←  Leviticus (26/27)  →
1. " 'Milem in siem ding a ni nawh. Biek ding lung milem kerin a ram sungah in ta dingin in phun ding a ni naw a, a hmaah in kun ding a ni bok nawh. Kei hi LALPA, in Pathien chu ka nih.
2. " 'Ka chawlni Sabat inser unla, ka hmun thienghlim inza ro. Kei hi LALPA chu ka nih.
3. Ka thusuokhai in zui a, ka thupekhai fimkhur taka in zawm chun,
4. a hunbi takah ruo hung insurtir ka ta, hnuoiin thlai insuong a ta, rama thinghaiin ra insuo bok an tih.
5. In bu vuok hun le grep lo hun inpha hman a ta, grep in lo hun le thlai chi in thlak hun inpha hman nawk a ta, in du du hnienghnar takin chen in ta, in ramah him takin khawsang in tih.
6. " 'Hi ram hi ralmuong takin siem ka ta, tu khom ti ding nei loin imu intuong in ta, ram sa tiumhai hnot zam vong ka ta, a ramah kawlhnam inleng naw nih.
7. In hmelmahai chu hnot thlur in ta, kawlhnamin sat hlum in tih.
8. Mi pangain za ruol hnot leng in ta, za ruolin sing ruol hnot leng bok in ta, kawlhnamin in ke bulah sat thal rem rum in tih.
9. " 'Ditsak ka ti cheu a, chi tam tak inthlatirin sukpung ka ti cheu a, in laka ka thuthlung chu vong zing ka tih.
10. Bu thar huna khom kum hmasaa bu la nei zing in ta, a thar hlu lutna dingin bu hlui chu thak suok in tih.
11. Nangni lai ka biekbuk innghat ka ta, lung ten nawng ka ti cheu.
12. Intlonpui ka ti cheu a, in Pathien ning ka ta, ka mihai ning in tih.
13. Kei hi LALPA in Pathien, Aiguptahai bawia in um zing nawna dinga Aigupta rama inthoka thuoi suoktu cheu chu ka nih. In ringkol bun ka suktliekpek cheu a, inzaum takin ka'n lawn martir ta cheu a ni hi.
14. " 'Amiruokchu, ka thu in ngaithlak naw a, ka thupekhai in zawm naw a,
15. ka thuruothai in hnawl a, ka danhai in theida a, ka thupekhai in thaw naw a, ka thuthlung in bawsiet chun,
16. in chungah hi hi keiin thawng ka tih: thlaphangnain innang chingtir thut ka ti cheu a, ngor hri le khawsik inlengtir ka ta, chu chun in mit sukthimin in hringna fa chau a tih. Thlai chi a thlawnin thlak in ta, in hmelmahaiin fa zo pei an tih.
17. Hmel tlai inhmutir nawng ka ti cheu a, in hmelmahaiin hneng an ti cheu a, a theidatuhai cheu chun in chungah ro rel an ta, tu hnot lo khomin tlan sieng in tih.
18. " 'Hieng po po in chunga a tlung hnung khoma in mi la ngaithlak naw rop chun, in suolna leiin a let sariin hrem ka ti cheu.
19. In uongthuongna le lululna chu suksieng ka ta, van khi kapathir angin inchangtir ka ta, hnuoi hi dar thir angin inchangtir bok ka tih.
20. Tha a thlawnin seng in ta, hnuoiin thlai insuopek naw ni cheu a, a rama thinghaiin ra insuopek bok naw ni cheu.
21. " 'Ka thu ngaithla nuom loa ka lakah in hel zing chun, in suolna le inphuin, hremna chu a let sariin sukpung ka tih.
22. Ram sa kolhai hung tir ka ta, in nautehai inchu hmangpek an ti cheu a, in ranhai fa tlaran an ta, nasa taka in kiem leiin in lampuihai chu hrawtu um loin thing bor bor a tih.
23. " 'Chuong sa khoma ka thununna cheu chu pom loa ka lakah in hel zui pei chun,
24. kei khom nangni lakah hel ka ta, in suolna leiin a let sariin hrem ka ti cheu.
