←  Luke (10/24)  →

---

1.

Chu zo chun Lalpan mi dang sawmsariv a ruot a, a fena ding khuo le hmun taphotah hma lo lawk dingin a kop peiin a'n fetir a.

2.

An kuomah, "Bu sik ding tam tak a um, sienkhom sinthawtu an tlawm si. Chuleiin, a bu siktu ding mi tir dingin lo neitu Lalpa hni ro.

3.

"Fe suok unla, satene ruol laia beram khal lut ang elin ka tir suok cheu hi.

4.

Tangka ip dam, mansa dam, pheikhok dam chawi naw ro, lampuiah tu khom chibai buk bok naw ro.

5.

Chun, in lutna taphotah a hmasa takin, "Hi ina hin thlamuongna tlung raw se" ti pei ro.

6.

Chu ina chun thlamuongna ngaina mi an lo um chun in thlamuongna thu chu an chungah um sien, an um naw ruok chun in kuomah hung kir nawk a tih.

7.

In tlungna ngaiah tlung zing unla, an pek taphot cheu chu fain dawn ro; sinthawtu chu hlaw hmu tlak a ni si a. In dang dangah tlung lawr naw ro.

8.

"Chun, khuo in lutna taphotah an lo lawm cheu chun, an pek ang ang cheu chu fa unla,

9.

damnaw umhai chu sukdam unla, 'Pathien ram chu in kuomah a hung tlung tah' ti pei ro.

10.

In lutna khuohaiin an lo lawm naw cheu chun an khawlaiah fe unla,

11.

"In khaw pilvut kan kea kai khom kan kephaa inthokin nangni chungah kan thin fai; Pathien ram in kuomah a hung tlung tah ti ruok chu lo hre ro' in ti ding a nih.

12.

Ka hril cheu hi, Rorelna Nia chun chu khaw tuor ding nek chun Sodom khaw tuor chu zie-um lem dai a tih.

13.

"Nang Korazin, i chung a pik. Nang Bethsaida, i chung a pik. Nangni laia ka thilmak thaw kha Tura le Sidona thaw chu ni sien, saiip sila pilvut lai inbuolin an simzie suklang dai tang an tih.

14.

Rorelnaa chun in tuor ding nekin Tura le Sidon tuor ding chu zie-um lem dai a tih.

15.

Kapernaum, nang khom, van chena chawi sang i ni ding am a nih? Mithi khuo chena nam thlak i ni lem ding a ni si a.

16.

"In thu awituhai chun ka thu khom awi an ta, a hnawltu chun kei khom an mi hnawl a nih; chun, kei mi hnawltu chun a mi tirtu khom a hnawl a nih" a ta.

17.

Sawmsarihai chu hlim takin an hung kir a, "Lalpa, ramhuoihai khom i hming leiin kan thu thuin an um" an ta.

18.

Ama chun, "Tek anga vana inthoka Setan tlak kha ka hmu hrim a nih.

19.

Ngai ta u, rul hai, ainuvet hai, hmelmapa hratna po po hai sirde theina thu ka pek cheu hi, ieng khomin sukna naw top a ti cheu.

20.

Nisienlakhom, ramhuoihai in thu thua an um leiin lawm naw ro, vana in hming ziek a ni leiin lawm lem ro" a ta.

21.

Chuong lai tak chun Isu chu Thlarau Thienghlimah a lawm ta em em a, "Aw Pa, hnuoi le van Lalpa, nangin mi varhai le mi thiemhai lakah hieng thu hi i thup tlat a, mi mawlhai kuomah i puong leiin ka'n pak che; a nih, Pa, chuong ang chu tha i ti zawng tak a nih.

22.

Ka Pain iengkim a mi'n koltir tah; Pa chauh naw chun tu khomin Naupa hi tu am a nih ti an hriet nawh; Pa khom chu tu am a nih ti Naupa le a kuoma Naupain a puong nuomnahai chauh naw chun tu khomin an hriet bok nawh" a ta.

23.

Chun, a fala an um laiin a zirtirhai kuomah, "In thil hmu ang hmu ve chu a hamtha.

24.

Ka hril cheu hi, zawlnei le lal tam tak khomin in thil hmuhai hi hmu ve an lo nuom hlak a, an hmu si nawh; in ngaithlakhai hi ngaithlak ve an nuom a, sienkhom an ngaithlak si nawh" a ta.

25.

Chun, tum khat chu Dan zirtirtuhai laia pakhat a ngir a, Isu fiena dingin "Zirtirtu, chatuon hringna nei dingin iem thawng ka ta?" tiin a'n don a.

26.

Ama chun, "Dan buah iem a'n ziek a? Iem in inkawktir hlak a?" a ta.

27.

Ama chun, "Lalpa i Pathien chu i lungril po poin, i thlarau po poin, i hratna po poin, i ngaituona po poin i hmangai ding a nih; nangma i'n hmangai angin i venghai khom i hmangai ding a nih" a ta.

28.

Isu chun, "I don indik, chuong ang chun thaw la, hring i tih" a ta.

29.

Ama chun ama le ama thiem inchangtir nuomin Isu kuomah, "An leh ka venghai chu tuhai am an na?" a ta.

30.

Isun a don a, "Mi pakhat, Jerusalema inthoka Jeriko pana fe thla chu lampuiah suomhmang ruolin an lo suom a, a silfenhai an hlippek a, an vuok hrep a, thidangin an maksan a.

31.

Chu lampui chu thiempu pakhat hin a hraw hlauh a, ama a hang hmu chun a hel el tah a.

32.

Chuong ang bokin Levi chia mi pakhat khomin chu hmun chu a hraw a, ama a hmu chun a hel ve el tah a.

33.

Samari mi pakhat inzinin a umna chu a hung tlung a, a hang hmu chun a lunginsiet em em a,

34.

a va pan a, a hliemnahai chu hriek le uoiin nalin a tuompek a; ama sabengtunga chun an chuongtir a, khuolbukah a fepui a, a enkol a.

35.

A zingah a maksan tawm chun duli pahni a phor a, khuolbuk enkoltu chu a pek a, "Lo enkol la, hi bak i seng po po chu ka hung kir nawk pha rul ka ti che" a ta.

36.

"Aw leh, chuong mi pathumhai lai chun a tu tak am suomhmang tuoktu venghai ni dingin i ring a?" a ta.

37.

Ama chun, "A lunginsiettu chu" a ta. Isun, "Nang khom chuong ang chun va thaw ve rawh" a ta.

38.

Isu le a zirtirhai chu lampuia khaw pakhatah an lut a, nuhmei pakhat Martha an ti chun a lo intlungtir a.

39.

Ama chun zuorpui pakhat a hming Mari a nei a, ama chu Lalpa ke bulah thungin a thu a ngaithlak a.

40.

Martha ruok chu fak rong bawlin a buoi hle a. Isu kuomah a hung a, "Lalpa, ka zuorpuinuin kei chauh rong bawl dinga a mi dande el hi tha i ti bik am a nih? Mi hung thangpui dingin hril ta la" a ta.

41.

Lalpa chun a don a, "Martha, Martha, ngaituo i hau a, i buoi hle reng a nih; sienkhom thil tul pakhat chauh a um.

42.

Mari chun chan tha a thlang a, chu chu lakpek ding a ni nawh" a ta.

---

←  Luke (10/24)  →