←  Leviticus (27/27)    
1. LALPA chun Mosie kuomah,
2. "Israelhai be la, hieng thu hi hril rawh: Tu khomin LALPA ta dinga mi pe dinga abika intiemkamna nei a, a man hu ding a pek chun,
3. pasal kum sawmhni le sawmruk inkar mi man chu hmun thienghlima shekel an hmang anga hisapin tangkaruo shekel sawmnga ning a ta,
4. nuhmei a ni chun shekel sawmthum a ni ding a nih.
5. Kum nga le kum sawmhni inkar mi a ni chun pasal chu shekel sawmhni ning a ta, nuhmei chu shekel sawm ning a tih.
6. Thla khat mi le kum nga mi inkar a ni chun pasal man chu tangkaruo shekel nga ning a ta, nuhmei man chu tangkaruo shekel thum ning a tih.
7. Pasal kum sawmruk chung tieng mi a ni chun a man chu shekel sawm le panga ning a ta, nuhmei a ni chun shekel sawm ning a tih.
8. Thu intiemkamna neitu kha a rethei leia a man dinga tuk zat a pek thei naw a ni chun a mihriem inhlan ding chu thiempu kuomah fepui a ta, thiempu chun a man a pek thei zat angin lo tuk a tih.
9. " 'An tiemkamna chu LALPA kuoma inhlan dinga pom tlak ran a ni chun, chuong ang ran, LALPA kuoma inhlan dinga a pek chu ran thienghlim a hung ni tah.
10. Chu ran chu ran thain amanih ran tha loin amanih a thlak ding a ni nawh. Ran pakhat chu ran danga thlak a ni khomin ran pahnihai chu ran thienghlim an ni ve ve a nih.
11. Inhlan dinga a tiem ran chu Pathien kuoma inhlan tlak lo ran a ni chun thiempu kuomah a hung pek ding a nih.
12. Thiempu chun ran chu inhlan tlak a ni le ni naw lo en fel a ta, aman a ti ang ang chu ni pei a tih.
13. Amiruokchu, ran chu intlan nawk ding a ni chun ran hlutna thiempu bituk hmun ngaa thea hmun khat chu pe belsain intlan thei a tih.
14. " 'Chun, miin a in LALPA ta dinga a'n hlan chun, a in that le that naw dan zirin thiempuin a hlutzie tuk a ta, a tuk ang ang chu a hlutna ning a tih.
15. A petuin in chu intlan nawk a nuom chun a hlutna hmun ngaa thea hmun khat pe belsain intlan a ta, in chu a ta ni nawk a tih.
16. " 'Miin an sungkuo ram iemani ruol LALPA ta dinga a'n hlan chun, a lo hlutna chu bu chi an thlak zata inthoka sut suok ding a nih. Barli chi kilogram sawmhni an tuna hmun hlutzie chu tangkaruo shekel sawmnga pei ning a tih.
17. A lo chu Jubili kuma inhlan a ni chun a tira a hlutna an tuk chu pangngai zing a tih.
18. Jubili kum hnunga inhlan a ni ruok chun Jubili kum nawk chena a hlutna chu thiempuin sut suok a ta, a ruot dan angin a hlutna chu suktlawm ning a tih.
19. Lo petuin intlan nawk a nuom chun a man hmun ngaa thea hmun khat pe belsain intlan a ta, a ta hung ni nawk a tih.
20. Lo chu intlan nuom lo a, mi dang kuoma a zor chun, intlan kir thei ni ta naw nih.
21. Jubili kum pha khom LALPA puol dinga inhlan tah lo thienghlim hung ni tang a ta, thiempuhai ta ni tang a tih.
22. " 'Miin an sungkuo rama mi ni lo ram inchaw a, LALPA ta dinga a'n hlan chun,
23. thiempu'n a ram hlutna chu Jubili hung tlung ding kum chena hisapin sut suok a ta, a'n hlan ni chun a man zat dinga ruot chu ram petu chun Pathien ta dinga thilpek thienghlimah a pek ding a nih.
24. Jubili a tlung pha chun a'n chawkna pa kuomah ram chu pe kir nawk a tih.
25. Thil man zat sutnaa hmang ding chu hmun thienghlima shekel an hmang anga hisap vong ding a na, chuong ang dungzui chun shekel khat chu gera sawmhni a nih.
26. " 'Tu khomin ran pieng hmasa tak an inhlan ding a ni nawh, ran pieng hmasa tak chu bawngchal amanih beram chal amanih khom ni sien an inhlan ding a ni nawh, ran lutir chu LALPA chanpuol ni ta sa, LALPA ta a ni si a.
27. Ran thienghlim lo a ni chun thiempuin a man zat LALPA ta dinga a tuk angin a neitu chun intlan a ta, a man hmun ngaa thea hmun khat pe belsa bok a tih. Intlan a ni naw chun thiempuin a man zat a ruot anga zor ding a nih.
28. " 'Mi tu khomin LALPA ta dinga a thil nei a pek suok tah mihriem amanih, ran amanih le sungkuo ram amanih hrim hrim chu zor le intlan nawk ding a ni nawh, LALPA kuoma inhlan taphot chu thil thienghlim tak a ni si a.
29. Mihriem khom ni sien, chuong anga pek suok taphot chu intlan loa sukhlum ding a nih.
30. " 'A rama inthoka suok hrim hrim sawmapakhat po po, bu le bal amanih thing ra amanih khom LALPA chanpuol a na, LALPA ta dinga thil thienghlim a nih.
31. Tu khomin a sawmapakhat a'n tlan chun hmun ngaa thea hmun khat hu a bel sa ding a nih.
32. Bawng ruol le beram ruol laia mi, berampu hmol hnuoia um sawma pakhat pei chu LALPA ta dinga ran thienghlim a nih.
33. A sie a tha thlier ding a ni naw a, thlakthleng ding a ni bok nawh. A thleng lui a ni khomin a ran thleng le a aiawtu kha an thienghlim ta ve ve leiin intlan thei a ni ta nawh' ti rawh" a ta.
34. Hieng thupekhai hi Sinai tlanga Mosie kuoma Israelhai ta dinga LALPA pek a nih.
←  Leviticus (27/27)