←  Leviticus (25/27)  →
1. Chun, LALPA chun Sinai tlangah Mosie a biek a,
2. "Israel thlahai kuomah hieng hin hril rawh: 'Ram ka pek ding cheu in tlung pha leh, a ram khomin LALPA chawlni chu a'n ser ve ding a nih.
3. Kum ruk sung loah bu le thlai ching in ta, kum ruk sung in huona grep kunghai chu tana der thar insuotirin a ra sik in ta,
4. a kum sarinaa ruok chu LALPA chawlni inserin ram chu a chawl ve ding a nih. In loah ieng khom ching naw ro, in grep kunghai khom thum bok naw ro.
5. Amaa hung to bu le thlai le in enkol lo grep ra chu sik naw ro. Ram chu kum khat a chawl ding a nih.
6. Ram chu inchawltir inla khom in siehlawhai ta ding dam, hlawfa in sorhai ta ding dam, hnam dang in umpuihai ta ding dam le nangni ta dingin fak ding chu um tho a tih.
7. In ran ruolhai le in rama sahai ta ding khomin fak ding um tho bok a tih."
8. "Chun, chawl kum let sari chu tiem in ta, kum sari hmun sari chu kum sawmli pakuo ning a tih.
9. Chu zoa a thla sarina ni sawmna, Inremna Ni chun a ram hmun tinah mi tir unla, inring takin tawtawrawt mut raw se.
10. A kum sawmngana chu inser unla, a ram sung po po le a mi chenghai po po kuomah zalenna puong ro. In ta dingin Jubili ning a ta, mi tinin mani ta ngai nei nawk in ta, mi tinin mani sungkuo in le lo hluo nawk in tih.
11. Kum sawmngana chu in ta dingin Jubili ning a ta, in ramah ieng khom ching naw unla, amaa to bu le bal chu sik naw unla, in enkol lo grep ra chu lo bok naw ro.
12. Jubili a ni a, in ta dingin kum thienghlim a ni ding a nih; loa inthoka fak fawm dinga in lak thar hlol chauh fa ro.
13. Jubili Kum hin mi tinin mani in le lo in chang kir nawk vong ding a nih.
14. " 'A ram mihai kuomah ram in zor amanih in inchawk amanih a ni chun a tu tu khom insukdawng naw ro.
15. Jubili-a inthokin kum ieng zat am a ni tah ti hisapin ram chu i khuo le venga inthokin inchaw rawh. Ram zortu che chun kum ieng zat am a tharsuok sikna ding i la nei ti hisapin ram chu a zor ding che a nih.
16. Sikna hun ding kum a la tam chun ram man chu sak to a ta, sikna hun ding kum a tlawm ta chun sak hnuoi a tih, a zor tak che kha a ram ni loin a tharsuok i chang ding chu a ni lem si a.
17. Chuleiin, a tu tu khomin Pathien tiin insukdawng naw ro. Kei hi LALPA, in Pathien chu ka ni si a.
18. " 'Ka thupekhai zui unla, ka danhai zawm ro, chuongchun, chu rama chun muong takin khawsang in tih.
19. Ram chun ra insuopek a ti cheu a, hnienghnar takin tlan in ta, muong takin um in tih.
20. A kum sarinaah lohma nei loa sik ding ei nei bok naw chun ieng am fa tang ei ta?' in ti khom a ni el thei.
21. A kum ruknaah nasa takin malsawmna hung tir ka ta, kum thum fak khop tharsuok in tih.
22. A kum rietnaa bu in hung chinga inthoka a kum kuonaa a ra insik chenin bu hlui chu ring in tih.
23. " 'Kumkhuoa dingin ram chu tu kuoma khom zor naw ro; ram neitu chu keima ka ni a, nangni chu mikhuol, ka ram santu chauh in nih.
24. In ram hluo po po chu intlan theiin in siem vong ding a nih.
25. I unaupa chu hung retheiin a ram a then lo zor sien, a laichin hnai takin a unaupa ram zor chu a hung intlan nawk ding a nih.
26. Amiruokchu, miin intlanpektu ding a nei naw a, intlan thei dinga a hung neinung chun,
27. a zora inthoka a'n chawk nawk chen inkara a hlutna chu sut suok a ta, a pung le chun a man chu a'n chawtu kuoma chun pe kir a ta, a ram chu chang nawk thei a tih.
28. Intlanna ding sum a nei naw chun Jubili kum chenin nghak a tih. Jubili kum chun ram chu pek kir ning a ta, chang nawk a tih.
