| ← Judges (10/21) → |
| 1. | Abimelek hnunga chun Israelhai san suok dingin Isakar hnama mi Dodo naupa Pua, Pua naupa Tola chu a hung suok a, Efraim tlangram Samir khuoah a um a. |
| 2. | Kum sawmhni le kum thum Israelhai chungah ro a rel hnungin a thi a, Samir khuoah an phum a. |
| 3. | Chu hnung chun Gilead mi Jaira a hung suok a, kum sawmhni le kum hni sung Israel chungah ro a rel a. |
| 4. | Ama chun nau pasal sawm thum, sabengtung tuoi sawm thum chunga chuong hlak mi a nei a, Gilead rama khaw sawm thum chungah ro an rel a, chuonghai chu tu chen hin Havot-Jair (Jaira khuo) ti an la ni vong. |
| 5. | Jaira chu a thi a, Kamon khuoah an phum a. |
| 6. | Israel thlahai chun LALPA mithmuah thil suol an lo thaw nawk ta a. LALPA chu nghatsana a rong bawl ta loin, Baal dam, Astoret dam, Aramhai pathien dam, Sidonhai pathien dam, Moabhai pathien dam, Amonhai pathien dam, Filistinhai pathien rong dam chu an bawl ta lem a. |
| 7. | Chuleiin, an chungah Pathien a lungsen hle a, Filistin-hai le Amon-hai kutah a zor a. |
| 8. | Chu kum chun an hung hne ban a, an sirsop nasa hle a. Kum sawm le kum riet sung chu Jordan ral Gilead biel Amor mihai rama cheng Israel thlahai po po chu an neksawr a. |
| 9. | Chun, Amon-hai chun thlang tienga um Juda hai, Benjamin hai le Efraim sungkuohai chu do dingin Jordan an kan a, Israelhai chu nasa takin an lungzing a. |
| 10. | Chu phing leh Israel thlahai chun, "Kan Pathien kan lo nghatsan a, Baal rong dam kan lo bawl tak leiin i chungah thil suol kan lo thaw a nih" tiin LALPA an ko a. |
| 11. | LALPA chun Israel thlahai kuomah, "Aigupta mi hai, Amor mi hai, Amon mi hai, Filistin mi hai, |
| 12. | Sidon mi hai, Amalek mi hai, le Moan mi haiin an neksawr cheua in mi ko khan an kuta inthokin ka san suok hlak naw cheu am a ni? |
| 13. | Sienkhom mi nghatsanin pathien danghai rong in bawl a, chuleiin, san suok ta nawng ka ti cheu. |
| 14. | In thlang lem pathienhai kuoma chun fe unla, anni chu ko khek ta unla! In lungzing pha leh annin hung san suok cheu raw hai se chu!" a ta. |
| 15. | Nisienlakhom, Israel thlahai chun LALPA kuomah, "Thil suol kan lo thaw tah a na, kan chungah tha i ti ang angin thaw la, amiruokchu tu hin chu mi san suok lul rawh" tiin an ngen tal a. |
| 16. | Chuongchun, hnam dang pathien an kolhai po po chu an sie hmang vong a, Pathien rong an bawl a, Israelhai rimsikna chu a tosan sawt thei nawh. |
| 17. | Chuonga Amon mihai inralthuoma Gilead rama an inkul lai chun Israel thlahai khom pung khawmin Mizpa-ah an inkul a. |
| 18. | Chun, Gilead rama an hotuhai chu an inrawn khawm a, "Amon mihai bei hmasatu tak chu Gilead rama umhai lu takah um raw se" an ta. |
| ← Judges (10/21) → |