←  Judges (11/21)  →
1. Gilead mi Jeftha chu mi hrat tak le huoisen tak a na, a pa hming chu Gilead a na, a nu chu nawchizor a nih.
2. Gilead nuhmei chun nau pasal dang khom a nei a, an hung puitling chun Jeftha kuomah, "Nang chu mi dang nau i ni leiin kan pa ro thuah chan nei ve naw ti nih" an ta, ina inthokin an hnot suok a.
3. Chuongchun, Jeftha chu a unauhai kuoma inthok chun a suok a, Tob ramah umhmun a khuor a, chu taka chun mi tawrot ruol rawia neiin, a hnung an zui a.
4. Chun, hieng hi a hung ni a.
5. A hnunga Amon mihai le Israel thlahai an hung indo phing leh Gilead upahai chu Tob rama chun Jeftha kuomah an fe a,
6. "Hung la, Amon mihai ei do theina dingin, mi hung inrawi rawh" tiin an ko a.
7. Jeftha chun an kuomah, "In mi theida a, ka pa ina inthokin in mi hnot suok a ni naw maw? Iengti dana tuta buoina in tuok phinga ka kuoma in hung?" a ta.
8. Gilead upahai chun a kuomah, "Ieng po khom lo ni ta sien, chu lei tak chun i kuomah tu hin kan hung tlu lut a ni hi. Amonhai mi beipui dingin hung la, Gilead rama chenghai po po hotuah siem kan ti che" an ta.
9. Jeftha chun, "Amon mihai do dingin mi thuoi kir ni ta inla, LALPAN anni chu ka kutah mi pe ta ang sien, hotuah in mi siem takzet ding maw?" a ta.
10. Gilead-a upahai chun, "LALPA chu eini inkara hrepuitu a nih, i thu ang angin thaw ngei ngei kan tih" an ta.
11. Chuongchun, Jeftha chun Gilead upahai chu a zui a, mipuihai chun an lu tak le an chunga kawmandar-ah an siem a; Jeftha chun an inkara thu po po chu Mizpa khuoa chun LALPA hmaah iengkim a hril non nawk vong a.
12. Chu zoa chun Amon lal kuomah, "I theida zawng iem kan thaw a, kan ram bei dinga i hung inthok el hi?" tia indon dingin Jeftha chun palai a tir a.
13. Amon lal chun Jeftha palai kuomah, "Aiguptaa inthoka Israel thlahai an hung tung lai khan Arnon vadunga inthoka Jabok vadung le Jordan vadung chena mi ka ram an mi lakpek lei a nih. Chu chu ieng khom hril buoi ta loin hung pe kir nawk raw hai se" tiin thu a lo incha a.
14. Jeftha chun Amon lal kuomah palai a tir nawk a, hi thu hi a thon a:
15. "Hieng hin Jeftha chun a hril: 'Israel thlahaiin Moab-hai ram amanih, Amon-hai ram amanih an lakpek nawh.
16. Aigupta rama inthoka an hung suok khan Tuipui Sen le thlaler ram pal tlangin Kadesh chen an hung a.
17. Chu taka inthok chun Edom lal kuomah, 'I ram hraw tlang mi phalpek rawh' tia hni dingin palai an tir a, sienkhom Edom lal chun a lo ngaithlak nuom naw a. Moab lal kuoma khom palai an tir a, sienkhom a remti naw a. Chu lei chun Israelhai chu Kadesh-ah an um ta zing a.
18. " 'Chu zoah thlaler ram chu fe thlengin, Edom le Moab ram chu an hel kuol a, Moab ram sak tieng an fe a, Arnon vadung ral tieng umhmun an khuor a. Moab ram an lut hrim hrim nawh, Arnon vadung chu Moab ramri bul a ni chauh a nih.
19. " 'Chu taka inthok chun Amor lal, Hesbon khuoa um Sihon kuomah, 'Kan ram tieng kan pan theina dingin i ram kan hraw tlang mi phalpek hram rawh' tiin palai an tir a.
20. Sihon chun a ram hraw tlang dingin Israelhai chu a ringhla leiin a mihai po po a khawm a, Jahaz-ah an inkul a, Israelhai an lo bei a.
