← Judges (14/21) → |
1. | Samson chu Timna khuoah a zu fe a, Filistin nunghak pakhat a zu hmu a. |
2. | In tieng a hung inlawi chun a nu le pa kuomah, "Timna khuoah Filistin nunghak pakhat ka hmu a, ka nuhmei dingin zu thuoi ro" a ta. |
3. | A nu le pa chun, "Ei sungkuo le ei chipuihai lai hin i lung kuoi zawng nunghak i hmu der naw am a ni, chuonga ser tan lo Filistinhai lai nuhmei ding i zu zong el ta chu?" an ta. Samson chun, "Mi thuoipek el ro, ka'n koppui thei chi ding tak a nih" a ta. |
4. | (Chuong laia Israelhai chunga roreltu chu Filistinhai an na, anni le an intauh thei dan remchang chu zonga chu thil chu LALPAN a thaw a nih ti chu a nu le pain an hriet si nawh.) |
5. | Chuongchun, Samson chu a nu le pa leh Timna khuoah an zu fe a. Timnaa grep huon an tlung tawmin sakeibaknei vanglaiin a lo inrum khum thut a. |
6. | Samson chunga chun LALPA Thlarau thilthawtheina a hung tlung a, hriemhrei ieng khom chawi naw sienkhom, kut lawng ringotin sakeibaknei chu kel te ang elin a pot nawi a, sienkhom a thilthaw chu a nu le pa a hril nawh. |
7. | Chun, an zu tlung a, nunghak chu Samsonin a'n biekpui a, a dit hle a. |
8. | Iemani chen hnungah nunghak chu nei dingin an zu fe nawk a, sakeibaknei ruong chu en dingin Samson chu a pet vak a, a ruonga chun khuoiin bu an lo sep a, khuoizu khom a lo um a. |
9. | Khuoizu chu a lak a, a fe nawk a, lawn malamin a fak pei a, a nu le pa a hnot phak chun anni khom a then a pek a, an fak a, sienkhom sakeibaknei ruonga inthoka khuoizu chu a lak a nih ti a hril tawl nawh. |
10. | Chun, a pa chun nunghak chu a zu hmu a, chu taka chun Samsonin ruoi a the a, chu chu moneitu tlangvalhai thaw dan hlak hrim a nih. |
11. | Samson an hmu charin a tawiawmtu ding mi sawmthum an hung thuoipek nghal a. |
12. | Chun, Samson chun an kuomah, "Tu hin thu khirh ka'n don ding cheu a nih. Ruoi the hun ni sari sunga a donna in mi hril thei chun puon zai inhmi thle sawmthum le silfen sawmthum peng ka ti cheu. |
13. | A donna in mi hril thei naw chun puon thle sawmthum le silfen sawmthum in mi pek ding a nih" a ta. Anni chun, "Thu khirh chu mi hang hril ta la, lo ngaithlang kan tih" an ta. |
14. | Ama chun," A fatua inthoka fak ding suok,Hrat taka inthoka thil thlum suok"a ta. Ni thum sungin an don thei nawh. |
15. | A ni linaa chun Samson nuhmei kuomah, "Hi thu khirh hi mi hrilfie dingin i pasal hi thlut rawh, chuong naw chun nang le i pahai sungkuo hi kan raw hlum el ding cheu a nih. Mi rok dingin a ni maw hi taka hin in mi fiel?" an ta. |
16. | Samson nuhmei chun tap pumin a zuot a, "I mi lo theida hle a ni hi tie! I mi lo hmangai tak tak naw top hih. Ka chipuihai hlak thu khirh i'n don a, kei hlak a hrilfiena khom i mi hril si nawh" a ta. Ama chun, "La to ta, ka nu le pa khom la hril loin nang ka hril ding che maw?" a ta. |
17. | Ruoi the hun ni sari sung chun a hmaah tapin a thlut ngat ngat leiin a ni sarina chun a hril ta a, ama chun thu khirh umzie chu a chipuihai kuomah a hril sawng a. |
18. | A ni sarina nisa tlak hma chun a khaw mihai chun a kuomah, "Khuoizu neka thlum lem iem a na? Sakeibaknei neka hrat lem iem a na?" an ta. Samson chun an kuomah,"Ka bawng la hi hnuoi inletah sor naw inla chu,Ka thu khirh hre suok teu naw ti niu"a tipek tawl a. |
19. | Chun, LALPA Thlarau chu Samson chungah thilthawtheinain a hung inlang a. Askelon-ah a fe thlak a, mi sawmthum a that a, an thuom a hlippek a, thu khirh hrilfietuhai kuoma chun silfenhai chu a pek a, lungsen erin a pa in tieng chun a kir nawk ta a. |
20. | Samson nuhmei chu inneinaa Samsonin thiena a hmang kuomah an lo pek lem el ta a. |
← Judges (14/21) → |