Judges (1/21)  →
1. Josua thi hnung chun Israelhaiin LALPA kuomah, "Kan ta dinga Kanan mihai do dinga inthok hmasatu tak ding chu tu hnam am ning a ta?" tiin an indon a.
2. LALPA chun, "Juda thlahai inthok suok hmasa tak raw se, a kutah ram chu ka pek tah" a ta.
3. Juda thlahai chun an unau Simeon thlahai kuomah, "LALPAN a mi pek rama chun Kanan mihai mi hang dopui unla, nangni khom in ram chanpuola um mihai chu dopui veng kan ti cheu" an ta, chuongchun Simeon thlahai chun an fepui a.
4. Judahai chun an hang do a, Kanan mihai le Periz mihai chu LALPAN an kutah a pek a, Bezek khuoah mi sing khat an that a.
5. Kanan mihai le Periz mihai chu an tukdol lai chun Adoni-Bezek khom an hang hmu a, an bei a,
6. a tlan suok a, sienkhom an hnot zui a, an man a, a kutpui le kepui an tanpek a.
7. Adoni-Bezek chun, "Lal sawmsari kutpui le kepui ka tanpekhaiin ka dawkan hnuoiah ka bu mal tla an rut hlak a, ka thaw ang charin Pathienin a mi thungrul ve a ni tah hi" a ta. Ama chu Jerusalemah an thuoi a, chu taka chun a thi a.
8. Juda thlahai chun Jerusalem an hang bei a, an lak a, khawpui chu kawlhnamin an sam a, an raw bok a.
9. Chu hnung chun tlang ram le sim tieng le tlak tieng pang tlang thuta um Kanan mihai chu bei dingin Juda thlahai chu an fe thla a.
10. Hebron (Kiriat Arba an ti hlak bok) a Kanan mihai chu an va bei a, Sesai hai, Ahiman hai le Talmai hai chu an that a.
11. Chu taka inthok chun Debir khuo, kha hmaa Kiriat Sefer an ti hlak chu an va run a.
12. Kaleb chun, "Kiriat Sefer beia latu tu chu ka naunu a nuhmei dingin peng ka tih" a ta.
13. Kaleb sangpa Kenaz naupa Othniel chun a lak a, Kaleb chun a naunu Aksa chu nuhmeiah an neitir a.
14. Ni khat chu a pasal Othniel kuomah Aksa chu a hung a, a pa kuoma ram hni bel dingin a pasal chun a lo infui a. Chun, a sabengtung chunga inthoka Aksa a hung tum chun Kaleb-in, "Iem ka thawpek thei ding che?" tiin a lo indon a.
15. Ama chun, "Thil hni che ka nuom a nih. Sim tieng ram i mi pek ta si hin chu tuikhur khom hi mi pe sa law law rawh" a ta. Kaleb chun tuikhur chuonchung le tuikhur chuonhnuoi chu a pek a.
16. Ken mi Mosie tarpupa thlahai chu Tum khawpuia inthok chun Juda thlahai leh sim tienga Judai ram thlaler, Arad kawla chun an inson tung a.
17. Chun, Juda thlahai chu an unau Simeon thlahai leh an inthok suok a, Zefat khuoa um Kanan mihai chu an hang bei a, an khawpui an suksiet vong a. Chuleiin chu khawpui hminga chun Hormaa an inbuk a.
18. Juda thlahai chun Gaza le Askelon le Ekron khawpui, mania rambung nei seng chu an lak bok a.
19. LALPA chu Judahai kuomah a um a, tlangrama chenghai chu an hnot hmang vong a, phairuoma chenghai ruok chun thir tawlailir an nei leiin an hnot suok thei nawh.
20. Mosien thu a lo tiem tah angin, Hebron khuo chu Kaleb an pek a, chu taka mi Anak naupa pathumhai chu a hnot suok a.
21. Benjamin thlahai ruok chun Jerusalem hluotu Jebu-hai chu an hnot suok naw leiin, Jebu-hai le Benjamin thlahai chu tu chen hin Jerusalemah an la cheng hmunkhat ta zing a nih.
22. Josefa sungkuohai khom Bethel bei dingin an inthok suok a, anni chu LALPAN a umpui a.
23. Josefa sungkuohai chun enthlatu ding Bethela chun mi an tir a (Bethel hming hmasa chu Luz a nih).
24. Enthlatuhai chun khaw sunga inthoka hung suok mi pakhat hi an hmu a, a kuomah, "Khawpui sung lutna mi hril la, i chungah tha takin thawng kan tih" an ta.
25. Khawpui sung lutna chu a hril a, chuongchun kawlhnamin khuo chu an bei a, chu mipa le a sunghai ti chauh naw chu tu khom damin an hla nawh.
26. Chu mipa chu Hit-hai ramah a lut a, khuo a siem a, a khaw hmingah 'Luz' a'n buk a, tu chen hin chu hming chu a la put a nih.
27. Khuo hieng Bet San hai, Tanak hai, Dor hai, Ibleam hai, Megido hai le an khawpera cheng Kanan mihai chun a ramah um lui an tum tlat leiin Manase hnamhai chun an hnot suok tawl nawh.
28. Israelhai an hung hrat hnung khomin Kanan mihai chu sinthawa sor dingin an inumtir a, an hnot suok fai vong ta nawh.
29. Efraim hnamhai chun Gezer khuoa Kanan mihai chu an hnot suok naw a, Gezer khuoa chun anni lai an cheng ve ta lem a nih.
30. Zebulun hnamhai khomin Kitron le Nahalol khuoa Kanan mihai chu an hnot suok bik bok nawh; Kanan mihai chu sinthawa sor dingin anni lai an um ta zing a nih.
31. Aser hnamhai chun hieng Ako, Sidon, Ahlab, Akzib, Helba, Afek le Rehob khuoa umhai chu an hnot suok nawh;
32. hieng lei hin Aser hnamhai chu Kanan mihai lai an um ta lem a nih.
33. Naftalia hnamhai chun Bet-semes khuo le Bet-anat khuoa umhai chu an hnot suok nawh; chu rama um Kanan mihai lai chun an cheng ve a, Bet-Semes le Bet-Anat khuoa umhai chu sinthawa sorah an hmang ta lem a nih.
34. Amor mihai chun Dan hnamhai chu tlangram tieng an hnot tom vong a, phairuom tienga an hung tlak thlak an phal nawh.
35. Heres tlang le Aijalon le Salbim khuoa hai chun Amor mihai chun thang an khaw nghet tlat a; amiruokchu Josefa sungkuo an hung hrat pei hnung chun sinthawa sor dingin an hung hmang tah a nih.
36. Amorhai ramri chu Ainuvet Kawn (Akrabbim) a inthoka Sela le a khel ram chen a nih.
      Judges (1/21)  →