←  Judges (5/21)  →
1. Chuongchun, chu ni chun Debora le Abinoam naupa Barak chun hi hla hi an sak a:
2. "LALPA chu inpakin um raw se!Israel hotuhaiin hma an thuoi a,Inhawk takin mipuiin an zui.
3. "Lalhai, lo ngaithla unla,Hotuhai, in na lo sit ro;LALPA chu zaiin chawi ka ta,LALPA, Israel Pathien kuomah,Rimawi ka rem ding a nih.
4. "Aw LALPA, Seir tlang pel a,Edoma inthok i hung suok ni khan,Hnuoi chu inthinin, van a te a,Sumin ruo an surtir chur chur.
5. Sinaia khan LALPA hmaah,Tlanghai chu an inthin dur dur, LALPA, Israel Pathien hmaah.
6. "Anat naupa Samgar dam laiin,Jael dam lai ni ngeia chun,Lamlienhai chu rausana umin,Khuolzinhan lam kawi an hraw.
7. Israel rama khuohai chu,Hluo loin an ram zo a,An ram zo, an ram zo ie,Kei Debora ka chet hma chun,Kei Israel ram nu ngei hi,Ka hung chet ve hma khat chu.
8. Pathien dang an biek charin,Kotsuoah ralin an hung nang.Israel mi sang sawmli lai,Fei le phaw chawi an um nawh.
9. Israel thuoiituhai ka lainat ngei,Tlawmngaia zuituhai khom chu:LALPA chu inpakin um raw se.
10. "Sabengtung var chunga chuong,Thungna innema inthunghai le,Nangni kea lawn pawl khomin,
11. Thal kaptuhai ri hriet phak lona,Tuikhura an zaihla sak ri chu,In rengin lo ngaithla ro khai:LALPA thil fel thaw thu inzawtin,Israel rama LALPA mi huoisenhan,Hnena an chang thu an hril a ni chu!"Chuongchun LALPA mipuihai chu,Kotsuoah inhawr khawmin,
12. "Debora har rawh, har rawh!Zai hla remin hma thuoi rawh;Aw nang Barak, Abinoam naupa,Hung thoin hma hung thuoi la,Manhai chu salah thuoi rawh"Tiin an khek dur dur a.
13. "Mi dang la um pohai chu,An thuoituhai leh an hung thla,Mi hrat tak mi beipui dingin,LALPA mihai an hung chim thla.
14. Amalek zungzamhai chu,Efraim-a inthokin an hung a,Benjamin mihan an hung zui. Makir-a inthokin hotuhai an hung,Zebulun-a inthokin ziektuhai.
15. Isakar hotuhan Debora an zui,Isakar a hung, Barak khom a hung,Varuomah an zui thla pei."Reuben khawzawla ruok chu,Lung awp inkaiin an um.
16. Ieng dinga ramriekhai lai,Ran chingtuhai rawl ringot,Ngaithla dinga in um am?A nih, Reuben biela mihai chu,Lungawp inkaiin an um.
17. "Jordan ral Gilead bielah,Gad hnamhai an um tok tok;Dan-hai hlakin long an nghak a,An riebuk tuipui kamah,Aser-hai an inthung tok tok.
18. "Zebulun hnamhai ruok chun,Thi huomin thang an lak a,Naftali-hai khomin thi an huom,An chengna phul hmun sangah.
19. "Lalhai an hung, an indopui,Tanak hmun Megido tuikhurah,Kanan lalhai leh an indo,Sienkhom tangka le rallak,Ieng khom hawn kir an nei nawh.
20. Vana arasihai chenin,An lampuia inthok chun,Sisera chu an hung do a.
21. Vadung hlun Kison ngei chun,Anni chu a len hmang tah.Aw ka thlarau, hma tieng panin,Hrat takin kal chawi pei rawh!
22. Chu zoah sakor tlan ri chu,A thumin a thum dur dur a,Sakor hrathai an tlan puot puot.
23. Vantirko chun hieng hin a hril:Meroze chu tongsie inphur ro,A sunga chenghai po po khom,LALPA chu thangpui lo a,LALPAN mi hrat a beinaah,A hung inthok nuom naw leiin.
24. "Puon ina cheng nu po po lai,Ken mi Heber nuhmei Jael chu,Nu vangnei chungchuong a nih.
25. Sisera'n tui a hni a,Bawngnene a lo pek a,Mi tha no ngei ela chun,Bawngnene khal a lo pek.
26. Puon in hemkil a lak a,Chang tieng tubo a chawi a,Sisera lu a hem hawp a,A bekah a hem tlang pur.
27. A ke bulah a bok ruop a,Chu chun thiin an hlum ruou.
28. "A nu'n zawngdaikal awngah,Sisera hung kir ding a lo thlir a,'Iem a ta a tawlailir a hung kir intak?Ieng leia a muongchang am a na?'Tiin a'n don vel ruoi a.
29. Anni laia nu var tak chun,Ama zawna siem bok chu,Hril nonin a lo don a:
30. Rallak sum insem khop ding,Nunghak pahni bek hawn ding,Sisera rallak ding puon ze mawi,Rong chi hrang hranga chei,Ring bat ding puon zep mawi,An hmu naw lei amani ding maw?'
31. "Chuong ang tak chun aw LALPA,I hmelma po po chu ram raw se!Nangma hmangaituhai ruok chu,Ropui taka hung suok hlak,Zing nisa angin var raw se!"tiin.Chuongchun, a ram chu kum sawmli sung ralmuongin a um a.
←  Judges (5/21)  →