←  Judges (6/21)  →
1. Chuongchun, Israel thlahai chun LALPA mithmuah thil suol an lo thaw nawk ta a, LALPA chun Midianhai kutah kum sari a pek suok a.
2. Midianhaiin an suknomnat nasa em leiin Israelhai chun tlang kak kara hai, puka hai le kula hai chun hmun an khuor a.
3. Israelhaiin thlai an ching charin Midianhai amanih, Amalekhai amanih le sak tieng mi tuhai amaniin an hung run zie a.
4. An rama chun an inkul a, Gaza chenin an thlaihai an suksiet a, Israel rama thil to reng reng le an beram hai, bawng hai le sabengtung hai chenin hla hrim an nei nawh.
5. An ran ruol le puon inhai leh khau hon ang elin an hung phul a, anni le an sanghawngseihai chu tiem seng ruol khom an ni nawh; a ram chu sukram dingin an hung run hlak a nih.
6. Chuonga Midianhaiin an sukrethei em leiin Israelhai chun thangpuitu dingin LALPA an ko a.
7. Midianhai leia Israelhaiin LALPA an ko nawk chun an kuomah zawlnei a hung tir a.
8. Zawlnei chun, "LALPA, Israelhai Pathien chun hieng hin a tih: 'Aigupta bawia inthokin ka thuoi suok cheu a,
9. Aiguptahai kuta inthok hnuk thlain, a neksawrtu cheu po po kuta inthoka san suokin, anni chu in hmaah ka hnot suok a, an ram ka pek cheu a.
10. 'Kei hi LALPA in Pathien chu ka na, hieng in umna ram neitu Amor mihai pathien hi be naw ro' ka ti a, sienkhom ka thu in pom si nawh' a tih" tiin a hril a.
11. Chun, LALPA vantirko chu Ofra khuoah a fe a, Abiezar mi, Joasa saisuo thing bula chun a thung a, Joasa naupa Gideon chun Midianhai hmu thei lo dingin grep sawrna khura chun bu a lo chil a.
12. LALPA vantirko chu a kuomah a hung inlar a, "Nang mi hrat le huoisen, LALPA chu i kuomah a um" a ta.
13. Gideon chun, "Aw pu, LALPA kan kuomah a um si chun, iengtiziea hienga kan chunga thil a tlung si am a na? Kan thlatuhai khan LALPAN Aiguptaa inthokin a mi thuoi suok thu an hril changa a thil mak thaw an mi hril zozaihai kha khaw lam iem a chang zo an ta a? Tu hin chu LALPAN a mi nghatsan der ta a, Midianhai kutah a mi pek an ta hi" a ta.
14. LALPA chu ama tieng a hung ngha a, a kuomah, "I hratna hin fe la, Israelhai chu Midianhai kuta inthokin va san suok rawh. Ka tir che an naw maw?" a ta.
15. Gideon chun, "Ieng tin am Israelhai chu sandam thei telul ka ta? Kan sungkuo hi Manase thlahai lai khom a che thei naw tak kan ni a, kei hlak hi ka unauhai laia a chin tak ka ni nawk bok si" a ta.
16. LALPA chun, "I kuomah ka um ding annawm; Midianhai chu a ruolin hem thlu vong i tih" a ta.
17. Gideon chun, "I mit ka tlung ta rau rau si hin chu, a mi betu hi nang ngei i nih ti hrietna ding inchikna mi pe rawh.
18. I hmaa ka thil inhlan ding chawia ka hung kir hma khat chu hi taka hin lunginsiet takin mi lo la umpek zing rawh" a ta. LALPA chun, "I hung kir nawk hma khat chu lo nghak ka ti che" a ta.
19. Gideon chu inah a lut a, kel te le beiphit kilogram sawm, chol thang loin a hung buotsai a. A sa chu leipupah a sie a, sa tui hang chu bela hung chawiin, saisuo thing hnuoia chun a hung inhlan a.
20. Vantirko chun a kuomah, "Sa le chol thang lo bei kha la la, hi lung chunga hin sie la, a tui hang ruok kha chu bun thla rawh" a ta.
21. Chuong ang chun a thaw a. LALPA vantirko chun a hmol chawi lai hmorin sa le chol thang lo bei chu a hang tawk a, lunga inthok chun mei a hung suok a, sa le chol thang lo bei chu a kang ral ta vong a. Chun, LALPA vantirko chu a bo ta dai a.
