←  Judges (17/21)  →

---

1.

Efraim tlang rama inthoka hung mi pakhat a um a, a hming chu Mika a nih.

2.

Ama chun a nu kuomah "Tangka shekel sangkhat le zakhat an inrukpek che a, nang khomin ka hriet ngeiah tongsie i'n phur a. Kha tangka kha keiin ka kol a, ka lak a ni kha" a ta. A nu chun, "Ka naupa, LALPAN mal sawm che raw se" a ta.

3.

A nu kuoma tangka sangkhat le zakhat a hung pekkir ni chun a nuin, "Hi tangka hi keima kut ngeiin ka naupa puola milem siemna ding le milema sung dingin LALPA kuomah ka'n hlan a; chuleiin, ka pekkir nawk ding che a nih" a ta.

4.

Chuong ang chun tangka chu a nu kuomah a pek a, a nu chun tangka shekel zahni chu a lak a, tangkaruo sertu kuomah a pek a, ama chun milemah a lo siem a, milemah a sung bok a, Mika inah a sie a.

5.

Mika chun pathien in a bawl a, chu taka chun Efod le milem a siemhai chu a sie a, a naupa pakhat chu thiempuah a sie bok a.

6.

Chuong lai chun Israel ramah lal an la um naw a, mi tinin mani tha tizawng zawngin an thaw seng a.

7.

Judai ram Bethlehemah Levi chia mi tlangval pakhat, Judahai laia khawsa hlak a um a.

8.

Ama chun umna ding hmun dang zongin Bethlehem a suoksan a. Chuonga a'n vaknaa chun Efraim tlangrama Mika in chu a va tlung a.

9.

Mika chun, "Khaw laia inthoka hung am i na?" a ta, ama chun "Judai ram Bethlehema inthoka hung Levi chia mi ka na, umna ding ka zong a nih" a ta.

10.

Mika chun, "Ka kuomah um ve el la, ka pa le thiempuah thang la, i fak le dawn le i silfenhai ka tum bakah kum khatah tangka shekel sawm peng ka ti che" a ta.

11.

Levi chia mi tlangval chun a remti a, chuongchun a naupahai laia pakhat ve angin a um ta a.

12.

Mika chun Levi chia mi chu thiempuah a sie a, a inah a'n umtir ta a.

13.

Mika chun a kuomah, "Tu zet hin chu Levi chia mi ngei thiempu ka nei ta a, LALPAN mi sukhmuingil a tih" a ta.

---

←  Judges (17/21)  →