←  Leviticus (5/27)  →
1. " 'Tu khom a thil hriet amani le a hmu amani chu rorelna hmaa puong dinga ti a ni hnung khoma a hril nuom naw leia thil suol a thaw chun, a suol maw chu phur a tih.
2. " 'Tu khomin thil thieng lo hrim hrim, sa thieng lo ram sa amanih ran sa thi ruong amanih, hnuoi chunga invak chi sa thieng lo amanih a tawk palh chun, a hriet naw leia a tawk khom ni sien, a hung inthieng ta naw a, thiem naw a chang a nih.
3. " 'Tu khomin mi sukporche thei mihriema inthoka suok inthieng nawna lai a tawk chun, a hriet naw leia a tawk khom ni sien, tawk a thieng nawh ti a hriet chara inthokin hung inthieng ta naw nghal a tih.
4. " 'Tu khomin thil tha amanih thil tha lo amanih thaw dinga inngaituo chieng loa thu a'n kham zung zung chun, chu chu thu intiemkamnaa fimkhur lo taka a hril amanih, an naw leh a umzie a hriet naw leia a thaw a ni khomin, a hung hriet suok ni chun thiem naw chang a tih.
5. " 'Hieng thila hai hin mi tu khomin thiem naw a chang chun, thil suol a thaw dan inpuong sien la,
6. a suol thaw manah ran ruol laia mi beram amanih kel la tuoi amanih LALPA kuoma suol thawina thilhlan hung chawi sien la, thiempuin inremna inthawi lo thawpek a ta, ngaidamin um a tih.
7. " 'Beram tuoi a chawi thei naw chun vathu pahni amani parva pahni amanih a suol man dingin LALPA kuomah hung chawi sien la, pakhat chu suol thawina thilhlan ning a ta, a dang chu pumraw inthawina thilhlan ning a tih.
8. Thiempu kuomah hung chawi sien la, suol thawina thilhlan chu lo thaw hmasang a tih. Parva chu a ringah her tliek a ta, sienkhom her bong loin,
9. a thisen iemani zat chu suol thawina thilhlana dingin maicham sir velah theng a ta, a thisen dang po chu maicham bula chun infar kangtir a tih. Hi hi suol thawina thilhlan chu a nih.
10. Thiempuin parva dang chu a dan ang takin pumraw thilhlanah hmangin, a thil suol thaw lakah inremna inthawi lo thawpek a ta, ngaidamin um a tih.
11. " 'Amiruokchu, vathu pahni amanih parva pahni amanih chu a neiin a tlin hlol naw a ni chun a suol man dinga thilhlanah suol thawina dingin beiphit indip tak, efa hmun sawma thea hmun khat hung chawi raw se. Suol thawina thilhlan a ni leiin hriek amanih beraw amanih a thang sa ding a ni nawh.
12. Thiempu kuomah hung chawi a ta, ama chun hriet zingna dingin vei khat lang a ta, LALPA ta dinga meia thilhlanah maicham chunga chun a raw ding a nih; chu chu suol thawina a ni si a.
13. Chuong ang chun thiempuin a thil suol thaw laka inremna inthawina chu lo thawpek a ta, ngaidamin um a tih. A dang la um po chu, bu le bal thilhlan angin, thiempu chanpuol ding a nih' ti rawh" a ta.
14. Chun, LALPAN Mosie chu a biek a,
15. "Mi tu khomin tum lei ni loa thil a bawsiet a, LALPA dan thienghlim lakah a lo suol palh chun, a suol manah beram ruol laia mi beram chal, hmel hem lo chu LALPA hmaah hung kei a ta, a bawsiet inkhumna ding hu tawk, hmun thienghlima an shekel hmang ang tangkaruo iemani zat a hung chawi bok ding a nih. Hi hi bawsiet inthawina thilhlan a nih.
16. Thil thienghlim chunga a lo sukdik naw hai chu rul a ta, hmun ngaa thea hmun khat pe belsang a ta, chu chu thiempu kuomah inhlan a ta, thiempu chun bawsiet inthawina beram chal chu inhlanin inremna siempek a ta, ngaidamin um a tih.
17. " 'Tu khomin thil suol a thaw a, LALPA thupekin thaw lo dinga a khap chu a lo bawsiet chun, a hriet naw leia a thaw khom ni sien, thiem naw chang hrim hrim a ta, a suol maw chu phur a tih.
18. Bawsiet inthawina thilhlana dingin beram ruol laia mi beram chal, hmel hem lo chu thiempu kuomah hung kei a ta, a bawsiet man tlakna ding hu zat sum hung chawi bok a tih. Chuong ang chun thiempuin inremna inthawi inhlanpek a ta, tum reng lei ni loa a thaw suol palhai chu ngaidam ning a tih.
19. Hi hi LALPA thu a bawsietna leia thiem naw a changna laka bawsiet inthawina thilhlan chu a nih" tiin.
←  Leviticus (5/27)  →