| ← Judges (12/21) → |
| 1. | Efraimhai chu an pung khawm a, Jordan vadung chu Zafon-ah an kai phei a, Jeftha kuoma chun, "Ieng dinga Amon thlahai bei dinga i hung phei lai khan i kuoma hung ve dinga i mi fiel naw hrim hrim am a na? I in leh kan raw ding che a nih" an ta. |
| 2. | Jeftha chun, "Kei le ka mipuihaiin Amonhai hi thei tawp suoin kan do a, nangni khom kan incha cheu a, sienkhom an kuta inthokin tu khomin in mi hung san suok nawh. |
| 3. | In mi hung san naw ding a nih ti ka hmu chieng phing leh thi ngamin ka thang a, Amon thlahai bei dingin ramri kanin ka hung a, LALPAN an chungah hnena a mi pek a nih. Chu chu ni siin, ieng dinga mi bei dinga voisun hin in hung inthok am a na?" a ta. |
| 4. | Chuongchun, Jeftha chun Gilead mihai chu a khawm a, Efraimhai chu a bei a. Efraimhai chun Gilead mihai chu, "Nangni Gilead ruol, Efraim le Manase hnama inthoka tlan hmang ruol mei mei" an ti hlak leiin Gilead mihai chun Efraim mihai chu an that teu el a. |
| 5. | Gilead mihai chun Efraimhai ram dep Jordan vadung kaia mi hung taphot chu an lo man a. Efraim mi tlan hmanghai chun, "Hung kai kan ti aw" an ti zatin, "Efraim mi in ni am?" an lo ti pei a. Anni chun, "Kan ni nawh" an ti leh, |
| 6. | "An leh, 'Shibboleth' hang ti ta" an ta, anni chun an lam chieng thiem naw leiin 'Sibolet' an ti nawk hlak a. A lam thiem naw po chu an lo man a, Jordan vadung kaia chun an that pei a. Chu tum chun Efraim mi singli le sanghni an that a. |
| 7. | Jeftha chun Israelhai chungah kum ruk ro a rel a. Chuongchun, Gilead mi Jeftha chu a thi a, Gilead rama khaw pakhatah an phum a. |
| 8. | Jeftha thi hnungin Bethlehem khaw mi Ibzan chun Israelhai chu a hung inrawi a. |
| 9. | Ama chun naupa sawmthum le naunu sawmthum a nei a. A naunuhai chu anni pahnam sunga mi ni lo pasalah a'n neitir vong a, a naupahai khom chu anni pahnam sunga mi ni lo vong nuhmeiah a'n neitir vong bok a. Ibzan chun Israelhai chu kum sari a thuoi a. |
| 10. | Ibzan chu a thi a, Bethlehemah an phum a. |
| 11. | Ama hnungin Zebulun mi Elon chun Israelhai chu kum sawm a thuoi nawk a. |
| 12. | A thi chun Zebulun ram Aijalon-ah an phum a. |
| 13. | Ama hnung chun Pirathon khuoa mi Hilel naupa Abdon chun Israelhai a hung thuoi nawk a. |
| 14. | Ama chun naupa sawmli le tupa sawmthum, sabengtung tuoi sawmsari chunga chuong hlak, a nei a, Israelhai chungah kum riet ro a rel a. |
| 15. | Pirathon mi, Hilel naupa Abdon chu a thi a, Efraim ram, Amalek mihai tlangrama Pirathon khuoa chun an phum a. |
| ← Judges (12/21) → |