←  Joshua (7/24)  →
1. Amiruokchu, Israel thlahai lai chun hluihlawn thilah ringum lo taka khawsa an lo um a. Juda hnama mi Zera naupa Zabdi (Zimri), chu naupa Karmi, chu naupa Akan chun hluihlawn thil a lak leiin LALPA lung chu Israelhai chungah a sen hle a.
2. Chun, Josua chun Jeriko khuoa inthokin Bethel suo tienga Beth-aven depa um Ai khuoa chun mi a tir a, an kuomah, "Hang fe unla, ram hang enthla ro" a ta. Mihai chu an hang fe a, Ai khuo chu an hang thlithlai a.
3. An hung kir nawk chun Josua kuomah, "Ai khuo bei ding chun mi po po fe ngai kher naw nih. A la dingin mi sanghni sangthum vel tir la, mi tlawmte chauh an na, mi po po suksawl kher ngai naw nih" an ta.
4. Chuongchun, mi sangthum vel chauh chu taka chun an hang fe a, sienkhom Ai khuohai chun an lo intlawm der a;
5. mi sawmthum le paruk an lo that a, an khaw kul kotkhara inthokin an lung lakna khur Sebarim chen an hung hnot a, an liem thlakna tenbarama chun an that tawl a. Chu chun mipui a sukzam a, tui angin an lungril a suktui a.
6. Chuongchun, Josua chun a silfen a pot thler a, LALPA Bawm hmaa chun hnuoi sikin zan tieng chen a bokkhup a, Israel upahai khom chun a thaw anga thaw vein, an luah pilvut an inphul a.
7. Josua chun, "E khai, LALPA Chunghnungtak, Amor-hai kuta peka sukhlum el dingin ieng leia hi mipuihai hi Jordan vadung i thuoi kai am a na? Jordan vadung rala khan lungawi takin um tok tok inlang ni ta lem ding kha!
8. Aw LALPA, hmelmahai hnota Israelhai an tlanse el ta hi, iem hril tang ka ta?
9. Kanan mihai le hieng laia cheng hnamhai hin hung hrieng an ta, mi hung inhuol an ta, hnuoia inthok hin kan hming an nuoi bo vong el ding a ni hi. Chuong chu a ni si chun, i hming ropui tak hi ieng am i law ta ding a na?" a ta.
10. LALPA chun Josua kuomah, "Tho rawh. Ieng dinga khanga i bokkhup zing am?
11. Israelhai hin thil suol an thaw a nih. An vong zing dinga thu ka pek, ka thuthlung chu an bawsiet a. Thil hluihlawn laia mi an lak a, an inruk a, khel an hril a, an thil neihai lai an zep ruk a nih.
12. Chu lei chu annawm Israelhaiin an hmelmahai an ngam naw chu. Siet tuok tlaka hluihlawna an insiem leiin annawm an tlansiet a, an hmelmahaiin an hnot thlur chu. Thil hluihlawnhai chu nangni laia inthoka in sukbo phot naw chun nangni lai ka um ta naw ding a nih.
13. Fe la, mipuihai chu inhlan thienghlim phot rawh. Hieng ang hin hril tawl rawh: 'Zinga dingin insukthienghlim ro khai. LALPA, Israelhai Pathienin, Aw Israelhai, nangni lai hin hluihlawn thil a um a nih. Nangni laia inthoka hluihlawn thil hi in lak hmang hma khat chu in hmelmahai hne thei naw ti niu.
14. Chuongchun, zinga hin a chi chiin in hung inlang ding a nih. LALPAN a pom hnamhai chu a pahnam hnamin hung an ta, LALPAN a pom pahnam chu a sungkuo kuoin hung an ta, LALPAN a pom sungkuo chu a pasal a pasalin an hung inlang ding a nih.
15. Tu khomin hluihlawn thil a kol hmu suok a ni chun, LALPA thuthlung a bawsiet lei le Israelhai lai thil suol invet thlak tak a thaw leiin, a thil nei po po leh meia raw hmang ding a nih' a ti a nih' tiin hril tawl rawh" a ta.
16. A tuk zingkar inhma takin Josua chu a tho a, Israel hnamhai chu a chi chiin a hmaah an hung inlang a, Juda chihai chu man an lo ni ta a.
17. Juda pahnamhai chu an hung inlangtir a, Zera pahnam chu an lo man a. Zera pahnamhai chu a sungkuo kuoin an hung inlangtir a, Zimri sungkuo chu man an ni a.
18. Zimri sungkuoa mi chu a mal malin an hung inlangtir a, Juda hnama mi Zera naupa Zimri, chu naupa Karmi, chu naupa Akan chu man a lo ni ta a.
19. Josua chun Akan kuomah, "Ka naupa, LALPA, Israelhai Pathien kuoma chun ropuina inkhumtirin ama chu chawimawi rawh. I thilthaw chu mi hril la, ka lakah ieng khom ip naw rawh" a ta.
20. Akan chun, "LALPA, Israelhai Pathien chungah thil suol ka thaw hrim a nih. Ka thaw dan chu hieng ang hin a nih.
21. Ei rallak lai khan Babulonad mi korfuol mawi tak le tangkaruo kilogram hni vel le rangkachak tlang kilogram chanve vel buk ka hmu a, ka'n hnar em a, ka lak el a nih. Ka puon ina hnuoi sungah ka thup a, tangka khom chu hnuoia chun a um" a ta.
22. Josua chun mi a tir a, puon in tieng chun an tlan a, a puon ina chun a lo thup ngei a, a hnuoiah tangkaruo khom a um a.
23. Chuong thilhai chu puon ina inthok chun an hung lak a, Josua le Israel mi po po hmaa chun an hung chawi a, LALPA hmaa chun an sie a.
24. Josua le Israelhai chun Zera naupa Akan chu tangka hai, korfuol hai, rangkachak tlang hai, a naupa le naunuhai, a bawngchalhai, a sabengtunghai, a beramhai, a puon in le a thil nei po po le chun Akor ruomah an thuoi a.
25. Josua chun, "Ieng ti leia hi buoina hi kan chungah i hung intlun am a na? Voisun hin i chunga khom buoina LALPAN a hung intlun ve ding a nih" a ta. Israel mipui chun Akan le a sunghai chu lungin an deng hlum a, an thil nei popo leh meiin an raw a.
26. Akan chu vum hnurin lung an indel khum a, Pathien lungsenna nasa tak chu a' kei kir nawk tah a nih. Hi hmun hi tu chen hin Akor Ruom ti a la ni zing.
←  Joshua (7/24)  →