←  Leviticus (18/27)  →
1. LALPA chun Mosie kuomah,
2. "Israel thlahai inbiekpui la, an kuomah hieng hin hril rawh: 'LALPA in Pathien chu ka nih.
3. In umna hlak Aigupta rama mihai thaw dan angin thaw ve naw unla, ka thuoina ding cheu Kanan rama mihai thaw dan angin thaw bok naw ro. An thil chinghai chu ching ve naw ro.
4. Ka danhai zawm unla, ka thupekhai fimkhur takin zui ro. Kei hi LALPA in Pathien chu ka nih.
5. Ka thupek le ka danhai vong ro, a zawmtu taphot chun hringpui a tih. LALPA chu ka ni si a.
6. " 'Tu khomin sungkuo inhnaipuihai pawl dingin in thlem ding a ni nawh. LALPA chu ka ni hi.
7. " 'I nu pawlin i pa hming sukpawi naw rawh. I nu a ni leiin i pawl ding a ni nawh.
8. " 'I pa nuhmei i pawl ding a ni nawh, i pawl chun a hming sukpawi i tih.
9. " 'I farnu amanih, i pa naunu amanih, i nu naunu amanih, in hmunkhata pieng amanih hmun danga pieng amani khom i pawl ding a ni nawh.
10. " 'I naupa naunu amanih i naunu naunu amanih i pawl ding a ni nawh, nang le nang insukpawina a nih.
11. " 'I pa nuhmei naunu, i pa thalbea inthoka suok chu i farnu a ni leiin i pawl ding a ni nawh.
12. " 'I pa farnu i pawl ding a ni nawh, i pa laichin hnai a ni leiin.
13. " 'I nu zuorpuinu i pawl ding a ni nawh, i nu laichin hnai a ni leiin.
14. " 'I pa unaupa nuhmei chu pawl naw rawh, i nute a ni si a.
15. " 'I mo i pawl ding a ni nawh. I naupa nuhmei a ni leiin i tawk ding a ni nawh.
16. " 'I unaupa nuhmei i pawl ding a ni nawh, i pawl chun i unaupa sukpawi i tih.
17. " 'Nufa kopin i pawl ding a ni nawh. A naupa naunu khom, a naunu naunu khom i pawl ding a ni nawh, inlaichin hnai vong an ni leiin. Chuong thil thaw chu ritlona a nih.
18. " 'I nuhmei dam lai zingin a zuorpuinu nuhmeiah nei naw rawh.
19. " 'Nuhmeiin a dan pangngaia thla a pal laiin pawl naw rawh, a porche lai a nih.
20. " 'I tuolbawm nuhmei pawlin insukporche naw rawh.
21. " 'I nauhai tu khom Molekc kuoma inhlan dinga pein Pathien hming i sukpawi ding a ni nawh. Kei hi LALPA chu ka nih.
22. " 'Pasalin nuhmei a pawl angin pasal a pawl ding a ni nawh; chu chu thil tirdakum a nih.
23. " 'Ran rimin insukporche naw rawh. Nuhmei khom ran le inpawl dingin a'n pek ding a ni nawh; chu chu piengsuolna a nih.
24. " 'Chuong thila hai chun in insukporche ding a ni nawh, in hmaa ka hnot suok ding hnamhai hi chuong anga lo insukporche vong chu an nih.
25. A ram chenin an sukporche a, an suolna leiin ram chu ka hrem a, a sunga chenghai a luok suok tawl el a nih.
26. Nangni chun ka dan le thupekhai in vong ding a nih. A rama pieng le ram dang mi nangni laia chenghai khomin hieng ang thil tirdakum hi an thaw ding a ni nawh.
27. Chuonghai po po chu in hmaa chenghai khan an lo thaw hlak a, a ram phekin an sukporche tah a nih.
28. Nangni khomin in sukporche chun a hmaa chenghai ang bokin a ram chun luok suok veng a ti cheu.
29. "Nangni lai tu khom chuong ang tirdakum thaw an um ve chun a chipuihai laia inthoka tuithlar ning a tih.
30. Chuleiin, hieng thil tirdakum, in hmaa an ching ang chu in ching ve nawna ding le chuonga chun in insukporche nawna dingin ka thupekhai hi in zawm ding a nih. Kei hi LALPA in Pathien chu ka ni si a' tiin" a ta.
←  Leviticus (18/27)  →