←  Leviticus (11/27)  →
1. LALPA chun Mosie le Aron a biek a,
2. "Israel thlahai kuomah hieng hin hril ro: 'Khawmuola cheng sa po pohai laia in ta dinga fak thienghai chu hieng hi an nih:
3. Sa laia a ke tin inkak suok taphot le an thil fak inir suok, a soia soi chi taphot chu fa thei in tih.
4. Amiruokchu, a soia thil soi chi chauh amanih, ke tin inkak suok amani chauh an ni chun, chuonghai sa chu in fak ding a ni nawh. Sanghawngsei chun a soiin soi sienkhom a ke tin an kak naw leiin in ta dinga sa thieng lo a nih.
5. Sangawia chun a'n ir suok a soiin a soia chu a ke tin a'n kak naw leiin, in ta dinga sa thieng lo a nih.
6. Zupui chun a soiin a soi vea chu a tin a'n kak naw leiin in ta dinga sa thieng lo a nih.
7. Vok chu a tin a'n kak suoka chu a soia soi chi a ni naw leiin in ta dinga sa thieng lo a nih.
8. Hieng sahai hi an fak ding a ni naw a, a ruong khom an tawk ding a ni bok nawh, in ta dinga sa thieng lo an nih.
9. " 'Tuipui le vadung tuia chenghai laia pangpar nei le phuhlip nei taphot chu fa thei in tih.
10. Sienkhom tuipui le vadung tuia cheng pangpar le phuhlip nei lo thilhring hrim hrim, a'n hlieua inhlieu chi le tuia cheng thilhring dang tinrenghai chu in thangindei ding a nih.
11. In tirdak ding a na, a sa in fak ding a ni naw a, a ruong khom thil porcheah in ngai ding a nih.
12. Tuia cheng pangpar le phuhlip nei naw taphot chu in thangindei ding a nih.
13. " 'Hieng vatehai hi tirdakin an sa in fak ding a ni nawh: muvanlai dam, mupui dam, lungdup dam,
14. mu sen dam, mu dum dam, ngawihup chi hrim hrim;
15. va-ak chi hrim hrim dam;
16. va ngal sang chi dam, vabak dam, tuifinrieta cheng chi vate hai, mute chi hrim hrim dam,
17. hrangkir dam, simbu dam, chingpirinu dam,
18. tui vakawl dam, tuivalong dam, tuivaarngo dam,
19. kanghlai chi hrang hrang dam, vakhawhri dam le bak dam.
20. Thilhring ke pali nei, vuong thei hrim hrim chu in ta dingin thil tirdakum a nih.
21. Amiruokchu, ke palia lawn, vuong thei bok si thilhring, inchawm thei dinga an ke le mala inzomna nei chu fa thei in tih.
22. Chuonghai lai chun khau chi hrim hrim, khaunurieng chi hrim hrim, khuongbai le khauthikthi chi hrim hrim dam fa thei in tih.
23. Amiruokchu, thla nei, ke pali nei, a lawna lawn chi hrim hrim chu in ta dingin tirdakum a ni vong.
24. " 'Hienghai lei hin porcheah in insiem thei a, tu khom an ruong tawk taphot chu zan tieng chenin tirdakum kai a tih.
25. Tu khom hieng ang ruong inkhawmtu chun a silfenhai sawp a ta, zan tieng chenin tirdakum kai a tih.
26. " 'Ran tin inkak, sienkhom inkak suok zo si lo le thil a soia soi naw chi po po chu in ta dinga thil tirdakum vong a na, tu khom chuong ang tawk taphot chu a porche a nih.
27. Chun, ke pali nei laia mi ke bawra lawn taphot chu in ta dingin thil tirdakum a nih, tu khom chuong ang tawk taphot chu tirdakum kai an tih.
28. A ruong inkhawmtu taphotin an silfenhai an sawp ding a nih; zan tieng chen tirdakum kai an tih, in ta dinga thil tirdakum a ni si a.
29. " 'Chun, hnuoia bokvak chi po po laia in ta dinga thil tirdakumhai chu hieng hi a nih: bui dam, simtir dam, tangkawng chi hrim hrim dam,
30. sokkhe dam, laitang dam, cholru dam, hnapkawng dam le laiking chi hrang hrang.
31. Hienghai hi bokvaka fe chi, in ta dinga thil tirdakumhai chu an na, tu khomin a thi tah ruong an tawk chun zan tieng chenin tirdakum kai an tih.
32. A thi ruongin a tawk taphot hmangruo chu thing amanih, puon amanih, savun amanih le saiip puon amania siem khom ni sien, tirdakum kai a tih. A tawkna hmun chu tuiin sawp unla, zan tieng chen tirdakum kai a ta, chu zoah hung inthieng nawk a tih.
33. Pil belah a tla hlum chun a sunga thil um po po leh a sukporche vong leiin a bel chu vuok koi ding a nih.
34. Chuong ang tui chu bu le hme suongna tui amanih le dawn ding tui amani-ah a thang chun tirdakum a kai vong a nih.
35. Chuong ang thilhring thi a tlakna hmun taphot chu a sukporche leiin a tlakna thuk amanih bel amanih chu vuok koi ding a nih. Thil porche a ni leiin tirdakuma ngai ding a nih.
36. Amiruokchu tuikhur amanih, tui bel amanih chu a sukporche naw a, a ruong tawktu taphot ruok chu tirdakum kai an tih.
37. A thi ruong chu thlai chi thlak ding lai a lo tla palh chun sukporche naw nih.
38. Tuia thlai chi inchie hnunga a tla ruok chun thlai chia chun tirdakum kai a tih.
39. " 'In fak thei chi ran hrim hrim khom a pul a ni chun, a ruong tawk taphot chu zan tieng chen tirdakum kai a tih.
40. A sa fatu taphot chun a silfenhai sawp sien la, zan tieng chen tirdakum kai a tih. A ruong latu khomin a silfenhai a sawp ding a nih; zan tieng chen tirdakum kai a tih.
41. " 'Chun, hnuoi chunga a boka bokvak chi hrim hrim chu tirdakum an ni vong a, an sa fak lo ding a nih.
42. Intela intawl chi le ke palia invak chi amanih, ke tam tak nei chi amanih, hnuoi chunga a boka bokvak chi hrim hrim chu in fak ding a ni nawh, thil tirdakum a nih.
43. A boka bokvak chi hrim hrimin in insukporche ding a ni nawh. Chuong thil chu hmangin insukporche naw unla, hung sukporche bok naw raw se cheu.
44. Kei hi LALPA in Pathien chu ka ni si a; insukthienghlim unla, thienghlim takin um ro, kei ka thienghlim si a. Hnuoia invak chi ieng thil khomin insukporche naw ro.
45. In Pathien ni dinga Aigupta rama inthoka thuoi tungtu cheu LALPA chu ka ni si a; kei ka thienghlim leiin nangni khom in thienghlim ding a nih.
46. " 'Hieng hi sa le vate le thilhring tinreng tuia cheng chi le hnuoia a boka bokvak chi hai chungthua dan thu chu a nih.
47. A thienghlim le porche le thilhring fak chi le fak lo chi hai chu in thlier hrang ding a nih' tiin" a ta.
←  Leviticus (11/27)  →