←  Judges (4/21)  →
1. Ehud thi hnungin Israel thlahai chun LALPA mithmuah thil suol an thaw nawk ta a.
2. Chuongchun, LALPA chun Hazora Kanan lal Jabin kutah anni chu a zor a. A sipai kawmandar chu Sisera a na, ama chu Haroset Hagoyim-a um a nih.
3. Ama chun thir tawlailir zakuo a nei a, kum sawmhni sung top Israel thlahai chu rawng taka a neksawr leiin thangpuitu dingin LALPA an ko a.
4. Chuong laia Israelhai thuoitu chu Lapidot nuhmei, zawlnei Debora a nih.
5. Ama chun Rama le Bethel khaw inkara Debora Tum thing hmuna chun rorelna hmun a'n din a, chu taka chun Israel thlahai chu a kuomah an ro inreltir dingin an fe hlak a.
6. Ama chun Kedes-Naftali rama inthokin Abinoam naupa Barak chu a'n cha a, "LALPA, Israelhai Pathienin, 'Naftali thlahai le Zebulun thlahai laia mi sing khat thuoi la, Tabor tlangah hang fe rawh.
7. Kison vadungah Jabin sipai kawmandar Sisera chu a tawlailir le a rawihai leh hung tir lut ka tih; chun anni chu ka pek che' a ti a nih"tiin.
8. Barak chun a kuomah, "I mi fepui ding a ni chun feng ka ta, i mi fepui naw ding a ni ruok chun fe naw ning" a ta.
9. Debora chun, "A tha annawm, fepui mol ka ti che. Amiruokchu, i thilthaw vel dan lei hin, hming thatna chu chang naw ti nih, LALPA chun Sisera chu nuhmei kutah a pek lem ding a ni si a" a ta. Chuongchun, Debora chu Barak leh Kedesh-ah a fe a.
10. Chu taka chun Zebulun thlahai le Naftali thlahai chu an incha khawm a, mi sing khat thuoiin Barak chu a'n thok suok a, Debora khom a fe ve a.
11. Chun, Ken mi Heber chu Ken mi bok, Mosie tarpupa Hobab thlahai laia inthokin a lo um hrang a, Kedes khaw kawl Zananima saisuo thing bula chun puon in a va kei a.
12. Abinoama naupa Barak chu Tabor tlangah a kai ti Sisera an hril chun,
13. a thir tawlailir zakuo le a kuoma um, Haroset Hagoyim-a um a sipaihai popo chu Kison vadunga chun a thuoi khawm a.
14. Chu phing leh Debora chun Barak kuomah, "Khai leh, inthok suok ta raw leh. Voisun hi LALPAN i kuta Sisera a pek ni che a ni hi. I hmathuoitu chu LALPA a ni naw am a ni?" a ta. Chuongchun, Barak chu Tabor tlanga inthok chun a tum thla a, mi sing khatin an zui a.
15. Barakin hma a nor phei lai chun Sisera tawlailirhai le a sipaihai po po chu LALPAN kawlhnamin a tukdol vong a, Sisera chu a tawlailira inthokin a tum a, kein a tlan hmang ta dai a.
16. Barak chun tawlailirhai le sipaihai chu Jentailhai ram Haroset Hagoyim chen a hnot a, Sisera sipai po po chu kawlhnamin a that a, dama hla pakhat khom a nei nawh.
17. Sisera ruok chu Ken mi, Heber nuhmei Jael puon ina chun a tlan lut a. Hazor lal Jabin le Ken mi Heber sunghai chu inrem zinga um an nih.
18. Jael chu Sisera hmuok dingin a hung suok a, a kuomah, "Ka lalpa, hung lut rawh, ti der naw rawh" a ta. Chuongchun, puon in sunga chun a zui lut a, ama chun puon a'n khum a.
19. Sisera chun, "Lunginsiet takin tui mi hung pe raw khai, ka dang a char em el" a ta. Ama chun bawngnene siena bawm a hong a, a'n dawntir a, puon an khum nawk a.
20. Sisera chun, "Puon in kotkhara khan ngir la, 'Hi taka hin mi an um am?' tia an hung indon che chun, 'An um nawh' lo ti pei rawh" a ta.
21. Nisienlakhom, Heber nuhmei Jael chun puon in thlungna hemkil hmol zum le tubo chu a lak a, damtein a pan phei a, sawl em ema a in lai chu a bekah hemkil zum chun a hem tlang a, hnuoiah a hem bur a, a thi ta a.
22. Barak chun Sisera chu a hung hnot pei a, lo hmuok dingin Jael chu a va suok a, a kuomah, "Hung raw khai, i mi zawngpa chu lo inhmutir ka ti che" a ta. Chuongchun a zui lut a, Sisera chu a bekah hemkil inbur ngura a thi saa lo zal chu a hmu a.
23. Chu ni chun Israel thlahai chun Kanan lal Jabin chungah hnena an chang a.
24. Kanan lal Jabin chu an suksiet der hma khat chu Israelhai chun tha an inthla hrim hrim nawh.
←  Judges (4/21)  →