25. Thuthlung in bawsietna phuba la dingin in chungah kawlhnam hung tir ka ta, in khuo senga in intom khawm pha leh nangni lai hripui hung tir ka ta, hmelma kuta pekin um in tih.
26. Bei in lakna lampui ka hrukpek pha cheu chu, thuk pakhatah nuhmei sawmin rong bawl in ta,insem diet diet in ta, in chan seng in fak zo hnung khomin la tam zing in tih.
27. " 'Hieng sa khoma in mi la ngaithlak naw rop a, ka lakah in hel zing chun,
28. in chungah ka lungsen tuong a ta, in suolna leiin kei ngeiin a let sariin hrem ka ti cheu.
29. In naupahai le naunuhai sa fang in tih.
30. In hmun insanghai suksieng ka ta, rimtui rawna maicham sukchim ka ta, hringna nei lo milem in biekhai chungah in mithi ruonghai chu vum thurin pei khawm ka ta, theida bok ka ti cheu.
31. In khawpuihai chu sukram ka ta, in hmun thienghlim chu tlu sop a ta, rim inhnik in inhlan khomin lawmna hrim nei naw ning.
32. In ram chu suktlaran ka ta, chu taka um in hmelmahai chun pangzat hiel an tih.
33. Hnam tin lai sukdar ka ti cheu a, ka kawlhnam vilik ka ta, hnot thlur ka ti cheu. In ram chu tlaran vong a ta, in khawpuihai chu tlu ram a tih.
34. In hmelmahai rama in um sung po chun in ram chu hluo loin tlaran a ta, hadam takin chawl tok tok a tih.
35. Hluotu nei loa a tlakran sung chun in hluo laia chawlni khom chawl thei loa um ram khan chawlni hmang ve tang a tih.
36. " 'Chun, nangni laia mi la dam sunhai khom an hmelmahai ramah thlaphang dor dorin siem ka ta, thliin thing hna a mut leng ri ringot khom tlansietpui an ta, indonaa mi hnot thlur ang elin hnottu um si loin tlan sieng an ta, inpal thlu phung an tih.
37. Hnottu um si loin anni le anni inpal thlu pheng phung an ta, in hmelmahai lo dang dingin hratna hrim nei naw ti niu.
38. Hnam dang mihai lai bohmang in ta, in hmelmahai ram chun dol hmang a ti cheu.
39. A dam sun la umhai chu hmelmahai ramah an suolna leiin ral tiel tiel an ta, an pahai suolna leiin la riral an tih.
40. " 'Sienkhom, an thlahaiin an suolna le an pahai suolna, ka lakah hela an mi'n phatsanna laka an suolna chu, la hung inpuong an tih.
41. Chuong anga an suolna lei chun kei ngei khom anni lakah ka lungril a hel a, an hmelmahai ramah ka'n tangtir pha hiel a nih. A tawpah, an lungril ser tan lo chu hung inphahnuoi a, an suolna leia hrem tuor an nih ti an pom pha chun,
42. Jakob kuoma ka thuthlung, Isak kuoma ka thuthlung le Abraham kuoma ka thuthlung chu hre zing ka ta, ka mihai kuoma ram pek ka tiem khom chu sukthar nawk ka tih.
43. Chu hma chun a rama inthokin anni chu inthiel fai phot a ngai, an rausan sunga a ram chu hadam taka a chawl theina dingin. Ka danhai hnawla ka thuruothai an theida leiin an suol man chu a kimin an hmu phot ding a ni hrim a nih.
44. Sienkhom, an siet pha der khopin hmelma ramah intangtir nawng ka ta, an kuoma ka thuthlung chu sut pha hiel khopin anni chu hnawlin theida nawng ka tih. Kei hi LALPA, an Pathien chu ka ni si a.
45. An Pathien ka ni theina dinga hnam danghai mithmua ngei Aigupta rama inthoka anni thuoi suoktu chu ka ni leiin, anni zarin an pi le puhai kuoma ka thuthlung chu hre zing ka tih. Kei hi LALPA chu ka ni si a' tiin hril rawh" a ta.
46. Chuonghai chu Sinai tlanga Mosie hmanga ama le Israel thlahai inkara LALPAN a siem thuruothai, danhai le thupekhai chu an nih.
←  Leviticus (26/27)  →