←  Judges (7/21)  →
1. Zingkar chun Jerub-Baal (chu chu Gideon) le a mihai chu Harod tuikhur bula chun an inkul a. Midianhai chu an umnaa inthoka hmar tieng ruom More tlang thuta chun an inkul ve a.
2. LALPA chun Gideon kuomah, "I kuta Midianhai ka pek ding che a ni si chun mi i hau taluo. Chuong naw chun Israelhaiin, 'Keini kut ngeia insandam kan nih' mi tikhum hlauh rawi an tih.
3. Chuleiin, mipuihai hriet ngeiah, 'Tu khom ti le inthin taphot chu Gilead tlanga inthok hin kir nawk raw hai se' tiin puong rawh" a ta. Chuongchun, mi sing hni le sang hnih an kir a, sing khat an la um a.
4. Sienkhom, LALPA chun Gideon kuomah, "Mi an la tam taluo rop. Vadungah thuoi thla vong la, keiin thlierpek ka ti che. Keiin, i kuoma hung ding ka ti po hung an ta, hung lo ding ka ti po kir nawk raw se" a ta.
5. Gideon chun a mihai chu vadungah a thuoi thlak a. Chu taka chun LALPAN, ui anga leia tui a lieka liek taphot chu sie hran la; kuna thingthia tui dit taphot hai chu sie hrang bok rawh" a ta.
6. Kut phaa mi tui a lieka liek mi zathum an um a, mi dang po chu kuna thingthia tui dit vong an nih.
7. Chuongchun, LALPAN Gideon kuomah, "Mi zathum, kuta tui luoka liekhai po kha hmangin ka sandam ding cheu a na, Midianhai hi i kutah ka pek ding a nih. Mi dang po po chu an in tieng inkirtir nawk vong rawh" a ta.
8. Gideon chun Israel mi zathum ti chauh naw chu an in tieng a tirkir vong a, tawtawrawt le fak ding an chawihai ruok chu mi zathum chun an kol a. Midianhai chu an hnuoi ruoma chun an inkul a.
9. Chu zan chun LALPAN Gideon kuomah, "Tho la, an inkulna hmunah tum thla rawh, anni chu i kutah ka pek ding a nih.
10. Amiruokchu, zu fe i ti chun i siehlaw Pura le hin an inkulnaa chun zu fe phot unla;
11. chuongchun an thu hril hrieng i ta, chu chun i kut sukhrat a ta, an inkulna chu zu bei ngam nghal i tih" a ta. Chuongchun, a siehlaw Pura le chun an inkulna tontira ral venghai umna chu an zuk tlung a.
12. Midian hai, Amalek hai le khaw sak mihai chu ruoma chun khau intam ang topin an lo um khup el a, an sanghawngsei ringot khom tiem seng lo tuipui kama tieu anga tam an nih.
13. Gideon a zuk tlung lai chun mi pakhat hin a ruolpa chu a mang a lo hril a: "Ngai ta, mang ka lo nei a, barli bei tlang hi Midianhai kula hin a hung inhlum thla a, puon inah a'n hlum lut a, a del chim a, a del per vong el a" a ta.
14. A ruolpa chun, "Chu chu Israel mi Joas naupa Gideon kawlhnam naw chu thil dang ni naw nih. Pathienin Midianhai le an sipaihai po po hi a kutah a pek tah a ni chuh" a ta.
15. Mang le a hrilfiena thu Gideon-in a hriet chun Pathien a chawibiek a. Israelhai inkulna hmun tieng chun a kir nawk a, "Tho ro le khai, LALPAN Midian sipaihai chu in kutah a pek tah a nih" a ta.
16. Chuongchun, mi za thum chu pawl thumin a siem a, an reng chun tawtawrawt le bel ruok, a sunga meiser sie sa chu a pek seng a.
17. Ama chun an kuomah, "Mi en unla, ka thaw ang ang hin in thaw ve pei ding a nih. Kul hmatawng tak ka tlung pha leh, ka thaw ang angin hung thaw seng ro.
18. Kei le ka kuoma um po poin tawtawrawt kan mut pha leh, kil tina inthok khomin tawtawrawt lo mut ve unla, 'LALPA ta ding le Gideon ta dingin' tiin khek seng ro" a ta.
19. Gideon le a kuoma um mi zahai chun zan ril hma thet, diuti an inthlak zo charin an kul tlang chu an tlung a, an tawtawrawt chu an mut a, an bel chawi chu an vuok koi a.
20. An pawl danghai khom chun tawtawrawt an mut a, an bel chawi chu an vuok koi a, voi tiengin meiser an chawi a, chang tiengin tawtawrawt an chawi a, "LALPA le Gideon kawlhnam" tiin an khek dur dur a.
21. Hmelmahai buk huol tuok chun mani hmun sengah an ngir a, Midianhai chu thlabara khekin an tlansie hum hum a.
22. Tawtawrawt za thum chu an hang mut tuor tuor a, kul sunga umhai chu LALPAN anni le anni kawlhnamin a'n sattir a. Sipaihai chu Zerera tieng Bet-Sita chena tlan an um a, Tabat bula Abel Mehola ramri chen tlan tlung an um bok a.
23. Israel thla Naftali hai, Asera hai le Manase hai chu an biel senga inthok chun Midianhai hnot dingin an hung pung khawm a.
24. Gideon chun Efraim tlang ram po poah, "Hung thla unla, Midianhai hi hung bei unla, Jordan vadung le Beth-bara va dung an kan ding lo inchan ro" tiin thu a thon a, mi a'n tlantir a. Chuongchun, Efraimhai chu an hung pung khawm a, Bet-Bara chenin Jordan vadung suka an lo inchan a.
25. Midian lal pahnih, Oreb le Zeeb chu an man a, Oreb chu Oreb lung hmunah an that a, Zeeb chu Zeeb grep sawrna khurah an that bok a. Midianhai chu an hnot a, Oreb le Zeeb lu an lak chu Jordan vadung rala um Gideon kuoma chun an hung chawi a.
←  Judges (7/21)  →