22. LALPA vantirko a nih ti Gideon-in a hung hriet chun, "Aw, LALPA Chunghnungtak, hlak chu hmaisana ngei LALPA vantirko ka hmu a lo ni zinga!" a ta.
23. LALPA chun a kuomah, "Thlamuong takin um rawh. Ti naw rawh; thi naw ti nih" a ta.
24. Chu hmuna chun Gideon-in LALPA ta dingin maicham a siem a, Jehova Shalom a'n buk a, chu chu tu chen hin Abiezar mihai khuo Ofra-ah a la um zing.
25. Chu zan vek chun LALPAN a kuomah, "I pa bawngchal le bawngchal dang kum sari mi chu kei la, i pa Baal maicham sukchim vong la, a sira Asera lem thing hi phur thlu bok rawh.
26. Hi hmun sanga hin LALPA i Pathien ta dingin maicham nghet tak indin la, Asera lem thing i phur thluk kha hmangin bawngchal pahnina chu pumraw thilhlanah inhlan rawh" a ta.
27. Gideon chun a siehlaw sawm thuoiin LALPAN a hril ang tak chun a thaw a. A sunghai le a khaw mihai chu a ti leiin suna nekin zanah a thaw lem a.
28. A khaw mihai zing tieng an hung tho chun, Baal maicham chu sukchimin a lo um a, a bula Asera lem thing khom phur thlukin a um bok a, maicham bawl thar hlol chunga chun bawngchal pahnina chu inhlanin an hmu a.
29. "Tu thaw tak am an ta ding maw?" an inti sup sup a. Fimkhur taka an hang dap vel hnung chun, "Joas naupa Gideon thaw a lo ni zing annawm!" an ti ta a.
30. A khaw mihai chun Joas kuomah, "I naupa hung thuoi suok rawh. Baal maicham a sukchim a, a bula Asera lem thing a phur thluk leiin a thi ngei ding a nih" an ta.
31. Joas chun ama hung khingtuhai po po kuoma chun, "Baal chu in tan ding a ni maw? Ama chu in hum tum a ni? Tu khom a tantu taphot chu zing tieng la la hin sukhlum ding a nih. Baal chu pathien a ni takzet chun, a maicham sukchimtu chu aman khing raw se" a ta.
32. Baal-in khing raw se' a ti leiin chu ni chun Gideon hming lemah 'Jerub-Baal' tiin an inbuk a, Baal maicham a suksiet leiin.
33. Chun, Midian hai, Amalek hai le khaw sak tieng mihai chu thangruolin Jordan an hung kan a, Jezreel phairuomah an inkul a.
34. LALPA Thlarau chu Gideon chungah a hung tlung a, a hnung zuitu ding Abiezar mihai ko khawmna dingin tawtawrawt a hang mut a.
35. Manase-hai kuomah mi an intlantir a, anni khom chun an hung pan khawm a. Aser-hai, Zebulun-hai le Naftali-hai khom a'n cha khawm a, anni khomin an hung fin a.
36. Gideon chun Pathien kuomah, "I hril tah anga ka kuta Israelhai hi i sandam ding a ni chun,
37. ngai ta, hrizawlah beram hmul sieng ka ta, beram hmula chun daidaw a lo um a, a vela hnuoi po po chu a hul vong si chun, i hril angin, keima kut hmangin Israelhai hi i sandam ding a nih ti hre thei ka tih" a ta.
38. Chuong ang chun a lo um ngei a, zingkar inhma takin a tho a, beram hmul a hang sawr chun tui no khat zet a sawr suok el ta a.
39. Chun, Gideon chun Pathien kuomah, "Ka chungah lungsen naw rawh. Voi khat bek hang hril nawk ka tih. Lunginsiet takin voi khat chau bek beram hmulin mi la'n fietir nawk rawh. Tuta tum hin chu beram hmul chauh hul sien, hnuoi chu daidawin hu dup thung raw se" a ta.
40. Chuong ang tak chun Pathienin chu zan chun a hung thaw a, beram hmul chauh chu a lo hul a, hnuoi chung chu daidawin a hu dup ta thung a.
←  Judges (6/21)  →