←  Judges (21/21)    
1. Israel mihai chun Mizpa khuoah, "Benjaminhai nuhmei dingin tu khomin mani naunuhai pek lo hrim hrim ding" tiin thu an inkham a.
2. Chun, mipui chu Bethelah an fe a, Pathien hmaah zan tieng chen an inthung a, inring takin an tap a.
3. "Aw LALPA, Israelhai Pathien, iengti leia Israelhai lai hieng thil hi a hung um a, voisun hin Israel thlahai hi hnam khat an kim ta naw am a na?" ti chu an tap hla a nih.
4. A zinga chun mipuihai chu inhma takin an tho a, chu taka chun maicham an siem a, pumraw thilhlan le inremna thilhlan an inhlan a.
5. Chun, Israel thlahai chun, "Israel thlahai pungkhawmnaa LALPA hmaa hung inlang ve lohai chu tuhai am ning an ta?" tiin an indon a. Kha hma khan Mizpa khuoah LALPA hmaa hung inlang naw taphot chu sukhlum ngei ding tia khun taka thu an lo inkham ta tlat si lei a nih.
6. Israelhai chu an unau Benjaminhai chungchanga chun an insir a, "Voisun hi Israel hnamhai lai hnam khat chu satthlak an ni ta si a,
7. a la um sunhai ta dingin an nuhmei ding ieng tin am ei ngaituo ta ding a na? Ei naunuhai hlak nuhmeia inneitir der lo dingin thu ei lo inkham ta bok si a" an ta.
8. Chun, anni chun, "Israel thlahai Mizpaa an pungkhawmnaa LALPA hmaa hung inlang ve lohai chu tuhai am ning an ta?" ti an hang indon chun Jabes Gilead-a mihai chu pungkhawmnaah an hung inlang nawh ti an hmu suok a.
9. Mipui an hang intiem chun Jabes Gilead-a mihai an thang ve nawh ti an hmu suok chauh a nih.
10. Pungkhawmhai chun mi huoisen thlang khawm ngot singkhat le sanghni an tir a, "Fe unla, Jabes-Gilead rama umhai chu nuhmei le naupang chikte chenin kawlhnamin va sat hlum vong ro.
11. An thaw dan ding thu an pek chu hieng ang hi a nih: pasal po po le nuhmei, pasal zalpui taphot chu sukhlum vong ding.
12. Chun, Jabes-Gilead hmuna chun pasal la pawl ngai der lo nunghak zali an hmu a, chuonghai chu an umna Silo khuoah an hung thuoi a, chu chu Kanan ram a nih.
13. Chun, pungkhawmhai po po chun mi an tir a Rimon lungpuia chun Benjaminhai chu an va'n biekpui a, inremna thu an puong a.
14. Chu phing leh Jabes-Gilead rama nunghak an manhai chu an pek a, chu sa khom chun an la'n dai naw a.
15. Israel hnam lai LALPAN indaidanna a siem tak leiin mipuihai chu Benjaminhai chungchang thua chun an insir a nih.
16. Pungkhawm laia upahai chun, "A la damhai nuhmei ding hi ieng tin am thaw tang ei ta, Benjaminhai laia an nuhmeihai hlak chu sukbohmang an ni ta si a?
17. Benjamin hnam hi sukmanga a um nawna dingin Benjamin thla la um sunhai hi ieng tin am thla ei inneitir thei ding a na?
18. Ei naunuhai hlak nuhmeiah ei inneitir thei si naw a" an ta. Israel thlahai chun, tu khom Benjaminhai nuhmei dinga mani naunu inneitir taphot chu tongsie phur dingin an lo inkham ta si a.
19. Chun, anni bok chun, "Ngai ta u, Bethel hmar tieng, Bethela inthoka Sekem tieng fena lamlien sak tienga Lebon sim tienga um Silo khuoah kum tin LALPA ta dingin kut a um hlak kha.
20. Benjamin thlahai kuoma chun, 'Va fe unla, grep hmunah lo inchan unla,
21. lo en zing unla, lamnaa thang dinga Silo khuoa nunghakhai an hung suok pha leh grep huona inthokin hung suok unla, Silo nunghakhai chu mani nuhmei ding seng man unla, Benjaminhai ram tieng fepui ro.
22. An pahai amanih an tahai amanih an hung pha leh an kuomah, 'Lunginsiet ro khai. Indonaa khan an nuhmei ding ei lo manpek si naw a, nangni hlakin in lo pek bok si nawh, lo pe ni inla chu, thiem naw in hlaw ding a ni bok si a' kan lo ti ding a nih" tiin thu an pek a.
23. Benjamin thlahai chun chuong ang chun an thaw a, lama hunghai chu anni zat seng nuhmei dingin an man a, an fe hmangpui a, an ram tieng an thuoi a, an khawpuihai cheiin an hluo nawk a.
24. Chu taka inthok chun Israel thlahai chu mani chi chi le mani hnam hnamin an intel hrang a, anni ram sengah an kir nawk ta a.
25. Chuong lai chun Israelhai lai lal an la um naw a, mi tinin mani tha ti zawng zawngin an thaw el a nih.
←  Judges (21/21)