←  Leviticus (10/27)  →

---

1.

Chun, Aron naupa Nadab le Abihu hai chun an mei lakna berbu chu chawiin meiling an lak a, chu taka chun rimtui an phul a, thupek ang naw zawngin LALPA hmaah mei thienghlim lo an inhlan a.

2.

Chuongchun, LALPA hmaa inthok chun meichok a hung suok a, anni chu a lem hmang a, LALPA hmaa chun an thi a.

3.

Mosie chun Aron kuomah, "LALPAN thu a hril khan hi hi a nih a hril:'A mi hung hnaituhai kuomah,Thienghlimin inlang ka ta;Mipui po po hmaa chun,Chawimawiin um ka tih'tiin" a ta. Aron chu a to tok tok a.

4.

Mosie chun Aron pate Uziel naupa Misael le Elzafan hai chu a ko a, an kuomah, "Hung hnai unla, in unauhai hi hmun thienghlim kota inthok hin khaw puo tieng zawn suok ro" a ta.

5.

Chuongchun an hung hnai a, Mosie thupek angin, an silfen pumin khawhnawm tieng an zawn suok a.

6.

Chun, Mosie chun Aron le a nauhai Eleazar le Ithamar kuomah, "In lu sukthurin, in silfenhai kei thler naw ro, chuonga in thaw vai chun thing in ta, mi po po chungah LALPA lung sen rawi a tih. LALPAN meia a sukhlumhai ruok chu in unauhai le Israel sungkuohaiin sun raw hai se.

7.

Intuokna Puon in hi suoksan hrim hrim naw ro, in suoksan chun thing in tih, LALPA hriek nal tasa in ni si a" a ta. Chuongchun, Mosie thu ang chun an thaw a.

8.

Chun, LALPAN Aron chu a biek a,

9.

"Nang le i nauhaiin Intuokna Puon ina in lutin uoiin le zu hrim hrim in dawn ding a ni nawh; in dawn chun thing in tih. Hi hi in thlahai pei ta ding khoma kumkhaw dan chu a nih.

10.

Thil thienghlim le thil naran le thil porche le thil inthieng in thlier hrang ding a nih.

11.

Mosie hmanga a puong Israelhai ta dinga LALPA thusuok po pohai kha in inchuktir ding a nih" a ta.

12.

Mosie chun Aron le a naupahai dama la um Eleazar le Ithamar kuoma chun, " LALPA ta dinga meia thilhlana mi, bu le bal thilhlana lak bang, chol thang loa siem chu maicham bula chun fa ro, thil thienghlim tak a ni si a.

13.

LALPA ta dinga meia thilhlana mi chu i chanpuol le i naupahai chanpuol a ni leiin hmun thienghlimah in fak ding a nih; chuong ang chun thu pek ka nih.

14.

Chun, a ir then le a chang tieng mal then chu nang le i naupahai le naunuhaiin hmun faiah in fak ding a nih, Israel thlahai inremna thilhlan inthawia inthoka i chanpuol le i naupahai chanpuola ruot a ni si a.

15.

A mal then le a ir then chu LALPA hmaa then thilhlana then dingin meia thilhlan thau leh an hung chawi ding a nih. Chu chu nang le i naupahai leh kumkhuoa in chanpuol ding a nih, LALPA thupek ang khan" a ta.

16.

Chun, Mosie chun suol thawinaa kel inhlan chu a zong a, an lo raw hmang ta der si leiin Aron naupa la dam Eleazar le Ithamar hai chunga chun a lung a sen a,

17.

"Ieng leia suol thawina chu hmun thienghlimah in fak naw am a na? Thil thienghlim tak, mipuihai thiem naw changna phur a, LALPA hmaa inremna siempekna dinga a pek cheu a ni si a.

18.

A thisen chu Hmun Thienghlima lak lut a ni naw leiin, thu ka pek ta cheu ang khan, kel sa chu hmun thienghlima chun in fak ngei ngei ding annawm" a ta.

19.

Aron chun Mosie kuomah, "Voisun khan an suol inthawina le pumraw inthawina LALPA kuomah an inhlan a, chuong sa hman chun hieng ang thil hi ka chungah a tlung a. Voisuna suol thawina sa hi lo fa ta lang lem chu, ka chungah LALPA a lawm ding am a ni?" a ta.

20.

Mosien chu chu a hrietin a lung a awi ta a.

---

←  Leviticus (10/27)  →