←  Leviticus (19/27)  →
1. LALPA chun Mosie kuomah,
2. "Israel thlahai po po ko khawm la, an kuomah hieng hin hril rawh: 'In thienghlim ding a nih, kei LALPA in Pathien hi ka thienghlim si a.
3. " 'Mani nu le pa in inza seng ding a nih. Ka chawlni Sabat in inser ding a nih. Kei hi LALPA in Pathien chu ka nih.
4. Milem tieng ngha naw unla, in biek ding milem sung naw ro. Kei hi LALPA in Pathien chu ka nih.
5. " 'LALPA ta dinga inremna thilhlan in inhlan pha leh a pom tlak ni dingin inhlan ro.
6. In inhlan ni le a zinga chena fak ding a na, ni thum nia a bang la um chu raw hmang ro.
7. Ni thum nia mi in fak chun a porche tah leiin in thil inhlan chu pom naw ning.
8. A fatu taphot chun LALPA thienghlimna an sukporche leiin a maw phur an ta, an chipuihai lai tuithlar ning an tih.
9. " 'Chun, in loa bu in sik pha lo hnawm rawta mi chen chen la naw unla, sik hmai inkhawm dingin fe bok naw ro.
10. In grep huonah lo hmai grep zong naw unla, a ra til khom rut bok naw unla, mi retheihai le ram dang mihai ta dingin hla lem ro. Kei hi LALPA in Pathien chu ka nih.
11. " 'Inru naw ro. Khel hril naw ro. Inhlemtuo naw ro.
12. " 'Ka hming sala indik lo taka inkhamin i Pathien hming sukpawi naw rawh. Kei hi LALPA chu ka nih.
13. " 'I venghai thil lakpekin rok naw rawh. Inhlawfa hlaw zan khat khom hrenpek naw rawh.
14. " 'Naset chu tongsie inphur naw la, mitdel hmaah dalkham sie naw la, i Pathien ti lem rawh. Kei hi LALPA chu ka nih.
15. " 'Fel takin i venghai thu r�lpek la, mi rethei thlier naw la, mi lien ditsak bik naw la, i venghai chungah indik takin ro rel rawh.
16. " 'I mihai lai indem sietna thu the dar naw rawh. I tuolbawm hringna ta dinga tium ieng khom thaw ngai bok naw rawh. Kei hi LALPA chu ka nih.
17. " 'I unau theida ruk naw rawh. Tlang taka zilin in inkar thu sukfel la, a thiem nawnaah chan nei ve naw rawh.
18. " 'Phuba lak ding zong naw la, i mihai tu khom theida naw la, nangma i'n hmangai angin i venghai hmangai rawh. Kei hi LALPA chu ka nih.
19. " 'Ka thupekhai vong rawh. I ran chu ran chi hrang hrang leh inzawltir naw rawh. Lo pakhatah thlai chi hrang ching hmun khat naw rawh. Thil hrang chi hni inpola khawng thuom hak naw rawh.
20. " 'Tu khom bawi nunghak, miin hmei dinga a huol, sienkhom a man la pe tlak si lo amanih le insuo zalen la ni lo chu pasalin lo inngaipui sien, bawi el a la ni leiin sukhlum loa a awm tawka hrem ding an nih.
21. LALPA kuoma bawsiet inthawina dingin Intuokna Puon in kotah pasal chun beramchal a hung kei ding a nih.
22. A bawsiet inthawina beram chu LALPA hmaah a suol ngaidamna dingin thiempu chun inhlanin inremna siempek a ta, a suol chu ngaidam ning a tih.
23. " 'Chun, ram chu hluoa thing in phun pha khom, a ra hmasa chu fak thieng loah sie ro. Kum thum sung chu a ra fak thieng loa ngaiin in fak ding a ni nawh.
24. A kum linaa a ra po po chu ra thienghlim, LALPA inpakna thilhlana ngai ning a tih.
25. A kum nganaa a ra ruok chu fa thei tang in tih. Hieng anga in thaw chun in tharsuok hung pung a tih. Kei hi LALPA, in Pathien chu ka nih.
26. " 'Sa hrim hrim a thisen chopin fa naw ro. Dawi le aisan thaw ngai naw ro.
27. " 'Bek sam in vaw ding a ni naw a, khakhmul hmawr in tan ruol ding a ni bok nawh.
28. " 'Mithi leiin in taksa in inat pop ding a ni naw a, in vunah lem in inchuk tiel ding a ni bok nawh.
29. " 'I naunu chu tempul nawchizorad siemin sukporche naw rawh, chuong naw chun a ramin nawchizor hung inchang an ta, ritlona sip rawi a tih.
30. " 'Sabat inser unla, ka biekbuk inza ro. Kei hi LALPA chu ka nih.
31. " 'Rau ko thiemhai le dawithiemhai pan naw ro, sukporcheng an ti cheu. Kei hi LALPA in Pathien chu ka nih.
32. " 'Upahai hmaah ngir unla, tarhai inza unla, Pathien chu ti ro. Kei hi LALPA chu ka nih.
33. " 'Ram dang mi in rama chenghai chu sukrimsi naw ro.
34. Nangni laia ram dang mi cheng chu a rama pieng ang charin en ro. In inhmangai ang takin ama khom hmangai ve ro, nangni khom Aigupta rama khan ram dang mi in ni ve kha. Kei hi LALPA in Pathien chu ka nih.
35. " 'Thil seizie, rikzie le tamzie inkhina le bukna indik lo hmang ngai naw ro.
36. Inkhina le bukna indik, efa tekhawng le hin no indik tak hmang hlak ro. Kei hi LALPA in Pathien, Aiguptaa inthoka thuoi suoktu cheu ka ni hi.
37. " 'Ka thupekhai vongin ka dan po pohai zawm ro. Kei hi LALPA chu ka nih' tiin" a ta.
←  Leviticus (19/27)  →