21. " 'LALPA, Israel Pathien chun Sihon le a mihai po po chu Israelhai kutah a pek a, an hne a, chu rama um Amor mihai ram po po chu an lak vong a,
22. Arnon vadunga inthoka Jabok vadung chen le thlalera inthoka Jordan vadung chenin an nei ta vong a ni kha.
23. " 'LALPA, Israelhai Pathien chun ama mi Israelhai hmaah Amorhai chu a hnot suok a ni leiin, nangin lakpek theina ding thu iem i nei a?
24. In pathien Kemos-in i puol dinga a ruotpek che chu i nei el naw ding maw? Chuong ang bok chun, LALPA kan Pathienin a mi pek chu kan hluo ding a nih.
25. Moab lal Zipor naupa Balak nekin i hrat lem am a ni? Ama chun Israelhai chokbuoiin a do hlak am a ni?
26. Hesbon le a khawper hai, Aroer le a khawper hai, Arnon ramri depa khuoa hai kum zathum zet Israelhai an um lai khan ieng dinga la kir loa lo la um zing am i na?
27. Chuleiin, i poi ieng khom ka tawk nawh; nangin mi bei i nuom leiin ka poi i tawk lem a ni hi. LALPA, Roreltu chun tuhin Israelhai le Amon thlahai kara thu chu ngaituo raw se' a tih" tiin.
28. Nisienlakhom, Amon lal chun Jeftha thucha chu a lo ngaithlak nuom nawh.
29. Chun, LALPA Thlarau chu Jeftha chungah a hung tlung a. Gilead le Manase-hai ram chu kanin, Gilead-a Mizpa chu a fe thleng a, chu taka inthok chun Amon mihai chu bei dingin hma a nor pei a.
30. Jeftha chun LALPA kuomah, "Amon thlahai hi ka kutah i mi pek takzet chun,
31. Amonhai laka hnena changa in tieng kan lawi nia ka in kotkhara inthoka hung suok hmasa tak chu LALPA ta ding ning a ta, LALPA ta dinga pumraw thilhlanah inhlan ka tih" tiin thu a'n kham a.
32. Jeftha chun Amon mihai chu a do a, LALPAN anni chu a kutah a pek a.
33. Aroer-a inthoka Minit vel chen le Abel Keramim chenin, khaw sawmhni a sukram vong a, Israelhai chun Amon mihai chu an tukdol ta der a.
34. Jeftha chun a khuo Mizpa a hung tlung a. Chun, ngai ta, a naunu chun khuongte leh lamin a lo hmuok a! Ama chu a nau nei sun a na, ama chauh naw chu nau pasal amanih nau nuhmei amani dang a nei nawh.
35. A naunu a hei hmu chun a silfen a keithler a, "E khai, Bawinu, i mi sukbeidongin i mi va hang sukrimsi ngei de aw! LALPA kuomah ka lo inkham ta laklaw a, sut nawk thei ka ni ta bok si nawh" a ti vong vong a.
36. A naunu chun, "Pa, LALPA kuomah bau i lo phong ta si chun, LALPAN i hmelma Amon mihai chunga phuba a lakpek ta bok si che leiin, i baua thu suok angin iengkim ka chungah i thaw ding annawm.
37. Amiruokchu, thil pakhat char mi phalpek rawh. Thla hni sung tlangrama khin keimain hang rol hmang ka ta, ka ruolhai leh ka nunghakna hi hang sun kan tih, pasal nei ngai lo ding ka ni si a" a ta.
38. A pa chun, "Fe mol rawh" a ta. Thla hni sung thang dingin a'n fetir a, an suok a, ama le a ruolhai chun a nunghakna chu an hang sun a.
39. Thla hni zoah a pa kuom tieng a hung kir nawk a, a lo inkham tah ang chun a chungah a pa chun a thaw a. Nunghak thienglam a nih.
40. Hi taka inthok hin Israel nunghakhai chun kum tin ni li sung fe suoka Gilead mi Jeftha naunu sun chu thaw danah an lo nei tah a nih.
←  Judges (11/21)  →