←  Judges (9/21)  →
1. Jerub-Baal naupa Abimelek chu Sekem khuoa a nu tahai kuomah a fe a, a puhai sungkuo po po kuomah chun,
2. "Sekem mihai kuomah, 'Jerub-Baal nauhai po po mi sawmsarihaiin in chunga ro an rel am tha in ti lem an naw leh mi pakhat chauin?' ti indon ro. Kei hi in thisen inzompui ka nih ti hre zing bok ro" a ta.
3. A nu tahai chun Sekem khuoa mi po po hrietah chuong thu chu an hril a, "Ama hi kan unaupa a nih" an ti lei chun Abimelek chu zui nuomna lungril an hung put ta a.
4. Baal-Berit tempula inthokin tangka shekel sawmsari an pek a, chu chun mi hmangna bo le tawrot tak tak a ruoi a, chuonghai chun a hnung an zui a.
5. Chun, Ofra khuoa a pa inah a fe a, Jerub-Baal nauhai, ama unauhai ngei sawmsari chu lung pakhat chungah a that vong a. An mi tlum tak Jotham ruok chu a lo inbi hmang leiin a him a.
6. Chuongchun, Sekem khuo le Beth Milo khuoa mi po po chu Sekem lungphun bula saisuo thing lien hnuoia chun an hung a, Abimelek chu lalah an siem a.
7. Chu thu Jothamin a lo hriet chun Gerizim tlang sipah a hang ngir a, rawl inring taka khekin, "Nangni Sekem khuoa mihai, ka thu hi ngaithla unla, Pathienin nangni thu khom ngaithlang a tih.
8. Voi khat chu lal thlang tumin thing po po an pung khawm a. Oliv thing kuoma chun, 'Kan lalah nang thang rawh' an ta.
9. Oliv thing chun, 'Pathien le mihriemhai ka chawimawi thei phana tak ka thau hi suoksanin thing chunga lalah ka um ding maw?" a lo tipek a.
10. Thinghai chun theichang kuomah, 'An leh, nang hung la, kan lalah hung thang el rawh' an ta.
11. Theichang chun, 'Ka ra thlum tak le inhnik tak hi suoksanin thing chunga lalah ka um ding maw?" a lo ti pek nawk a.
12. Thinghai chun grep kung kuomah, 'Chuong an leh nang hung la, kan lalah hung thang el rawh' an ta.
13. Grep kung chun, 'Pathienhai le mihriemhai suklawmtu ka uoiin hi suoksanin thing chunga lalah ka thang ding maw?' a lo tipek nawk pei a.
14. A tawpah thinghai chun hling kuomah, 'Hung la, kan lalah hung thang el rawh' an ta.
15. Hling chun, 'Lala hriek nal in mi nuom takzet chun ka buk hnuoia hin hung ro, in ni naw ruok chun ka buk hlinga inthokin mei hung suok a ta, chu chun Lebanon sidar thing chen khom kang fai vong a tih' a ta.
16. "Tu hin ka thu hi ngaithla ro. Lal dinga Abimelek in thlang khan indik tak le ti tak zeta in thaw a ni? In chunga Gideon-in a thawpek cheu ang phuin, ama hriet zingna le inzana dingin a naupa Jerub-Baal le a sungkuohai chungah ieng am in thaw ve a?
17. Midianhai kuta inthoka san suok ding cheuin ka pa khan a hringna chan huomin in ta dingin a lo bei a nih ti hre zing ro.
18. Voisun ruok hin chu ka pa sungkuohai chungah helin, lungphek pakhat chungah a nau pasal sawmsarihai chu that sienkhom, in unaupa a ni lei ringotin a bawinu naupa Abimelek chu Sekem khaw mihai chunga lalah in lo siem ta hi.
19. Tuta Gideon le a sungkuohai chunga in thaw hi indik tak le titakzeta in thaw a ni chun, Abimelek chunga hin in lung awi sien, ama khom nangni chungah a lung awi raw se.
20. Chuong chu a ni si naw chun, Abimeleka inthoka mei suok chun Sekem le Bet Milo mihai po po hi kang hmang sien, chu chu a ni si naw leh Sekem le Bet Milo mihaia inthoka mei suok chun Abimelek chu kang hmang ve thung raw se" a ta.
21. Jotham chun a unaupa Abimelek chu a ti leiin Beer-ah a tlan a, chu taka chun a um ta zing a.
22. Abimelek chu Israelhai chungah kum thum a'n lal a.
23. Pathienin Abimelek le Sekem khaw mihai inkarah thlarau suol a'n tlaktir a, a khaw mihai chu Abimelek chungah dawhain an che a.
24. Jerub-Baal nauhai sawmsari rawng taka Abimelekin a that leia a chunga le a unauhai that dinga a kut lo sukhrattu Sekem khaw mihai chungah phuba lak a ni theina dinga chuong thilhai chu Pathienin a thaw a nih.
25. Chuongchun, ama khingtu Sekem khaw mihai chun mi a hung taphot lambuna lo suomtu dingin tlang sipa chun mi an sie a, chu thu chu Abimelek kuomah an hril a.
26. Ebed naupa Gaal chu a unauhai leh an hung inthok a, Sekem khuoah an lut a, Sekem khaw mihai chun an lo inhnempui hle a.
