←  Judges (19/21)  →
1. Israel rama lal an la um naw laiin Levi chia mi pakhat, Efraim tlang ram kilkhawra um chun Judai ram Bethlehema mi hmei a nei a.
2. A hmei chun a uiresan a, a pa in Judai ram Bethlehemah a tlansan a, chu taka chun thla li zet a um ta a.
3. Thuoi kir nawk dinga thlem tumin a pasal chu a'n thok suok a, a siehlaw le sabengtung pahni a thuoi a. A hmei chun a pa inah a lo thuoi lut a, a pain a hmu chun a lo lawm hle a.
4. A hmei pa, a tarpu chun a kuoma cham dingin a thlo a, a ina chun riekin ni thum sung fain an dawn tlang a.
5. A ni lina tuk chun inhma takin an tho a, fe tumin an insiem a, sienkhom a tarpu chun a makpa kuomah, "Fain la'n sukhar phot unla, chu zoah in fe ding annawm" a ta.
6. An pahni chun thungin, fain an dawn tlang a. Chu zoah a tarpu chun, "Voi zan chu la riek unla, la chawl hadam ro" a ta.
7. Suok tumin a hang thoa chu a tarpuin cham nawk dinga a thlo tlat leiin chu zan chun an la riek nawk a.
8. A ni ngana tuka fe tuma a hang inthok khom chun a tarpu chun, "La hang insukhar phot unla, zan tieng ni nemah suok lem ro" a ta. Chuongchun, an pahni chun bu an fak tlang nawk ta a.
9. Chu pa chu a hmei le a siehlaw leh a hang inthok suok lai chun, a tarpu chun, "En ta, khuo an hnu el ding an ta a, voi zan chu la riek nawk phot el ro, nisa khom a tla ding a ni ta hi. La cham inla, hlim takin um ro. Zing inhma takin tho in ta, in fe el ding annawm" a ta.
10. Sienkhom, zan dang la hang riek nawk chu a nuom naw leiin Jebuhai khuo Jerusalem tieng panin a hmei leh thuomhnaw phurtu sabengtunghai le chun a suok a.
11. Jebuhai khawpui Jerusalem kawl an tlung chun nisa a tla tep ta a. A siehlaw chun, "Thaw ro, Jebuhai khawpuia hin lut ei ta, riek el ei tiu" tiin a rot a.
12. A pu chun, "Ni lo e, Israel mihai umna ni lo, hnam dang mi khawpuia chun lut lul lo e; Gibea khuo tieng pan pei lem ei tiu
13. Thaw ro, Gibea an naw leh Rama khuo ban tumin fe pei ei ta, a pakhat lem lemah ei riek ding a nih" a ta.
14. Chuongchun, an fe pei a, Benjaminhai khuo Gilbea kawl an tlung chun nisa a tla a.
15. Chu taka chun riek dingin an lut a, khawpui tuolzawla chun an inthung a, sienkhom an ina riek dinga fiel tu khom an um nawh.
16. Chu zan tieng chun Efraim tlang rama inthoka hung, Benjaminhai khuo Gibea hung khawsa putar pakhat lo fe chu a hung inlawi a.
17. A hang ngha vel chun khawpui tuolzawla khuolzin inthung a hmu a, "Khaw laia inthoka hung am in na? Khaw tienga fe ding am in ni a?" tiin putar chun a'n don a.
18. Mikhuol chun, "Judai ram Bethlehema inthoka Efraim tlang ram kilkhawr, kan umna pana inzin kan nih. Judai ram Bethlehemah ka zu'n zin a, tuhin LALPA ina fe tum kan na, tu khom a mi'n tlungtu kan hmu naw a nih.
19. Kan sabengtunghai fak ding bupawl le ran bu kan nei a, kei le i bawinu le i siehlaw tlangval fak ding le dawn ding bu le uoiin a um bok a, chuong tieng zawnga chu ieng khom tlaksam kan nei nawh" a ta.
20. Putar chun, "Thlamuong takin um ro, in mamaw po po chu keiman tum vong ka tih; khawlaia ruok chu riek lul naw ro" a ta.
21. Chuongchun, a inah a thuoi lut a, an sabengtunghai chu bu a pek a; a mikhuolhai ke a sawppek a, fain an dawn a.
22. Chuonga hlim le lawm taka an um lai chun a khuoa mi lut-inle le suol turuhaih chun a in chu an hung inhuol a, a kotkhar chu an hung chum dot dot a, putar kuoma chun, "I mikhuolpa kha hung thuoi suok rawh, kan lo pawl theina dingin" an ta.
23. In neitupa chu a va suok a, an kuomah, "Ruolhai, chuong chu ni lo e, chuong ang em chun suol lul lo e. Hi mi hi ka mikhuol a na, hieng anga thil inzakum thlak chu thaw lul naw ro.
24. Ngai ta u, hi taka hin ka naunu nunghak le ka mikhuolpa hmei an um a, anni chu hung thuoi suok ka ta, hmang inla, in ti ang angin thaw ro. Hi pa chunga ruok hin chu chuong ang thil inzakum chu thaw lul naw ro" a ta.
25. Nisienlakhom, mi suolhai chun a thu chu an ngaithlakpek nuom nawh. Chu phing leh mi chun a hmei chu mihai kuoma chun a thuoi a, an lo pawl a, khawvar hma khat chu zankhuoin an soisak hrep a, khuo a var charin an fesan a.
26. Khuo a var phing leh nuhmei chu an infetir a, a hotupa tlungna in kotkhar bula chun a thalin a tlu thlor a, khaw var hnung chenin a zal ta zing a.
27. A hotupa zing tho chun fe suok dingin kot a hang hong a, kot bula chun a hmei chu zangthala tlu let derin a hmu a.
28. Ama chun, "Tho raw leh, fe nawk tang ei tih" a ta, sienkhom a hung don ta hrim hrim nawh. Chuongchun, a sabengtung chunga chun a hlang kai a, a tho a, a khuo tieng pan chun a suok ta a.
29. In a tlung chun chemte a lak a, a hmei chu a kut le ke a tan bong vong a, hmun sawm le hmun hniin a chan nawi a, Israel ram po poa chun a thon dar a.
30. A hmu taphot chun, "Israel thlahai Aigupta rama inthoka an hung suoka inthokin hieng anga thil thaw hrim hrim hi hmu le hriet a la ni ngai nawh. Ngaituo unla, inrawn tlang unla, iem kan thaw ding mi hril ro" an ti vong a.
←  Judges (19/21)  →