Leviticus (23/27)  

1. Chun, LALPA chun Mosie kuomah,
2. "Israelhai be la, hieng ang hin hril rawh: Hienghai hi kut ka ruothai, LALPA ta dinga kut ruothai, inkhawmpui thienghlima in puong ding hai chu an nih:
3. " 'Ni ruk sung sin thawng in ta, ni sarina chu Sabat a ni a, in chawl ding a nih. Sabat hi LALPA puol a ni a, in umna taphotah sin ieng khom thaw loa inkhawmin in inser ding a nih.
4. " 'Hienghai hi LALPA kut, a hunbi ang taka inkhawmpui thienghlim in puong hlak hun ding chu a nih.
5. Thla hmasa tak ni sawm le pali, nisa tlaka inthokin LALPA Fekan Kut chu intan a tih.
6. Chu thla, ni sawm le panga chun LALPA Chol thang lo bei kut chu intan a ta, ni sari sung chu chol thang loa siem bei in fak ding a nih.
7. A ni hmasa taka chun inkhawmpui thienghlim nei in ta, sin hrim hrim in thaw ding a ni nawh.
8. Ni sari sung chun meia pumraw thilhlan inthawina LALPA kuomah in inhlan ding a nih. Ni sari-a chun inkhawmpui thienghlim nei unla, sin hrim hrim thaw naw ro' tiin" a ta.
9. LALPA chun Mosie kuomah,
10. "Israelhai be la, hieng ang hin hril rawh: 'Ram ka pek cheu in tlung pha, in lo tharsuok bu in sik hmasa taka buphal tel khat chu thiempu kuomah hung chawi ro.
11. Buphal chu LALPA hmaah nangni aiawin thiempu chun then a ta, lo pompek a ti cheu. Sabat ni a ni chun a zingah then a tih.
12. Buphal then ni chun beramchal tuoi, kum khat mi le hmel hem lo chu pumraw thilhlanah LALPA kuomah in inhlan ding a nih.
13. Chu taka bu le bal thilhlana chun beiphit indip kilogram hni, hriek le hmet le dawn ding uoiin thilhlan liter khat thangsain LALPA ta dinga rim inhnik, meia thilhlanah inhlan ro.
14. In Pathien hmaa thilhlan in hung chawi hma chun beia siemin amanih, a zeua zeuin amanih le a vuia chipin amanih in fak ding a ni nawh. Khaw lai hmuna khom um inla, hi hi in thlahai chena in kumkhaw dan ding chu a nih.
15. " 'Sabat zo zinga then thilhlana buphal in inhlan nia inthoka tiema a chawlkar sarinaah Pawl Kut in hmang ding a nih.
16. Chu sabat voi sarina zo tuk, ni sawmnga ni chun in bu thar chu LALPA kuomah hung inhlan ro.
17. Khaw lai hmuna khom um inla, beiphit indip kilogram hnia inthoka chol thanga siem le ur bei tlang hlum hni chu thar hmasa tak then thilhlana dingin LALPA kuomah hung inhlan ro.
18. Bei le hin beramchal tuoi pasari, kum khata upa le hmel hemna nei lo le bawngchal tuoi pakhat le beramchal pahnih hung inhlan ro. Chuong thilhlanhai le bu le bal thilhlan le dawn ding thilhlanhai chu LALPA ta dinga pumraw thilhlan, LALPA ta dinga meia thilhlan rim inhnik tak chu ning a tih.
19. Chun, suol inthawina dingin kelchal pakhat inhlan unla, inremna inthawina thilhlanah beramchal tuoi pahnih, kum khata upa ve ve, in inhlan ding a nih.
20. Thiempu chun beram pahni le thar hmasa thilhlan bei tlang hlum hni chu LALPA hmaah then a tih. Chuonghai chu thiempu chanpuol, LALPA ta dinga thilhlan thienghlim a nih.
21. Chu ni chun inkhawmpui thienghlim hmang in ta, sin hrim hrim in thaw ding a ni nawh. Hi hi in umna taphota in thlahai chen khoma in kumkhaw dan ding chu a nih.
