←  Judges (20/21)  →
1. Chuongchun, Israel thlahai po po chu inthuruolin an inthok suok a, Dan khuoa inthoka Beer-Seba khuo chen le Gilead rama mi po po chu Mizpa khuoa chun LALPA hmaah an hung pung khawm a.
2. Israel thlahai laia chihnam po po le an lukhaituhai chu Pathien mihai inkhawmnaa chun an thang a, ralthuom chawi sipai ngot khom nuoi li an nih.
3. (Benjaminhai chun Mizpa-ah Israel thlahai an pung khawm ti an lo hriet a.) Israel thlahai chun, "Ieng leia hieng ang ritlona hi hung um am a na ti mi hril rawh" tiin thu bulbal an indon a.
4. A nuhmei an thatpek, Levi chia mi chun, "Benjamin chihai umna Gibea-ah riek dingin ka hmei leh kan va lut a.
5. Gibea mihai chun an mi hung bei a, zanah an mi hung inhuol a, mi that an tum a, ka hmei chu an pawngsuol hrep a, a thi ta a.
6. Ka hmei ruong chu ka hung phur a, a taksa chu ka chan nawi a, Israel thlahai ram hluo po poah ka thon dar a nih, Israel rama hin thil tirdakum le inzakum thlak tak chu an lo thaw ta si a.
7. Nangni Israel thlahai hin in rengin ngaituo unla, in ngaidan le remti dan chu hrilin thu tlukna siem ro" a ta.
8. Mipuihai chun thukhat chelin, "Tu khom mani in tieng inlawi nawng ei ta, tu khomin mani khuo tieng kir bok nawng ei tiu.
9. Gibea-hai ei thaw dan ding chu hieng hi ning a tih: Thum vawr ei ta, chuong ang pei chun thawng ei tih.
10. Israelhai chunga thil indik lo tak an thaw ang peia thaw ve dinga Gibea khuoa Benjaminhai ei hang beinaa mipui fak ding buoipuitu ding mi zaah sawm, mi sangah za, mi singah sang thlang suok ei tiu" an ta.
11. Chuongchun, Israel thlahai po po chu thukhat chelin khawpui bei ding chun an insek khawm a.
12. Israel thlahai chun Benjamin hnam umna taphotah mi an tir a, "Nangni lai hieng anga tuolthatna rapthlak tak a hung um el ta hi ieng tizie am a na?
13. Gibea khuoa mi rilohai chu kan sukhlum dingin kan kutah hung pe suok unla, Israel rama inthokin chuong ang ritlona chu inthiel fai kan tih" an ta. Amiruokchu, Benjamin hnamhai chun an unau Israel thlahai thu chu an bengkhon nuom nawh.
14. Chuongchun, Benjamin thlahai chu Israel thlahai do dingin an khawpuihaia inthok chun Gibea khuoah an lut ta hum hum a.
15. Gibea mi huoisen thlang suok za sari bakah an chengna khuohaia inthokin kawlhnam chawi ral do mi singhni le sangruk chu Benjamin thlahai chun an khawm nghal a.
16. Chuonghai lai chun voikawlong thlang suok bik ngat mi zasari an thang a, an reng chun saihli per thiem, sam zai tiet khom per thel lo vong an nih.
17. Israel mihai chu, Benjamin mihai tiem sa loin, kawlhnam chawi, indo mi ngot khom nuoi li an nih.
18. Israel mihai chu Bethel-ah an hang fe a, Benjamin thlahai chu bei dingin a tu hnam am fe hmasang an ta ti thu indonin Pathien an rawn a, LALPA chun "Judahai fe hmasa raw se" a ta.
19. A zinga chun Israel mihai chu an tho a, Gibea khuo huolin an inkul a.
20. Israel thlahai chu Benjamin thlahai bei ding chun an suok a, thanghmun an khaw a.
21. Benjamin thlahai chu Gibea-a inthok chun an hung suok a, chu ni chun Israel mihai chu singhni le sanghni an lo that a.
22. Sienkhom, Israel thlahai chu an infui phur a, an bei tan nia an beina hmuna inthok bok chun bei dingin thang an khaw nawk a.
23. Israel mihai chu an hang fe a, LALPA hmaah zan tieng chen an tap a, "Kan unau Benjaminhai do dingin kan inthok dok nawk ding am a ni?" tiin an hang rawn a, LALPA chun "Hang bei nawk ro" a ta
24. A ni hnina chun Israel mihai chun Benjamin thlahai chu an hang pan hnai a.
25. Benjamin thlahai chun bei dingin Gibea khuoa inthokin an hung suok ve a, Israel thlahai laia mi singkhat le sangriet, kawlhnam chawi mi ngot chu, an that nawk a.
