←  Leviticus (14/27)  →
1. Chun, LALPA chun Mosie a biek a,
2. " 'Hi hi inthien dinga thiempu kuoma phar in thuoi phaa in thaw dan ding chu a nih:
3. thiempu chu khaw daiah feng a ta, phar chu en a ta, a phar hri a hung dam ta chun,
4. thiempu chun inthiena um ding kuoma chun vate hring lai pahni le sidar thing le pat zai sen le husawp kau hung chawi dingin thu peng a tih.
5. Thiempu chun vate pakhat chu pil bela tui sung thar hlol chunga chun that dingin thu peng a ta.
6. Chu zoah, tui chunga vate thisena chun vate hring lai chu sidar thing le pat zai sen le husawp le chun thiempuin phum a ta,
7. phara inthoka inthiena um lu chunga chun voi sari theng a ta, a thienghlim thu puong a ta, vate hring chu ramah insuong a tih.
8. " 'Inthiena um ding chun a silfenhai sawp a ta, a sam vaw kol a ta, tui insil a ta, chuongchun hung inthieng tang a tih. Chu hnungah riebukah hung lut thei a ta, sienkhom a puon in tuolah ni sari a riek phot ding a nih.
9. A ni sarinaa chun a sam a vaw kol vong ding a nih: a lu vaw kol a ta, a khakhmul le a mitko hmul le a hmul dang po po khom a vaw nam rit ding a nih. A silfenhai sawp a ta, tuiin insil fai a ta, hung inthieng tang a tih.
10. " 'A ni riet ni chun beram chal tuoi pahni le beram la tuoi pakhat, kum khata upa, hmel hem lo le beiphit indip tak, kilogram thum, hrieka hmet le hriek litar hmun thuma thea hmun khat a hung chawi ding a nih.
11. Intuokna Puon in kota chun a'n thieng tah ti puongtu thiempu chun inthiena um ding le a thilhlanhai chu LALPA hmaah sieng a tih.
12. " 'Chu zoah thiempu chun beram chal tuoi pakhat le oliv hriek litar hmun thuma thea hmun khat chu suol thawina dingin inhlan a ta, then thilhlanin LALPA hmaa chun then a tih.
13. Pumraw inthawina le suol thawina thilhlan an thatna hmun thienghlima chun beram chal tuoi chu an that ding a nih. Suol thawina chu thiempu chanpuol a ni ang bokin bawsiet inthawina khom chu thiempu chanpuol a nih; thil thienghlim tak a ni si a.
14. Bawsiet inthawina thisen chu thiempu chun lang a ta, inthien ding chang tieng natila dam, kutpui le kepuia dam thiempu chun tat a tih.
15. Hriek no khata inthok chun thiempu chun hriek lang a ta, ama kutpha voi tienga chun sung a ta,
16. a kut chang tieng hmor chu a kutpha voi tienga hrieka chun phum a ta, hriek chu LALPA hmaah a kutpar chang tieng chun voi sari theng a ta,
17. a voi tieng kuta hriek la um chun inthien ding chang tieng natil, kutpui le kepuia bawsiet inthawina thisen chunga chun tat a tih.
18. Chun, thiempu chun a kuta hriek la um po chun inthien ding lu chu nal a ta, LALPA hmaah inremna siempek a tih.
19. " 'Chu zoah thiempu chun suolthawina chu inhlan a ta, a thienghlim nawna leia inthiena um ding ta ding chun inremna siempek a ta, pumraw thilhlan chu that a tih.
20. Pumraw thilhlan le bu le bal thilhlan chu maichama chun thiempuin inhlan a ta, inremna siempek a ta, hung inthieng tang a tih.
21. " 'A rethei leia chuong ang chu a thaw zo naw a ni chun, beram chal tuoi pakhat, bawsiet inthawina chu inremna siempekna dinga then inhlan dingin beiphit indip tak, kilogram khat, hriek le hmet pol le oliv hriek litar hmun thuma thea hmun khat chawi a ta,
22. vathu tuok khat amanih parva tuoi tuok khat amanih, a nei thei lem lem chawi bok a ta, pakhat chu suol thawina ding ning a ta, pakhat dang chu pumraw thilhlana ding ning a tih.
23. " 'A ni riet ni chun a inthienna thil ding chu thiempu kuomah Intuokna Puon in kotkhar bula chun LALPA hmaah a hung chawi ding a nih.
24. Thiempu chun bawsiet inthawina beramte chu hriek no khat leh lang a ta, then thilhlanah thiempu chun LALPA hmaah then a tih.
25. Bawsiet inthawinaa beramte chu that a ta, a thisen chu thiempuin lang a ta, inthien ding chang tieng natila dam, kutpui le kepuia dam chun tat a tih.