22. " 'Chun, in loa bu in sik pha hnawm sira mi chen chen sik naw unla, sik hmai bu to khom zong bok naw un la, mi retheihai le ram dang mihai ta dingin hla lem ro. Kei hi LALPA in Pathien chu ka nih' ti rawh" tiin.
23. Chun, LALPAN Mosie kuomah,
24. "Israelhai kuomah hi hi hril rawh: Thla sarina ni khat ni chu chawl in ta, tawtawrawt muta puongin inkhawmpui thienghlim in nei ding a nih.
25. Sin hrim hrim in thaw ding a ni nawh. LALPA ta dinga meia thilhlan in inhlan ding a nih' tiin" a ta.
26. LALPA chun Mosie a biek a,
27. "Thla sarina ni sawm ni chu Inremna Ni a nih. Inkhawmpui thienghlim nei unla, iengkim insum vong unla, LALPA kuomah meia thilhlan inhlan ro.
28. Hi ni hin sin hrim hrim in thaw ding a ni nawh, Inremna Ni, LALPA in Pathien hmaa in ta dinga inremna siemna ni a ni si a.
29. Hi nia tukhom mani insumf lo chu a chipuihaia inthoka tuithlar ning a tih.
30. Hi nia sin thaw hrim hrim chu a chipuihai laia inthokin sukbohmang ka tih.
31. Sin hrim hrim in thaw ding a ni nawh. Khaw lai hmuna khom um inla, hi hi kumkhuoa in zawm ding thupek a nih.
32. Sabat chu chawlna ni a ni a, iengkimah an insum vong ding a nih. Hi thla, ni kuo hin zan tieng nisa tlaka inthoka a zing zan tieng nisa tlak chen sabat hi in inser ding a nih' tiin" a ta.
33. Chun, LALPA chun Mosie a biek a,
34. " 'Israel thlahai kuomah hieng hin hril rawh: 'Thla sarina ni sawm le ni nga ni hin LALPA Bawkte Kut chu intan a ta, ni sari sung awng a tih.
35. A ni hmasa tak chu inkhawmpui thienghlim a na, sin hrim hrim in thaw ding a ni nawh.
36. Ni sari sung chun LALPA kuomah meia thilhlan inhlan unla, a ni rietna chu in ta dingin inkhawmpui thienghlim ning a ta, meia thilhlan LALPA kuomah in inhlan ding a nih. Inkhawmpui tumtiek ni a na, sin hrim hrim in thaw ding a ni nawh.
37. " 'Chuong chu LALPA kut ruot bi senga meia thilhlan- pumraw thilhlan dam, bu le bal thilhlan dam, inthawina le dawn ding thilhlan dam- LALPA kuoma in hung chawina dinga inkhawmpui thienghlim in siem dinghai chu an nih.
38. Hieng thilhlanhai hi LALPA Sabat nia thilpek dam, thilthlawnpek dam, thu tiemna leia thilpek dam le mani nuom thua LALPA kuoma in inhlanhai baka in thaw ding chu a nih.
39. " 'Chuongchun, thla sarina ni sawm le ni nga nia in loa thlaihai in sik zo pha leh LALPA kut chu ni sari sung hmang in ta, a ni khatna chu chawl hadamna ni ning a ta, a ni rietna khom chawl hadamna ni ni bok a tih.
40. A ni khat ni chun thei ra in du chi dam, tum kau dam, sawlhna dam, phahram kau dam la khawm in ta, LALPA in Pathien hmaah ni sari sung chu in hlim ding a nih.
41. Hi kut hi LALPA ta dingin kum tin ni sari sung in hmang hlak ding a nih. Hi hi in thla pei dinghai chena kumkhaw dan ding chu a nih; thla sarinaah in nei hlak ding a nih.
42. Sawlbukah ni sari um in ta, Israel rama pieng hrim hrim chu sawlbukah an um vong ding a nih.
43. Chuongchun, in thlahai chun Aigupta rama inthoka Israel thlahai ka thuoi suok lai khan sawlbukah kan umtir ti hung hre thei an tih. Kei hi LALPA, in Pathien chu ka nih' ti rawh" tiin.
44. Chuong ang chun, LALPA kut hunbi ruothai chu Israel thlahai kuomah Mosien a puong tah a nih.

  Leviticus (23/27)