← Leviticus (15/27) → |
1. | LALPA chun Mosie le Aron a biek a, |
2. | "Israelhai kuomah hi thu hi hril ro: Pasal tukhomin a taksaah thil put suok a nei chun, chu thil put chu thil porche a nih. |
3. | A taksaa inthokin a put zing amanih a chat tah amanih a ni khomin, ama chu tirdakum a'n kaitir a nih. Thil putin mi a sukporche dan chu hieng hi a nih: |
4. | " 'Thil put nei zalna khum chu a sukporche a, a thungna taphot khom a sukporche bok a nih. |
5. | A khum tawk taphot chun tuiin an puon sawpin an insil ding a nih; zan tieng chen porche kai an tih. |
6. | Tu khom thil put nei inthungna tawk taphot chun tuiin an puon sawpin an insil ding a nih; zan tieng chen porche kai an tih. |
7. | " 'Tu khomin thil put neitu a tawk chun tuiin a puon sawpin a'n sil ding a nih; zan tieng chen porche kai a tih. |
8. | " 'Thil put nei tu khomin mi porche lo khom chil a sakkhum chun, chu mi chun a puonhai sawpin a'n sil ding a nih; zan tieng chen porche kai a tih. |
9. | " 'Iengkim a chuongnaa a thungna taphot chu a porche a, |
10. | a thung de ieng khomin a tawk taphot chu zan tieng chen porche kai a tih. Chuong thilhai la khawmtu chun a puonhai sawpin tui a'n sil ngei ngei ding a nih; zan tieng chen porche kai a tih. |
11. | " 'Thil put neituin tuia a kut sawp fai loa mi a tawk taphot chun a puonhai sawpin tuiin a'n sil ding a nih; zan tieng chen porche kai a tih. |
12. | " 'Pil bel a tawk a ni chun vuok koi ding a na, thinga siem a ni ruok chun tuia intleu fai vong ding a nih. |
13. | " 'Chun, thil put neitu chu a thil puta inthoka a hung fai chun inthienna dingin ni sari sung inbituk a ta, a puonhai sawp a ta, vadung tuiah insil a ta, hung inthieng a tih. |
14. | A ni rietnaa vathu an naw leh parva pahni LALPA hmaah hung chawiin Intuokna Puon in kota chun hung a ta, thiempu hung peng a ta. |
15. | Thiempu chun pakhat chu suol thawinan inhlan a ta, pakhat dang chu pumraw thilhlanah hmang a tih. Chuong ang chun mi chu a thil putna laka chun LALPA hmaah inremna siempek a tih. |
16. | " 'Pasal chi a put chun a pumin insil a ta, zan tieng chen porche kai a tih. |
17. | Puon amani savun amania chi hlek kai hrim hrim chu tuia sawp fai vong ding a nih. |
18. | Pasalin nuhmei a zalpuia a chi a put chun an pahniin insil fai an ta, zan tieng chen porche kai an tih. |
19. | " 'Nuhmeiin a dan pangngai anga thi a nei chun, thla a pal zata a porche sung chu ni sari ning a ta, tu khom a tawk taphot chu zan tieng chen porche kai a tih. |
20. | A thla pal sunga a zalna taphot chu porche kai a ta, a thungna taphot khom porche kai bok a tih. |
21. | A khum tawk taphot chun a puonhai sawpin tuiin insil sien la, zan tieng chen porche kai a tih. |
22. | A thungna tawk taphot chun a puonhai sawpin tuiin insil fai sien, zan tieng chen porche kai a tih. |
23. | Khum amanih ieng khom a thungna taphot tawktu chu zan tieng chen porche kai a tih. |
24. | Pasalin a zalpui a, a thla pal thiin a tawk chun ni sari sung porche kai a ta, a zalna khum taphot chu porche kai bok a tih. |
25. | " 'A thla pal hun lai ni loa nuhmeiin thi sawt tak a nei amani le a thla pal hun sung neka sawt a nei amani chun thla a pal lai ang bokin a porche a nih. |
26. | A zalna khum taphot amani le a'n thungna taphot chu thla a pal hun lai ang bokin porche kai vong a tih. |
27. | A tawk taphot chun a puonhai sawpin tuiin insil fai sien, zan tieng chen porche kai a tih. |
28. | " 'A thi a tawp pha leh ni sari sung inthienna dingin inbituk sien, chu hnung chun hung inthieng tang a tih. |
29. | A ni rietna chun thiempu kuomah vathu an naw leh parva pahnih chawiin Intuokna Puon in kotah a hung ding a nih. |
30. | Thiempu chun pakhat chu suol thawinaah inhlan a ta, a pakhat dang chu pumraw inthawina thilhlanah inhlan a tih. Chuong ang chun thisen a palna laka chun LALPA hmaah thiempuin inremna siempek a tih. |
31. | " 'Israelhai chun anni laia ka chengna biekbuk an sukporche nawna ding le chu leia an thi pha nawna dingin, anni sukporche thei thil laka inthokin i vong fihlim tawl ding a nih. |
32. | " 'Hieng hi pasala inthoka thil put amanih chi putin amanih mi a sukporche thei dan thua dam, thla kipa nuhmei thi nei lai le a nuhmei a pasala inthoka thil putin a sukporche dan thua dam le pasalin nuhmei porche lai a zalpui thua danhai chu an nih" tiin. |
33. | (A um nawh) |
← Leviticus (15/27) → |