. Chu ina inthoka Isu a suok hnung chun Farisaihai le Dan zirtirtuhai chun nasa takin an tai tan a, thu tam tak an indon sek a;
54. a tong suol palh man tumin an inchan ta ran a.
←  Luke (11/24)  →