26. Hriek no khata inthok chun thiempu chun hriek lang a ta, ama kutpha voi tieng chun sung a ta,
27. a kut chang tieng hmor chu a kutpha voi tienga hrieka chun phum a ta, hriek chu LALPA hmaah a kutpar chang tieng chun voi sari theng a ta,
28. a voi tieng kuta hriek la um chu inthien ding chang tieng natil, kutpui le kepuia bawsiet inthawina thisen a nalna chunga chun tat a tih.
29. Chun, thiempu chun a kuta hriek la um po chun inthien ding lu chu nalin, LALPA hmaah inremna siempek a tih.
30. Chun, vathu amanih parva amanih a nei thei lem lem chu a'n hlan ding a nih.
31. Pakhat chu suol thawina ding ning a ta, pakhat dang chu pumraw thilhlana ding ning a ta, chu chu bu le bal thilhlan leh inhlanin, inthiena um ding chu thiempuin LALPA hmaah inremna siempek a tih.
32. Hi hi phar hri invoi inthienna dinga a tlin zo naw hai ta dinga dan chu a nih" tiin.
33. Chun, LALPA chun Mosie le Aron a biek a,
34. "Hluo dinga ka pek cheu Kanan ram in hluo hunah, chu rama chun inah hmuor hri inkai ol tak el ka sie a nih.
35. A in neitu chun thiempu kuomah fein, 'Ka inah phar hri ni awm tak ka hmu a' tiin hril raw se.
36. Hri en dinga thiempu a lut hmain in sunga thil ieng khom tirdakuma a puong sa nawna dingin in chu sukruok vong dingin thiempu chun thu peng a ta, an sukruok vong pha leh en fie dingin thiempu chu lut a tih.
37. Thiempu chun banga thil hmuor chu en dik a ta, a hmuorna hmun chu indep bik met a, a rong chu a hring amanih a sen deu a, a hri chun bang zutna thuo neka inthukah zung a thlak nia a hriet chun,
38. in chu thiempu chun suoksan a ta, ni sari sung in chu khar a tih.
39. Ni saria chun thiempu chun in chu hung en nawk a ta, thil hmuor chu bangah a'n zam dar a ni chun,
40. a hri bawmna lung bang chu invuok thlaktir a ta, lung chu khawhnawm hmun tirdakuma pei dingin thu peng a tih.
41. In sung tieng bang zutna po po chu in khok thlaktir vong a ta, an khok thlak po chu khawhnawm hmun tirdakumah inpeitir bok a tih.
42. Lung thar lang an ta, chuonghai chun thlak an ta, pil thar lang an ta, a puo chu zut an tih.
43. " 'Lung bang an lak hmang hnung le a thara an thlak hnung le a thara a bang an zut hnung khoma a hmuor a hung inlang nawk a ni chun,
44. thiempu chu fein en fel nawk a ta, thil hmuor chu inah a hung inzam dar nawk a ni chun phar hri tium a na, in chu tirdakum a nih.
45. A in chu thiek fai vong a, a lung, a thing le a charna po po chu khaw puo tieng lak suok a, hmun tirdakuma pei ding a nih.
46. " 'Tu khom chu in an khar sunga lut hrim hrim chu zan tieng chen tirdakum kai a tih.
47. Chu ina riek le bu fa taphotin an puonhai an sawp ding a nih.
48. " 'Amiruokchu, thiempuin a hung en nawk a, a bang zutnaah hmuor hri a hung inlang ta naw chun hmuor hri chu a bo tah tina a na, chu in chu a'n thieng tah ti thiempuin puong a tih.
49. Inthienna dingin vate hring lai pahni le sidar thing le pat zai sen le husawp kau a hung chawi ding a nih.
50. Thiempu chun vate pakhat chu pil bela tui sung thar hlol chunga chun that a ta.
51. Chu zoah, tui chunga vate a that thisena chun vate hring lai chu sidar thing le pat zai sen le husawp le chun thiempuin phum a ta, in chu voi sari theng a tih.
52. Vate thisen, tui thar, vate hring, sidar thing, husawp le pat sen lar chun in chu inthien a ta,
53. chu zoah vate hring chu khaw puo tieng ramah insuong a ta, chuong anga inremna a siempek hnung chun in chu hung inthieng tang a tih.
54. " 'Hienghai hi inkai thei phar hri chi tinreng le pupangliek chungchanga dam,
55. silfen le ina phar hri kai chungchanga dam,
56. thil invung, thil hmuor le thil puor chungchanga dam le
57. thil a porche le porche naw kawkhmuna dan chu a nih" tiin.
←  Leviticus (14/27)  →