Leviticus (9/27)  

1. A ni riet ni chun Mosien Aron le a naupahai le Israel upahai chu a ko khawm a.
2. Aron kuoma chun, "Suol thawina thilhlana dingin bawngchal tuoi le pumraw inthawina thilhlana dingin beramchal, hmel hem lo ve ve chu LALPA hmaah hung inhlan rawh.
3. Chun, Israelhai kuomah hieng hin hril rawh: 'Suol thawina thilhlana dingin kelchal, pumraw inthawina thilhlana dingin bawngte le beramte hmel hem lo, kum khata upa ve ve dam,
4. inremna inthawina thilhlana dingin bawngchal le beramchal hai chu hriek le chokpol bu le bal inthawina thilhlanhai le chun LALPA hmaa inhlan dingin hung la ro. Voisun hin in kuomah LALPA a hung inlang ding a nih' tiin hril rawh" a ta.
5. Mosien thaw dinga thu a pek thilhai chu Intuokna Puon in hmaa chun an hung chawi a, pungkhawm po po chun an va hnai a, LALPA hmaa chun an ngir a.
6. Mosie chun an kuomah, "LALPA ropuina chu nangni lai a hung inlang theina dingin hi hi a nih LALPAN thaw dinga thu a pek cheu kha" a ta.
7. Mosie chun Aron kuomah, "Maicham hung hnai la, LALPA thupek angin i suol thawina thilhlan le pumraw inthawina thilhlan chu inhlan la, nang le mipui ta dingin inremna siem la; chun, mipuihai thilhlan chu inhlan la, an ta dingin inremna siem rawh" a ta.
8. Aron chun maicham a va hnai a, ama puola suol thawina bawngchal tuoi chu a that a.
9. Ran thisen chu a naupahaiin an hung pek a, thisena chun a kutpar hmor a phum a, maicham kia hai chun a tat a, thisen chu maicham bula chun a bun thlak a;
10. LALPAN Mosie thu a pek ang khan, suol thawina thau hai, a kal hai, a thin tuomtu duorda hai chu maichama chun a raw a.
11. A sa le a vun ruok chu khawhnawmah a raw a.
12. Chu zoah pumraw thilhlan chu a that a. A nauhai chun ran thisen chu an hung pek a, maicham sir vel tinah a the a.
13. Pumraw thilhlan chu a tlang tlangin an hung pek a, a lu le chun maichamah a raw a.
14. A kawsung le a kehai chu tuiin a sawp a, maichama pumraw thilhlan chunga chun a buk a.
15. Chun, Aron chun mipuihai thilhlan ding chu a hung kei a. Mipuihai suol thawina kel chu a that a, a hmaa mi ang bok khan, suol thawina dingin a'n hlan a.
16. Pumraw thilhlan chu a hung chawi a, a dan ang takin a'n hlan a.
17. Bu le bal thilhlan khom chu a hung chawi a, vei khat a lak a, zing tienga pumraw thilhlan baka chun, a raw a.
18. Chun, mipui puola inremna inthawina thilhlan bawngchal le beramchal chu a that bok a, Aron naupahai chun a thisen chu an hung pek a, maicham chu a velin a the a.
19. Bawngchal thau le beramchal thau hai, a mei bul thau tak hai, a ril thau hai, a kal hai, a thin tuomtu duorda hai chu an hung pek bok a,
20. a thauhai chu a ir chunga chun a sie a, Aron chun maichamah a raw a.
21. Mosien thu a pek angin, a ir le a chang tieng mal chu then thilhlana dingin Aron chun LALPA hmaah a then a.
22. Chu zoah Aron chun mipui tieng ban a phar a, mal a sawm tawl a. Suol thawina, pumraw inthawina le inremna inthawina thilhlanhai a'n hlan zo chun a hung tum a.
23. Mosie le Aron chu Intuokna Puon ina chun an lut a, an hung suok nawk chun mipuihai chu mal an sawm a, LALPA ropuina chu mipuihai hmaa chun a hung inlang a.
24. Chun, LALPA hmaa inthok chun mei a hung suok a, mei chun pumraw thilhlanhai le thauhai chu maichama chun a kang hmang ta vong a. Chuong thil po po mipuiin an hmu chun lawmin an khek a, an bokkhup a.

  Leviticus (9/27)