26. Chuongchun, Israel thlahai le mipui po po chu Bethelah an hang fe a, LALPA hmaah an inthung a, an tap a, zan tieng chen bu an nghei a, LALPA kuomah pumraw thilhlan le inremna thilhlana inthawina an hang nei a.
27. Israelhai chun LALPA chu an rawn a (Chuong lai chun LALPA Thuthlung Bawm chu chu hmuna chun a um a,
28. Aron naupa Eleazar, Eleazar naupa Finehas chun rong a bawl a). Finehas chun, "Kan unau Benjamin thlahai chu kan hang bei nawk ding am a ni? an naw leh kan tawpsan lem ding?" tiin LALPA chu a'n don a. LALPA chun, "Hang bei nawk inla, zinga chu in kutah pe tang ka tih" a ta.
29. Chun, Israelhai chun Gibea khaw kawla aruka inchantu ding mi an sie a.
30. Israel mihai chu Benjamin thlahai bei dingin a ni thum ni chun an inthok suok nawk a, a hma ang bokin thanghmun an khaw a.
31. Lo bei dingin Benjamin thlahai chu khawpuia inthokin an hung suok a, ni dang ang bokin mihai chu beiin an lo that a, Bethel khaw pan tungna le Gibea khaw panna lama phula chun mi sawmthum an that a.
32. Benjamin thlahai chun, "A hmaa ang bok khan ei intlawm nawk tah ie" an ta. Chuonga an hril lai chun Israel thlahaiin, "Intawl kir ei ta, khawpuia inthokin lamlien tieng zawr dok ei tiu" an ta.
33. Israelhai po po chu an umna hmuna inthokin an intawl kir a, Baal Tamar-ah thang an khaw a; chu phing leh a ruka lo inchantuhai kha an inchanna hmun Gibea thlang tienga inthokin an hung suok a.
34. Israel mihai laia mi huoisen thlang khawm singkhatin Gibea khawpui chu an bei thut a, an indo nasa em leiin Benjamin thlahai chun an tlawm tep a nih ti hmel khom an hriet chang nawh.
35. Israel mihai hmaa chun LALPAN Benjamin thlahai chu a sukhlum teu a, chu nia Israel mihaiin Benjamin thla an that po po chu kawlhnam chawi ngot khom singhni le sangnga le zakhat an nih.
36. Benjamin thlahai chun an tlawm tah ti an inhmai nawh. An hmaa Israelhai an hnung tol kha Gibea bula inchantu an lo sie rukhai an ring lei a ni si a.
37. A ruka inchantuhai chun Gibea chu an bei thut a, an inzar dar a, a khaw pumpui chu kawlhnamin an suosam a
38. A ruka inchantuhai khan mei an inkhuk chara Israel mi danghai khan hung nor let dinga inremsiem an na,
39. mei an inkhuk charin an hung bei let tah a nih. Benjaminhai chun Israelhai chu beiin, mi sawmthum vel lai an that hman leiin, "A hmaa ang bokin ei hne nawk an tah" an ti hman hrim a.
40. Nisienlakhom, khawpuia inthoka mei khu a hung suok phing leh Benjaminhai chu an hang ngha kir a, khawpui pumpui khu chun van tieng a pan tung ngut ngut el a.
41. Chu phing leh Israelhai chun an hung hnot kir a, Benjaminhai chu an thlabar hle a, sietnan a tlak buok a nih ti an inhmai nawh.
42. Israelhai hmaa chun thlaler tieng panin an tlan sie a, sienkhom tlan hmang ngaina a um naw a, khawpuia inthoka hung hnottuhai khan chu taka chun an sukhlum a.
43. Benjamin mihai chu an inhuol a, an hnot a, ni suokna tienga chawlna hmun, Gibea dep tieng chun an hnot phak a.
44. Benjamin mihai chu mi singkhat le sangriet an that a, chuonghai chu mi hrat le huoisen vong an nih.
45. Anni rawi chu an intawl pei a, thlaler tieng Rimon lungpui tieng chun an tlansie a, mi sangnga chu lamlien dungah an that a, Gidom chenin an hnot ngat ngat a, mi sanghni an that a.
46. Chu ni chun Benjamin mi kawlhnam chawi ngot khom singhni le sangnga an that a, an reng chun mi hrat le huoisen vong an nih.
47. Mi zaruk ruok chu thlaler tieng Rimon lungpuiah an tlansie a, Rimon lungpuia chun thla li an um a.
48. Israelhai chu Benjamin mihai chungah an tuong nawk a, an khawpui sunga mi an hmu taphot chu, an ranhai chenin kawlhnamin an sat hlum pei a, chu bakah khuo an hmu taphot chu an raw pei bok a nih.
←  Judges (20/21)  →