Judges (13/21)  

1. Israel thlahai chun LALPA mithmuin thil suol an lo thaw nawk ta a, LALPAN Filistinhai kutah kum sawmli a'n umtir a.
2. Chun, Zora khuoah Dan hnama mi pakhat a um a, a hming chu Manoa a nih. A nuhmei chu a ching leiin nau boin an um zing a.
3. LALPA vantirko chu nuhmei kuoma chun a hung inlar a, a kuomah, "Ngai ta, i ching a, nau i la pai ngai naw a, sienkhom inrai i ta, nau pasal nei i tih.
4. Chuleiin, fimkhur raw khai. Uoiin le zu hrim hrim dawn naw la, fak thieng lo thil hrim hrim fa bok naw rawh.
5. A nih, inrai i ta, nau pasal i nei ding a ni si a. A lua chun sam vawna hmangruo hrim hrim i hmang ding a ni nawh, chu naupang chu sula a um laia inthoka Pathien ta dinga ser hrang Nazarit mif a ni ding a ni si a; ama chun Filistinhai kuta inthoka Israelhai san suokna chu hung tan a tih" a ta.
6. Chuongchun, nuhmei chun a pasal kuomah, "Pathien mi, mi pakhat ka kuomah a hung a, a hmel chu vantirko hmel anga inzaum a na, a hungna hmun ka'n don naw a, a hming khom a mi hril bok nawh.
7. Ama chun ka kuomah, 'Ngai ta, inrai i ta, nau pasal nei i tih. Uoiin le zu hrim hrim dawn naw la, fak thieng lo hrim hrim fa bok naw rawh. Naupang chu sula a um laia inthoka Pathien ta dinga ser hrang Nazarit mi a ni ding a ni si a' tiin a mi hril a" a ta.
8. Manoa chu LALPA kuomah a tongtai a, "Aw LALPA, lunginsiet takin Pathien mi i hung tir kha ka kuomah hung tir nawk la, naupang hung pieng ding chu ieng tin am kan enkol ding ti mi hung inchuktir raw se" tiin a hni a.
9. Manoa thil hni chu Pathienin a lo ngaithlak a, a nuhmei chu phula a thung laiin a kuomah Pathien vantirko a hung inlar nawk a, a pasal Manoa ruok chu a kuomah a um ve naw a.
10. Nuhmei chu inhmaw takin a tlan a, a pasal a va hril a, "Ngai ta, ni khat laia ka kuoma inlar kha a hung inlar nawk ta ie" a ta.
11. Manoa chu a tho a, a nuhmei chu a zui a, chu mi kuom chu a va tlung a, a kuomah, "Nang hi i ni maw nuhmei kuoma thu hriltu chu?" a ta. Ama chun, "Ni e" a ta.
12. Manoa chun, "I thu anga a hung tlung pha, naupang zawm ding le thaw ding thilhai chu iem ni tang a ta?" tiin a'n don a.
13. LALPA vantirko chun, "I nuhmei kuoma ka hril ta po po ang khan thaw raw se.
14. Grep hruia inthoka suok hrim hrim a fak ding a ni naw a, uoiin amani zu amani le fak thieng lo hrim hrim dawnin a fak ding a ni bok nawh. Thu ka pek ta po po kha vong tha raw se" a ta.
15. Chun, Manoa chun LALPA vantirko kuomah, "Lunginsiet takin i ta dinga kel tuoi ka buotsai zo chenin mi la um pek hram la tiin ka thlo che a nih" a ta.
16. LALPA vantirko chun, "In mi la thlo tang a ni khomin i bu chu fa naw ning. Pumraw thilhlan i buotsai tum a ni chun LALPA kuomah inhlan lem rawh" a ta (Manoa chun LALPA vantirko a nih ti a hriet si nawh).
17. Manoa chun, LALPA vantirko kuoma chun, "I thuhrilhai hi a hung tlung kim pha kan chawimawi theina ding chein i hming mi hril thei i tim?" a ta.
18. LALPA vantirko chun, "Ieng dinga ka hming i mi'n don am a na? I hriet thiem phak ruol ding a ni nawh" a ta.
19. Manoa chun kel tuoi chu a lak a, bu le bal thilhlan leh lungpui chunga chun LALPA ta dingin a'n hlan a. Vantirko chun thil mak tak a thaw a, Manoa le a nuhmei chun an thlir zing a.
20. Maichama inthoka meichok van tienga a fe tung lai chun LALPA vantirko chu meichoka chun a kai tung a. Manoa le a nuhmeiin chu chu an hmuin hnuoiah an bokkhup a.
21. LALPA vantirko chu a hung inlang nawk ta naw phing leh Manoa le a nuhmei chun LALPA vantirko a nih ti an hriet chauh a nih.
22. Manoa chun a nuhmei kuomah, "Pathien ei hmu ta si a, ei thi ngei ngei ding a nih" a ta.
23. A nuhmei chun, "LALPAN a mi sukhlum ding ni sien, ei pumraw thilhlan le bu le bal thilhlanhai kha pom naw ni a, hieng thil po po hi mi'n hmutirin mi hril bok naw nih" a ta.
24. Nuhmei chun nau pasal a nei a, a hmingah Samson an sak a. Naupang chu a hung seilien a, LALPAN mal a sawm a.
25. Chun, Zora le Estaol inkara um Mahane-Dan hmuna chun ama chu LALPA Thlarauin a hung chok tho tan ta a.

  Judges (13/21)