←  Joshua (8/24)  →
1. Chun, LALPAN Josua kuomah,"Ti naw la, zam bok naw rawh. Tho la, i sipai po po thuoi la, Ai khuoah hang fe rawh; ngai ta, Ai khaw lal le a mihai le a khuo le ram chu i kutah ka pek ta che.
2. Jeriko le an lal chunga i thaw ang bok khan Ai khuo le an lal chunga khom i thaw ve ding a nih. Rallak le ranhai chauh nangni puola dingin la thei in tih. Chun, a ruka khawpui inchantu ding a hnung tieng mi sie rawh" a ta.
3. Chuongchun, Josua le a sipaihai po po chu Ai khuo bei ding chun an inthok suok a. A mi huoisen laia mi sing thum a thlang suok a, zana chun a tir suok a.
4. An kuoma chun, "Fimkhur takin ngaithla ro. Khawpui bei dingin a khaw hnung tieng a rukin in inchan ding a nih. Khawpuia inthokin um hla taluo naw ro. Inrengin inring zingin um ro.
5. Kei le ka kuoma um po poin khawpui chu hung hnai kan ta, a hma anga mi bei dinga an hung suok charin an hmaah tlansieng kan ta.
6. A hmaa ang bok khan ei hmaah an tlanse nawk ta rek ie' tiin mi hung hnot an ta, kan thlem suok thei chen chen thlem suok kan ta.
7. Kan tlanse pha leh in inchan ruknaa inthokin hung suok in ta, khawpui chu in lak ding a nih.
8. Khawpui in lak charin raw nghal ro. LALPAN thu a pek ang cheu khan thaw ro. Chuong ang tak chun thaw ro, thu ka pek ta cheu hi" a ta.
9. Josua chun anni chu a'n fetir a, Ai khaw thlang tieng, Bethel le an inkara chun an inhuol ruk a; chu zan chun Josua ruok chu mipuihai lai puon inah a riek a.
10. Zingkar inhma takin Josua chun a mihai chu a khawm a, ama le Israelhai hotuhai chu Ai khuo panin mipui hmaah an inthok suok a.
11. A kuoma um ral do mihai po po khom Ai khuo panin an inthok suok a, a khaw bul an hang tlung a, hmar tieng tlangah thanghmun an khuor a, Ai khuo le an inkara chun ruom a um a.
12. Ai khuo thlang tieng, Bethel le inkara inchantu dingin mi sang nga a sie a.
13. Hmar tienga inthoka bei pawl ding sipaihai thanghmun le thlang tieng panga inthoka aruka inchantu dinghai thanghmun a rel fel vong hnungin, chu zan chun Josua chu ruoma chun a fe a.
14. Ai khaw lalin a hmu chun ama le khawpuia a mihai chu zingkar inhma takin an tho a, a hmun ruot Araba zawna chun Israelhai chu bei dingin an inthok suok a; khawpui hnung tieng chun ama bei dingin an inchan ti a hriet si nawh.
15. Josua le Israel mihai po po chu a tlawm lem ni awm takin thlaler tieng an tlan ta hum hum el a.
16. Khawpuia umhai po po chu anni hnot dingin an inko khawm a, Josua chu an hnot a, khawpuia inthok chun a thlem suok tawl ta a.
17. Ai khuo le Bethel khuoa mihai chu Israelhai hnotin an inthok suok vong leiin an khawpui chu khar loin an maksan el ta a.
18. Chu phing leh LALPAN Josua kuomah, "I kuta fei i chawi khan Ai khuo tieng tin rawh; i kutah hi khawpui hi ka pek ding che a nih" a ta. Chuongchun, Josua chun a feiin Ai khuo tieng chu a hei tin a.
19. Aruka inchantuhai kha an hung suok nghal a, a kut a phar charin an tlan a, khawpuia chun an lut a, an lak a, an raw ta nghal a.
20. Ai khaw mihaiin an hnung tieng an hei thlir chun khawpui kang khu van tienga fe tung ngut ngut el chu an hmu a, khaw tieng tieng khom hang tlan theina an nei ta nawh- thlaler tienga an hnothai khan a hnottuhai chu an hung hnot let ve thung ta bok si.
21. Aruka inchantuhaiin khawpui chu an lak tah ti Josua le a mihaiin an hmu chun Ai khuoa mihai bei ding chun an inlet kir a.
22. Khawpui latu pawl chu khuoa inthokin bei dingin an hung suok bok a, Israelhai chun an karche a, khing tieng khing tieng an dang chep leiin pakhat khom hla le insuo an nei nawh.
23. Ai khaw lal chu a hringin an man a, Josua kuomah an thuoi a.
24. Ai khaw mi, phula um le thlaler tienga anni hung hnottuhai po po khom chu kawlhnama an that fai vong hnungin, Israelhai chu Ai khuoa la um hai that dingin an lut a.
25. Chu nia Ai khaw mi an that po po chu, a nuhmei a pasalin, singkhat le sanghni an nih.
26. A fei inletna kutin Ai khuohai po po a rawt ram der hma khat chu Josua chun a kut a'n thla nuom si nawh.
27. LALPAN thu Josua a pek angin, chu khawpuia ranhai le rallakhai ruok chu anni puola dingin Israelhai chun an lak a.
28. Josua chun Ai khuo chu a raw a, kumkhuoa hmunhnok bum khawmna muol le voisun ni chena hmun rausanah a'n changtir tah a nih.
29. Ai khaw lal chu zan tieng chenin thinglerah a khai a, nisa tlak tawmin thlinglera inthok chun an lak thlak a, khawpui kul kotkhar bula chun a ruong chu an pei a, a chunga chun lung an intieng vum thur a, chu chu tu chen hin a la um.
30. LALPA siehlaw Mosiein ziek ngeia a Dan Bua Israel thlahai kuoma thu a pek angin, Josua chun lung ser lo le thir ha be la tuor ngai der lo ngot hmangin Ebal tlanga chun LALPA, Israelhai Pathien ta dingin maicham a siem a.
31. Chu maichama chun LALPA ta dingin pumraw thilhlan le inremna thilhlanhai inhlanin a'n thawi a.
32. Chu taka chun Israel thlahai hma ngeiah, Josua chun Mosien dan chu lunga chun a ziek sawng a.
33. Malsawmpek anni ding phaa an thaw dan ding LALPA siehlaw Mosien a lo hril tah angin, Israel thlahai po po chu an upa hai, hotu hai, roreltu hai le anni laia um hnam dang mihai leh chun thiempu Levihai zawn LALPA Thuthlung Bawm tieng nghain, khing tieng khing chun an ngir a, a zatve chun Gerizim tlang an hmason a, a zatve dang chun Ebal tlang an hmason bok a
34. An ngir fel hnung chun Dan bua thu po po, malsawmna thu hai, tongsie dong ding thu hai Josua chun a tiem suok a.
35. Mosie thupek po po chu Israel mi pungkhawm po po le nuhmei le naupang chikte te le anni laia hnam dang chenghai chen hrietah Josua chun tiem hmai a nei hrim hrim nawh.
←  Joshua (8/24)  →