←  Joshua (6/24)  →
1. Israelhai leiin Jeriko khuo chu an khar tlat a, tu khom a lut le suok an um nawh.
2. Chun, LALPAN Josua kuomah, "En ta, Jeriko khuo le an lal le an ral do mihai hi i kutah ka pek tah.
3. A khuo hi ral kap mi po po leh voi khat hel suok phot rawh. Chuong ang chun ni ruk sung i thaw ding a nih.
4. Thuthlung Bawm hmaah beramchal ki tawtawrawt chawi thiempu pasari infetir rawh. A ni sarina chun thiempuhaiin tawtawrawt mut an ta, khawpui chu voi sari in hel suok ding a nih.
5. Thuok seia tawtawrawt an mut ruoi ruoi ri in hriet pha leh mipuihai chu inkhektir dur dur la, khawpui kul chu chim thla rup a ta, mipui chu mani hma zawn sengah an kai tung ding a nih" a ta.
6. Chuongchun, Nuna naupa Josua chun thiempuhai chu a ko a, an kuomah "LALPA Thuthlung Bawm kha zawn unla, a hmaah tawtawrawt chawi thiempu pasari fe raw hai se" a ta.
7. Mipuihai kuoma chun, "Hma tieng pan peiin khawpui chu hel suok ro. Ralthuom chawihai kha LALPA Bawm hmaah a hmatawngah fe raw hai se" tiin thu a pek a.
8. Mipuihai kuoma Josuan thu a hril zo chun LALPA hmaa beram ki tawtawrawt pasari chawi thiempuhai chun an tawtawrawt chawi chu mutin an inthok suok a, LALPA Thuthlung Bawm zawntuhai chun an zui a.
9. Tawtawrawt mut thiempuhai hmaa chun ralthuom chawi pawl chun hma an thuoi a, vengtuhai chun hnung dalin Bawm chu an som a.
10. Chun, Josua chun mipuihai kuomah, "Khek naw unla, in rawl khom suksang naw ro. Khek ro ka ti pha le chauh in khek ding a nih" a ta.
11. Chuongchun, LALPA Thuthlung Bawm chun khawpui voi khat a'n hel suoktir a, chu zo chun mipuihai chu an riebuk tieng an kir a, chu taka chun an riek a.
12. Zingkar inhma takin Josua chu a tho a, thiempuhai chun LALPA Thuthlung Bawm chu an zawn a.
13. Chun, tawtawrawt pasari chawi thiempu pasarihai chun tawtawrawt mutin LALPA Bawm hmaah an fe a, a hmatawngah ralthuom chawi ral do mihai chu an thang a, a hnungdaltuhai chun Bawm chu an som a, thiempuhai chun fe malamin tawtawrawt an mut zing a.
14. A ni hnina khom chun khawpui chu voi khat an hel suok a, riebuka chun an hung kir nawk a; chuong ang ngot chun ni ruk sung an thaw a.
15. A ni sari ni chun vartienah an tho a, a hmaa an thaw ang bokin khawpui chu an hel suok a, amiruokchu hi ni hin voi sari zet an hel suok a nih.
16. Voi sari an helna dinga thiempuhaiin tawtawrawt an hang mut ruoi ruoi phing leh Josua chun mipuihai kuomah, "Khek ta ro leh! Hi khawpui hi LALPAN a mi pek ta si a.
17. Khawpui le a sunga thil um po po hi LALPA ta dinga inhlan fai thak ding a nih. Nawchizor Rahab le a in sunga a kuoma um po pohai ruok chu, enthlatu ei tirhai kha a lo thup leiin, hlaa hum ding a nih.
18. Amiruokchu, hluihlawnc thila chun inthier fihlim ro, chuong naw chun a ieng khom lo la pal in ta, in chungah sietna intlun rawi in tih. Chuonga in thaw chun Israelhai riebuk hi sietna phur tlakah siem in ta, buoina hung intlun in tih.
19. Tangkaruo le rangkachakhai le dar le thira siem hmangruo le thil danghai po po chu LALPA chanpuol a ni leiin, LALPA thil siekhawmna ina sie ding a nih" a ta.
20. Chuongchun, tawtawrawt a hung inri chun mipui chu an khek dur dur a. Tawtawrawt inri ruoi ruoi a, mipui an khek dur dur lai chun Jeriko kul bang chu a hung chim a, mipui chu mani hma zawn sengah an kai tung a, khawpui chu an lak ta a.
21. A khawpui chu LALPA ta dingin an inhlan a, khawpuia cheng hringna nei taphot nuhmei pasal, a chin a lien, bawngchalhai, beramhai le sabengtunghai chenin, an sukhlum vong a.
22. Josua chun ram enthla dinga mi a tir pahnihai kuoma chun, "Nawchizor ina chun fe unla, a kuoma thu in intiem tah angin, chu nuhmei chu a nei po po leh va thuoi suok ro" a ta.
23. Enthlatu tlangvalhai chu an va lut a, Rahab chu a nu le pa, a tahai leh, a nei po po le chun an va thuoi suok a, a laichin unauhai po po khom chu an thuoi suok bok a, Israelhai riebuk puo tieng an inumtir a.
24. Khawpui chu a sunga thil um po po leh an raw fai vong a; tangkaruo le rangkachakhai, dar le thira siem bur le belhai chauh chu LALPA thil siekhawmna inah an sie a.
25. Amiruokchu, Jeriko khuo enthlatu dinga a mi tirhai lo thuptu nawchizor Rahab le a nei po po le a sunghai ruok chu Josua chun a hla vong a, Israelhai lai tu chen hin an khawsa ta zing a nih.
26. Chuong lai chun Josuan, "Jeriko khuo indin thar nawk tumtu taphot chun LALPA tongsie phur a ta, a nau lutir chanin a lungphum chu phum a ta, a nau tlum tak chanin a kul kotkharhai chu indin a tih" tiin vangsietna thu chu a'n sam a.
27. LALPA chun Josua chu a umpui a, a ram pumah a hming a hung inthang ta hle a.
←  Joshua (6/24)  →