29. " 'Chun, kula inhuon khuoah miin a in a zor chun kum khat sungin intlan nawk thei a tih.
30. Kum khat sunga intlan a ni naw chun a'n chawtu le a thlahaiin nei song an ta, Jubili kuma khom pek kir ni ta naw nih.
31. Kula inhuon lo khuo ruok chu ram anga ngai a ni leiin a neitu bulin intlan thei a ta, Jubili kuma pek kir nawk tho ding a nih.
32. " 'Levi chihai chun an chanpuol khuoa inhai ruok chu ieng huna khom intlan nawk thei an tih.
33. Levi chihai in le an khuo chu Israelhai laia an chanpuol hrim a ni leiin, intlan loa um, an in le an khuo chu Jubili kumah pek kir ding a nih.
34. An khaw kawl vela lo hmunhai ruok chu kumkhuoa an chanpuol a ni leiin zor thei a ni nawh.
35. " 'Chun, i unau a hung rethei a, a hung inenkol thei ta naw chun, nangni laia a khawsak zing theina dingin, khuolzin amanih ram dang mi in thangpui hlak angin, ama chu somdawl ro.
36. In unau chu in kuoma a khawsak zing theina dingin, a lakah thil ieng khom a pung la naw ro; Pathien ti lem rawh.
37. A pung umin sum in inpuktir ding a ni naw a, a hlawk umin fak ding in inpuktir ding a ni bok nawh.
38. Kei hi LALPA in Pathien, Kanan ram pe ding cheu le in Pathien ni dinga Aigupta rama inthoka thuoi suoktu cheu chu ka nih.
39. " 'Chun, i hnam chanpui a hung rethei a, a hung bel che chun bawi angin i sor ding a ni nawh.
40. Inhlawfa ang le i kuoma mikhuol khawsa ve angin inumtir i ta, Jubili kum chen i ta dingin sin thawng a tih.
41. Chu zoah ama le a nauhai chu insuong i ta, a chipuihai lai le a pi le pu in le loa chun kir nawk a tih.
42. Israelhai chu ka siehlaw, Aiguptaa inthoka ka hung thuoi suok an ni leiin, bawia zor thei an ni nawh.
43. An chungah rawng takin ro i rel ding a ni nawh, Pathien i ti lem ding a nih.
44. " 'Bawinu le bawipaa in nei dinghai chu in kawl vela hnam dang mihai an nih; annia inthokin bawi inchaw thei in tih.
45. Chun, nangni laia khawsa ram dang mi le in rama pieng an sungkuo laia mihai khom inchaw thei in ta, chuonghai chu in mi le sa ning an tih.
46. In le lo in inrochungtir angin anni chu in thlahai kuomah inrochungtir thei in ta, an dam sungin bawiah siem thei in ta, amiruokchu in unau Israel thlahai chunga ruok chu rawng takin ro in rel ding a ni nawh.
47. " 'Nangni laia hung khawsa ram dang mi amanih mikhuol amanih chu a hung hausa a, i unau chu a hung pasie a, in laia cheng ram dang mi amanih, a sungkuohai amanih kuomah i unau a'n zor a ni chun,
48. a'n zor hnung khomin intlan suok theina a nei a, a laichinhaiin intlan thei an tih.
49. A pa unauhai le an nauhaiin amanih intlan thei an tih. A hung neinung chun ama le ama intlan thei a tih.
50. A'n chawtupa leh inchawk a nia inthoka Jubili kum nawk chen ding sut suok raw se. A'n tlanna man zat ding chu inhlawfaa ruoi angin a hlaw zat ding sut suokpek a, chu chu a thaw zat kum anga hisap ding a nih.
51. Kum tam tak a la bak chun a'n tlanna man chu an inchawkna man neka tam dai a pek ngai a tih.
52. Jubili tlung hma kum tlawmte a bak ta chun, chu chu sut suok a, intlanna man chu pek ding a nih.
53. Kum khat bi ang peia inhlawfaa ruoi anga thaw ding a na; a sortu chun rawng taka a soisak in phal ding a ni nawh.
54. Chuong ang zawnga intlan a ni naw khomin, Jubili kumah ama le a sunghai chu suok an tih.
55. Israel thlahai chu ka siehlawhai an ni si a. Aigupta rama inthoka ka thuoi suok, ka siehlawhai an nih. Kei hi LALPA, in Pathien chu ka nih.
←  Leviticus (25/27)  →