27. Chun, grep huonah an fe a, an lo a, an chil a, an pathien tempula chun kut an hmang a.
28. Faa an dawn lai chun Ebed naupa Gaal chun, "Tu am a na Abimelek in ti chu? Sekem khom chu tu am a na, chuonga a hnuoia ei hang kun el ding chu? Jerub-Baal naupa an naw maw? Zebul hi a kaiza vengtu a ni naw am a ni? Sekem pa Hamor mihai rong bawl lem ro. Ieng leiin am Abimelek rong chu ei bawl ding?
29. Hieng mihai hi ka thu hnuoia um ni hai sien chu aw, Abimelek kuomah, 'I sipai po po leh hung inthok rawh' ting ka ta, ka lo intlawm vong el ding a ni si a" a ta.
30. A khaw roreltua um Zebul-in Ebed naupa Gaal thu hril a lo hriet chun a lung a sen hle a.
31. Arukin Abimelek kuomah mi a tir a, "Ebed naupa Gaal le a unauhai chu Sekemah an hung a, a khaw mihai i laka helpui tumin an infuipor a nih.
32. Chuleiin, i mihai leh a zan a zanin hung unla, phulah lo inchan ro.
33. Zing tieng nisa suok charin khuo chu hung bei unla, Gaal le a mihaiin do ding chea an hung suok pha leh i nuom ang angin lo thaw tawl rawh" tiin thu a'n cha a.
34. Chuongchun, Abimelek le a sipai po po chu a zan a zanin an hung inthok a, pawl lia inthein Sekema chun arukin thanghmun an khaw a.
35. An lo inchan rukna hmuna inthoka Abimelek le a sipaihai an hung suok lai tak chun Ebed naupa Gaal chu a fe suok a, khawpui lutna kotpuia chun a ngir a.
36. Gaal-in anni rawi a hmu chun Zebul kuomah, "En ta, tlang sipa inthokin mipui an hung chim thla a ni saw" a ta. Zebul chun, "Tlang hlim saw mihriem i sawn mei mei a ni chu" a ta.
37. Gaal chun, "En hman rawh, ram lailung taka inthokin mipui an hung suok saw! Pawl khat lem chu ai en thiem ruol, saisuo bul tienga inthokin an hung saw" a ta.
38. Zebul chun a kuomah, "Kha hmaa, 'Tu'm a na Abimelek, a rong kan bawl ding chu?' tia i'n hrosa pung pung kha iem umzie a nei a? Hienghai hi nuizat bura i hmanghai kha an ni naw am a ni? Suok la, va'n beipui tawl raw leh" a ta.
39. Chuongchun, Gaal chun Sekem mipuihai chu a ko suok a, Abimelek le chun an inbei ta a.
40. Abimelek chun Gaal chu khawpui kot bul chen chun a hung hnot a, mi tam tak hliemin an tlu a.
41. Abimelek chu Aruma khuoah a'n kul a, Zebul chun Gaal le a unauhai chu Sekema inthok chun a hnot suok a.
42. A zinga chun Sekem mipui chu phulah an fe a, chu thu chu Abimelek an hril a.
43. A mihai a thuoi a, pawl thumin a the a, phula chun arukin a'n chantir a. Mipui an hung suok a hmu chun an lo bei a.
44. Abimelek le a pawlhai chu a hmatawnga thangin khawpui lutna kotpui chen chun an hung hnot a, pawl hni danghai chun phula hunghai chu an lo bei a, an lo that tawl a.
45. Abimelekin khawpui chu sunnithlakin a bei a, a lak a, a sunga mihai chu a that a, khawpui chu a suksiet vong a, chi a phulkhum a.
46. Sekem kula um po poin chu thu an lo hriet chun El-Berit tempula kulbingah an tlan lut vong a.
47. Chu taka chun an inbeng khawm ti Abimelekin a lo hriet a.
48. Chuongchun, a mihai le chun Zalmon tlang a kai a, hrei a chawi a, thing kau a sat thlak a, a put a. A mihai kuoma chun, "Inhmaw ro, ka thaw ang hin thing kau sat unla, put seng ro" a ta.
49. A mihai po po chun thingkau an sat thlak a, an put seng a, a hnung chu an zui a, kulbing vela chun an thing kau put chu an bum khawm a, an raw a, Sekem kula um po po chu an raw hlum a, nuhmei le pasal an rengin sang khat lai an nih.
50. Chu zoah Abimelek chu Thebez khuoah a fe a, a'n huol a, a lak a.
51. A khaw sunga chun kulbing a um a, chu taka chun a khaw mi po po, a nuhmei a pasalin, an tlan lut a, kot an inkal khum a, kulbing sanga chun an lawn kai a.
52. Abimelek chun kulbing sang chu a hang bei a.
53. Kulbing chu raw dinga a kotpui tieng a pan lai chun nuhmei pakhatin a lu chungah bu rawtna lung a zuk thlak a, a lu a deng koi a.
54. Ralthuom chawitu tlangval chu a ko nghal a, "I kawlhnam kha phawi la, mi sun hlum rawh, 'Nuhmeiin a that a nih' an mi ti nawna dingin" tiin thu a pek a. Tlangval chun a sun tlang pop a, a thi ta a.
55. Israelhaiin Abimelek a thi tah ti an hmu chun mani in tieng an kir ta seng a.
56. Abimelekin a unauhai sawmsari thata a pa chungah ritlona a'n suona lakah chuong ang chun Pathienin a thungrul a nih.
57. Sekem mihai khom an ritlona po po leiin Pathienin a thungrul a, Jerub-Baal naupa Jotham tongsie inphur chu an chungah a hung tla tah a nih.
←  Judges (9/21)  →