←  Judges (8/21)  →
1. Chun, Efraim-hai chun Gideon kuomah, "Iengtiziea hienga hi i mi thaw am a na? Midianhai i do ding khan ieng dinga i mi ko ve naw am a na?" an ta, an suosal nasa hle a.
2. Ama chun, "Nangni thilthaw le hrilkhi chun ka thilthaw ve hi ieng khom a ni nawh. Abiezar-hai grep hmin lo lai nekin Efraim-hai grep lo hmai chu a tha lem dai an naw maw?
3. LALPA chun Midianhai lal Oreb le Zeeb hai chu in kutah a'n hlan a. Nangni leh iem tekhi tlak ka nih?" a ta. Chu phing leh an lungsen chu a re tah a.
4. Gideon le a kuoma mi za thumhai chun Jordan vadung an zuk tlung a, an kan a, chau ta hle hai sienkhom Midianhai chu an hnot pei a.
5. Sukot khuoa mihai kuoma chun, "Ka sipaihai lunginsiet takin beiper pe ro khai. An chau ta hlea chu Midianhai lal Zeba le Zalmuna hai chu ka la hnotpui pei tum si a" a ta.
6. Sukota khaw hotuhai ruok chun, "Zeba le Zalmuna hai chu i kuta um an ni ta'm a ni? Ieng leiin am i sipaihai chu bei kan pek ding?" an ta.
7. Gideon chun, "Aw leh, chu lei tak chun, LALPAN Zeba le Zalmuna hai ka kuta a mi pek pha chu thlaler hling le dai hlinghai chun in taksa la sun thler neng nung ka tih" a ta.
8. Chu taka inthok chun Peniel-ah a hang fe a, a hni ngai bok chu a hang hni a, sienkhom Sukot mihai ang bokin an lo don a.
9. Chuongchun, Penielhai kuoma chun, "Hnena changa ka hung kir nawk pha leh hi kul hi hung sukchim ka tih" tiin a hril bok a.
10. Zeba le Zalmuna chu Karkor-ah an sipai singkhat le sangnga leh an inkul a, chuonghai chu khaw sak sipai hunghai laia la dam um sun chu an nih, kawlhnam chawi mi nuoi khat le sing hni chu an thi ta si a.
11. Noba le Jogbeha sak tienga um ran vengtuhai hraw hlak lam hluia chun fein, Gideon chun inring lawk der loa lo um sipaihai chu a hang bei thut a.
12. Midianhai lal pahnih, Zeba le Zalmuna hai chu an tlansie a, sienkhom a hnot a, a man ve ve a, an sipaihai po po chu a tukdol vong a.
13. Joas naupa Gideon chu indonaa inthok chun Heres kawnah a hung kir thla a.
14. Sukot mi tlangval pakhat chu a man a, thu an don a, Sukot khuoa an hotuhai le upahai hming chu an ziektir vong a, an rengin sawmsari le pasari an nih.
15. Chun, Sukot mihai kuoma chun a hang fe a, "Zeba le Zalmuna hi en ta u, hieng mihai hi annawm, 'Zeba le Zalmuna hai i kuta um ta ang ziezanga i mi chauhai beiper kan hang pekna san ding kan hriet nawh!' tia in mi ti-elna hai kha!" a ta.
16. A khaw upahai chu a man a, Sukot mihai mithmuah thlaler hling le dai hlingin a hrem a.
17. Chun, Peniel khaw kul chu a sukchim a, a khaw mihai chu a that a.
18. Gideon chun Zeba le Zalmuna kuomah, "Tabor tlanga in mi thathai kha mi ieng ang mi am an ni a?" tiin a'n don a. Anni chun, "Nangma ang char, lal nau hmel put vong an nih" an ta.
19. Gideon chun, "Khanghai kha ka unauhai, ka nu sula inthoka pieng ve ngei an ni kha. An hringna lo hla chu ni unla, LALPA hring zing hmingin, in hringna ka hla ve awm vei leh!" a ta.
20. A nau upa tak Jether kuoma chun, "That tawl raw leh" a ta. Jether chu naupang a la ni leiin a ti a, a kawlhnam a phawi ngam naw a.
21. Zeba le Zalmuna chun, "Nang kha hung la, mi hung that ta la; pa le pa chu ei inbei ding annawm" an ta. Gideon chu a tho a, Zeba le Zalmuna chu a that a, an sanghawngsei nghawngor khom a lakpek a.
22. Chuongchun, mihai chun Gideon kuomah, "Midianhai lakah i mi san suok leiin kan chungah nangin ro rel ta rawh, i nauhai le i tuhai chen khom roreltuah um raw hai se" an ta.
23. Gideon ruok chun, "In chungah ro rel naw ning, ka nauhai khomin rel naw ni hai; LALPAN in chungah ro rel lem a tih" a ta.
24. Gideon bokin an kuomah, "Thil pakhat ruok chu hni cheu ka nuom: mi tinin in rallak nabe mi pe seng ro" a ta. (Ismael thlahai chun rangkachak nabe be an ching hrim a nih.)
25. Anni chun, "Pe mol kan ti che" an ta, puon an pha a, mi tinin an rallak nabe chu an deng khawm ta seng a.
26. Rangkachak nabe a hni an pek khawm po po rikzie chu kilogram sawmhni vang a na, chu taka chun Midian lalhaiin incheina man tam an be le or hai, khaidiet an hli hai, puon senduk an silhai, sanghawngsei ringa an inortirhai chu tiem sa lo a nih.
27. Chuong rangkachaka inthok chun Gideon-in thiempu zakuo Efod a siem a, a umna khuo Ofra-ah a sie a, chu chu Israel mihai chun an biek a, an Pathien lakah uire phanain an hmang a, Gideon le a sungkuohai ta dinga chang a hung inchang ta a.
28. Chuong ang chun Midianhai chu Israel thlahai hmaah tukdolin an um a, an lu an ling nawk thei ta ngai nawh. Gideon dam sung chun ram chu kum sawm li sung ralmuongin a um a.
29. Chun, Joas naupa Gideon chu a ina um dingin a kir nawk a.
30. Nuhmei a hau leiin nau pasal khom sawmsari a nei a.
31. A hmei, Sekema um khomin nau pasal a nei a, a hming chu Abimelek a nih.
32. Joas naupa Gideon chu tar kuna damin a thi a, chuongchun Abiezar mihai khuo Ofra-a chun a pa Joas thlanah an phum ve ta a.
33. Gideon a thi charin Israel thlahai chu Baal lakah uirein, Baal-Berit chu pathienah an biek el ta a.
34. Israel thlahai chun sir tina um an hmelmahai po po laka san suoktu LALPA an Pathien chu an hriet zui ta naw a,
35. Israelhai ta dinga theitawp suoa thil tha po po thawtu Jerub-Baal sungkuohai chunga khom ngilneina an insuo zui chuong tah bok nawh.
←  Judges (8/21)  →