←  Judges (16/21)  →
1. Samson chu Gaza khuoah a fe a, nawchizor a hmu a, a kuomah zan khat riek dingin a lut a.
2. "Hi taka hin Samson a hung" tiin Gaza mihai chu an hril a. Chuongchun, an inhuol a, khawpui kul kotpui bula chun zan khuoin an inchan a. "Khawfingchatah ei that ding a nih" an ta, to tokin an inchan thup a.
3. Samson chu zan ril chenin a zal a, chu zoah a tho a, khawpui kul kotpui ban pahni chu a chel a, a kotkhar le a kalna pumin a phawi dok a, a put a, Hebron zawn tlang sip chen a put tung a.
4. Chu hnung iemani chena chun Sorek ruoma nunghak pakhat a hming Delila chu a ngaizawng a.
5. Filistinhai roreltuhai chu nunghak kuomah an fe a, "Ama hi thahne a, khuopa kan soisak theina dingin a hratna ruk hriet tumin zawr la, tangka shekel sangkhat le zakhat seng peng kan ti che" an ta.
6. Chuongchun, Delila chun Samson kuomah, "I hrat vieuna san thuruk mi hril rawh. Ieng tin am soisak dingin khuop thei kan ti che a?" tiin a'n don a.
7. Samson chun, "Hrui tharlam pasari, la tawl loin mi khuop unla, mi dang ang bokin hung hrat naw el ka tih" a ta.
8. Filistinhai roreltuhai chun hrui thar hlok, la vuoi lo chu an hung chawi a, chu chun a khuop a.
9. Pindan sung rila chun inchan ruktu ding mi a sie a. "Samson tho rawh, Filistinhaiin an hung bei ding che a nih" a ta. Amiruokchu, meiin hrui zai a kang chat ang elin a khuopna hruihai chu a'n tan hmok hmok el a. A hratna san chu hriet suok a ni nawh.
10. Delila chun Samson kuomah, "I mi hlem a, nuizat burah i mi siem a nih. Tu hin ieng anga khuop thei di'm i na ti mi hril ta raw leh" a ta.
11. Ama chun, "Hruol thar la hmang ngai der loin nghet takin mi zem la, mi dang ang bokin che thei naw el ka tih" a ta.
12. Chuongchun, Delila chun hruol thar a lak a, chu chun a zem bur a. Pindan sung rila inchan ruktuhai hrieta chun, "Samson tho rawh, Filistinhaiin an hung bei ding che a nih" a ta. Sienkhom, a kuta khuopna hruol chu patzai ang elin a'n tan hmier hmier a.
13. Delila chun Samson kuomah, "Tu chen hin mi hlemin nuizat burah i mi la siem zing a nih. Khuop thei i ni dan mi hril ta raw leh" a ta. Samson chun, "Ka sam hi hmun saria phierin puon khawngnaa pat zai leh zep sain ta khum inla a ni el annawm" a ta.
14. A sam chu puon kola chun tomkilin nghet takin a kil de a. Chu zoah, "Samson, Filisitnhaiin an hung bei tum che" tiin a ko a. A hung thanghar a, puonbu kil dena le a puonbu chop chun a kei thlong ta vong a.
15. Delila chun Samson kuomah, "Ieng khom mi hril nuom si loin ieng tin am 'Ka hmangai che' dam i mi ti chu? Hi hi voi thum zet nuizat bura i mi siemna a ni ta a, i hratna ruk san hlak i mi hril nuom top bok si nawh" a ta.
16. A nghok hlum vang chenin sun le zan a mor ngat ngat a.
17. Chuongchun, iengkim a hril ta a. "Ka lua hin bakchep hrim hrim hmang a la ni ngai naw a, ka nu sula ka um laia inthoka Pathien ta dinga ser hrang Nazarit mia siem ka ni a, ka sam hi vaw ta inla chu ka hratna hi bo vong a ta, mi dang ang boka hrat naw hung ning ka tih" a ta.
18. Iengkim a hril ta vong ti Delila'n a hriet chun Filistinhai roreltuhai chu, "Iengkim a mi hril ta leiin hung nawk phot el ro" tiin a'n cha a. Filistinhai roreltuhai chu sum chawiin an hung a.
19. Delila chun Samson chu a malpui inkhamtirin a'n intir a, mi pakhat a ko a, a sam phier sari chu a'n chep thlaktir vong a, a thuin a hung siem thei tan a, a hratna chun a zamsan ta si.
20. Ama chun, "Samson, Filistinhaiin an hung bei tum che" a ta, a in lai chu a hung har a, "Ni dang ang bokin intal suok nawk el ka tih" tiin a'n ngaituo a, sienkhom LALPAN a maksan tah ti hrim a hriet si nawh.
21. Chuongchun, Filistinhai chun an man a, a mit an khel dok a, Gaza tieng an thuoi thlak a, dar kol an inbuntir a, lung ina chun bu an inrawttir a.
22. Sienkhom, a lu an vaw kol hnung chun a sam chu a hung inthang tan nawk a.
23. Filistinhai roreltuhai chu an pathien Dagong kuoma inthawina ropui tak inhlan ding le insukhlim dingin an pung khawm a, "Ei Pathienin ei hmelma Samson ei kutah a mi pek tah annawm" an ta.
24. Mipuiin an hang hmu chun,"Kan pathienin kan hmelmapa,Kan ram mi sukrampektu,Kan mihai tam tak suomtu chu,Kan kutah a mi pek ta si"tiin an pathien chu an inpak a.
25. An hung phur zuol deu hnung chun, "Ennuom dingin Samson hung thuoi suok ro" tiin an khek a. Samson chu an ko suok a, ban le ban inkarah an inngirtir a, ennuomah an siem a.
26. Samson chun a kuta keitu siehlaw kuomah, "Hi in dotu banpui hi ka them phak theinaah mi sie rawh, banpuia ka'n nghai theina dingin" a ta.
27. Chu tempula chun nuhmei le pasalin an sip hmur a, Filistinhai laia mi lien po po khom an kim hle a; Samson ennuoma thlirtu chu a sawng chunga ngot khom nuhmei le pasal mi sangthum lai an um.
28. Samson chun LALPA a ko a, "Aw LALPA Chunghnungtak, lunginsiet takin mi hre zing la, aw Pathien, ka mit khing hni phuba hi Filistinhai chungah tum khata ka lak vong theina dingin voi khat bek mi hung sukhrat nawk rawh" tiin a tongtai a.
29. Samson chun a lailunga tempul dotu sutpui pahni chu a hang them a, a kut chang tieng chun sutpui pakhat, a kut voi tiengin sutpui dang chu a nam a.
30. Samson chun, "Filistinhai hi hang thi chil ka tih" a ta, a theina po poin a nam a, a sunga roreltuhai le mipuihai chunga chun tempul chu a hung chim thla ta hum hum a. A dam laia a sukhlum nekin a thi chilhai chu an tam lem.
31. A unauhai le a pa sunghai po po chu a ruong la dingin an hung thlak a, an lak a, an zawn tung a, Zora le Eshtaol inkara a pa Manoa an phumna hmuna chun an phum a. Kum sawmhni sung Israelhai a thuoi a nih.
←  Judges (16/21)  →