←  Joshua (9/24)  →
1. Hieng thilhai hi Jordan vadung thlang tienga lalhai po po, tlang le phai le tuifinriet zau tak kam tluona cheng, Lebanon chena inzar phei Hit hai, Amor hai, Kanan mihai, Periz hai, Hiv hai le Jebu haiin an lo hriet chun,
2. inthuruola Josua le Israelhai chu do hrawn tumin an pung khawm a.
3. Nisienlakhom, Josuan Jeriko khuo le Ai khuo a thaw dan Gibeon mihaiin an lo hriet chun,
4. dawha hmangin an che thung a. Palai anga insiemin, an ip hlui tak tak hai le savuna siem uoiin peng hlui tak tak, inek phen phun le phawk ta hai chu sabengtung an hung inphurtir luoi a;
5. pheikhok hlui tak le inphawk tek tuk an bun a, zakuo tiek neng nung an hak a; bei tawl ngar vun el, a then chu hmuor ta dam fak dingin an chawi a.
6. Chuong ang chun Gilgala an inkulnaa chun Josua kuomah an fe a, ama le Israelhai kuoma chun, "Ram hla taka inthoka hung kan na, thu mi thlungpui ro" an ta.
7. Israel mihai chun Hiv mihai kuoma chun, "Kan kawl hnaia um khom in lo ni el thei a, nangni leh iengtin am thuthlung siem thei kan ta?" an ta.
8. Anni chun Josua kuomah, "In siehlawhai kan ni hih" an ta. Josua chun, "Tuhai am in na, khaw laia inthoka hung am in na?" tiin a'n don a.
9. Anni chun, "LALPA in Pathien hi a hming a'n thang em leiin i siehlawhai hi ram hla taka inthoka hung kan nih. A chanchin an hrilhai kan lo hriet ve hlak a: Aigupta rama a thilthawhai po po dam,
10. Jordan suo tienga Amorhai lal pahnih- Hesbona lal Sihon le Basan ram lal, Ashtarot khuoa um Oga hai chunga a thilthaw po po hai kha kan lo hriet si a.
11. Chun, kan upahai le kan rama chenghai po poin, 'Lampuia in fak ding chawi unla, anni chu va'n biekpui unla, an kuomah, 'In siehlaw kan ni hi; kan kuomah thu thlung ro' ti dingin thurawn an mi pek a.
12. Hi bei hi in kuom tieng hung dinga kan suok tuka lum hlota kan fun a na, tu hin chu a khong ta hle a, a ap rak an tah.
13. Hieng uoiin chawina savun penghai dam hi uoiin kan thun chun savun thar a la ni a, tu ruok hin chu a kak tuor el ta hi. Kan inzin sawt leiin kan silfenhai le pheikhokhai khom a tiek zo tah a nih" an ta.
14. Israel mihai chun fak ding an chawihai chu an en vela chu ieng khom an chungchang thuah LALPA an rawn nawh.
15. Chuongchun, Josua chun inremna thuthlung a siempui a, chu chu pungkhawm hotuhai chun inkham meuin an pompui a.
16. Remna thuthlung an siempuia inthoka ni thuma chun Gibeon-hai chu an kawl hnai tea um an nih ti Israelhai chun an hriet suok ta a.
17. Israel thlahai chu an fe pei a, ni thum niin an khawpuihai an tlung a. An khawpuihai chu Gibeon dam, Kefira dam, Berot dam le Kiriat-Jearim dam a nih.
18. LALPA, Israelhai Pathien hminga pungkhawm hotuhaiin an kuoma inkham meua thu an lo thlung ta leiin, anni chu Israelhaiin an bei ve nawh. Hi lei hin pungkhawmhai chu an hotuhai chungah nasa takin an chier a.
19. Sienkhom an hotuhai chun an kuomah, "LALPA, Israel Pathien salin an kuomah kan lo inkham ta si a, chuleiin anni chu ei tawk a thieng nawh.
20. An kuomah ei lo inkham ta si leiin ei thu ei bawsiet chun ei chungah lungsenna tlung rawi a tih, hieng ang hin an chungah thawng ei ta, hla tawl el ei tih.
21. Hla tawl ei ta, sienkhom pungkhawm po po thing phurtu le tui chawituah hmang ei tiu" an ta, chuongchun hotuhai thu lo intiemkamna chu an zawm ta a.
22. Josua chun Gibeon-hai chu a ko a, an kuomah, "Keini hnaia cheng ve ni zing si a ieng dinga ram hla taka hung anga inhrila in mi hlem am a na?
23. Chu lei chun tongsie phur in hung ni ta a, kan Pathien ina thing ti ding phurtu le tui chawituah thangin kan bawiah um zing in tih" tiin a hril tawl a.
24. Anni chun Josua kuomah, "LALPA in Pathien chun hi ram hi a pek cheu a, a sunga chenghai po po sukhlum vong dingin a siehlaw Mosien thu a pek ti khom kan ring a. Chuongchun, hma in hung sawn pei dan kan hrietin, in mi that kan inlau a, hieng hin kan hung thaw el a nih.
25. Ngai ta, tu hin i kuta um kan ni a, i ngaia tha le indika i hriet ang chun kan chunga hin thaw pei rawh" an ta.
26. Chuongchun, anni chu a hum a, Israelhan an that a khap a.
27. Chu nia inthok chun Gibeonhai chu pungkhawmhai le LALPAN a la ruot ding hmuna LALPA maicham ta dinga thing phurtu le tui chawituah a ruot a, voisun ni chenin chu sin chu an thaw ta pei a nih.
←  Joshua (9/24)  →