←  Leviticus (4/27)  →
1. LALPA chun Mosie a biek a:
2. "Israelhai kuomah hieng hin hril rawh: 'Tu khomin tum reng lei ni loa thil suol a thaw a, LALPA thupekin thaw lo dinga a khap chu a lo bawsiet palh amanih,
3. hriek nal tah thiempuin mipui chunga thiem naw intlungtir thei thil suol a lo thaw amanih a ni chun, bawngchal tuoi hmel hem lo chu LALPA kuomah a suol thawina dingin hung inhlan raw se.
4. Intuokna Puon in kotah bawngchal chu LALPA hmaah hung kei a ta, bawng lu chunga chun kut innghat a ta, LALPA hmaah bawng chu a that ding a nih.
5. Hriek nal thiempu chun bawng thisen iemani zat chu lang a ta, Intuokna Puon ina chun hung chawi a ta,
6. a kutpar hmor chu thisenah zuk phum a ta, thisen chu hmun thienghlim puonzar bula chun LALPA hmaah voi sari a the ding a nih.
7. Chu zoah thiempu chun LALPA hmaah Intuokna Puon ina rimtui rawna maicham kia hai chun thisen chu tlawmte tat a ta, bawng thisen dang po chu Intuokna Puon in kota pumraw inthawina maicham bula chun a bun thlak vong ding a nih.
8. Suol thawinaa inhlan bawngchal thau po po chu lang a ta, a kawsung thau le a ril bawmtu thau po po,
9. a kalhai le a diemnem laia thau po po, a thin tuomtu duorda leh a kal pumin lang a ta,
10. inremna inthawinaa bawng thau a lak suok ang bokin thawng a ta, thiempu chun pumraw inthawina maichama chun chuonghai chu rawng a tih.
11. Amiruokchu, bawng vun le a taksa po po, a lu le a kehai, a phingpui le a ek hai chu
12. khawhnawm hmun fai, vut an peina hmuna chun chawi a ta, vut chunga meipuia chun raw hmang a tih.
13. " 'Israelhaiin an tum lei reng khom ni loa an hnam puma thil suol thaw a, LALPA thupekin thaw lo dinga a khap chu an lo bawsiet palh chun, an thil suol thaw chu an hnam inpuiin an hrietpui naw khom ni sien, thiem naw an chang a nih.
14. Chu an thil suol thaw chu an hriet pha leh an inpui chun suol thawina dingin Intuokna Puon in hmaa chun bawngchal tuoi an hung kei ding a nih.
15. LALPA hmaah Israel upahai chun bawngchal luah kut innghat an ta, bawngchal chu LALPA hmaah an that ding a nih.
16. Hriek nal thiempu chun bawng thisen iemani zat chu Intuokna Puon inah chawi lut a ta,
17. a kutpar hmor chu thisena chun zuk phum a ta, thisen chu hmun thienghlima puonzar bula chun LALPA hmaah voi sari a the ding a nih.
18. Chu zoah thiempu chun Intuokna Puon ina rimtui rawna maicham kihaia chun thisen chu LALPA hmaah tat a ta, bawng thisen dang po chu Intuokna Puon in kota pumraw inthawina maicham bula chun a bun thlak vong ding a nih.
19. A thau po po chu la suok a ta, maichama chun rawng a ta,
20. suol thawinaa bawngchal inhlan a thaw ang charin a dang khom thaw veng a tih. Chuong anga thiempuin an suol thawina thilhlan a'n hlanpek hnung chun, ngaidam hung ni tang an tih.
21. Chu zoah bawngchal ruong chu khawhnawmah chawi a ta, bawngchal hmasa a raw angin rawng a tih. Hi hi khawtlang ta dinga suol thawina chu a nih.
22. " 'Roreltuin tum reng lei ni loa suol a thaw palh a, LALPA a Pathien thupekin thaw lo dinga a khap thil chu a lo bawsiet chun, thiem naw a chang a nih.
23. A thil suol thaw chu inhriettir a ni charin kelchal hmel hem lo chu thilhlanah a hung kei ding a nih.
24. Kel lua chun kut innghat a ta, LALPA hmaa pumraw thilhlan an thatna hmuna chun a that ding a nih. Chu chu suol thawina thilhlan a nih.
25. Thiempu chun a kutpar hmor chu kel thisenah zuk phum a ta, thisen chu pumraw inthawina maicham kia hai chun tat a ta, a dang po chu pumraw inthawina maicham bula chun bun thla vong a tih.
26. Inremna inthawina thilhlana a thauhai a raw ang khan thiempu chun a thau po po chu rawng a tih. Chuong anga thiempuin a suol thawina a'n hlanpek hnung chun a suol chu ngaidam hung ni tang a tih.
27. " 'Vantlang laia mi tu khomin tum reng lei ni loa thil suol a thaw palh a, LALPA thupekin thaw lo dinga a khap chu a lo bawsiet chun, thiem naw a chang a nih.
28. A thil suol thaw chu inhriettir a ni charin a suol thawina dinga inhlan dingin kel la tuoi hmel hem lo a hung kei ding a nih.
29. Suol thawinaa thilhlan lu chunga chun kut innghat a ta, pumraw inthawina hmuna chun a that ding a nih.
30. Chu zoah thiempun kel thisena chun a kutpar hmor zuk phum a ta, maicham kia hai chun tat a ta, a dang po chu maicham bula chun bun thlang a tih.
31. A thau po chu inremna inthawinaa an thaw angin at thlang a ta, maichama chun LALPA ta dinga rim inhnik dingin rawng a tih. Chuong anga thiempuin a suol thawina ding a'n hlanpek hnung chun ama chu ngaidam ning a tih.
32. " 'A suol inthawina thilhlana beramte a hung chawi a ni chun a la tuoi hmel hem lo a ni ding a nih.
33. Beramte lu chunga chun kut innghat a ta, pumraw thilhlanhai an thatna hmuna chun suol thawina dingin that a tih.
34. Chu zoah thiempu chun a kutpar hmor chu ran thisena chun phum a ta, pumraw inthawina maicham kia hai chun thisen chu tat a ta, a dang po chu maicham bula chun bun thlang a tih.
35. Inremna thilhlana beramte thau an lak ang bokin a thau chu thiempuin lang a ta, LALPA kuoma meia thilhlanah maicham chunga chun rawng a tih. Chuonga thiempuin inremna inthawi a'n hlanpek hnung chun ama chu ngaidam ning a tih.
←  Leviticus (4/27)  →