←  Joshua (5/24)  →
1. Israel thlahaiin Jordan vadung an kan zo hma poa LALPAN Jordan vadung tui a dangchat ti thu Jordan vadung thlang tienga um Amor lalhai po po le tuifinriet kama um Kanan lalhai po poin an hriet chun an lungril a tui zop a, Israelhai hang do ngamna lungril put hrim hrim an um ta nawh.
2. Chuong lai chun LALPAN Josua kuomah, "Lungthirin chemte siem la, Israel thlahai chu a tum hninaa dingin an ser vun tanpek nawk rawh" a ta.
3. Chuongchun, Josua chun lungin chemte a siem a, Gibeat Haralot-ahb Israel thlahai ser chu a tanpek a.
4. Ser a tanpekna san chu hi hi a nih: Aiguptaa inthoka hung suok, ral do thei chin po po chu Aigupta an suoksan hnung khan thlaler lamlakah an thi zo deu vong tah a.
5. Aigupta rama inthoka hung suok po po kha chu sertan sa vong an na; amiruokchu, Aigupta an suoksan hnunga thlaler lamlaka pieng po po ruok chu sertan lo vong an nih.
6. LALPA rawl an ngaithlak nuom naw leia Aiguptaa inthoka suok ral do thei chin sukbohmanga an um vong chen khan, Israel thlahai chu thlalerah kum sawmli top an invak an invak a. Inkham meua an thlatuhai kuoma a lo tiem tah nenetui le khuoizu luongna ram chu an hmu ve LALPAN a phal si nawh.
7. Chuongchun, an thlahai, anni aiaw dinga a'n dinhai chu lamlaka chun ser tan lo an la ni zing leiin chuonghai ser chu Josua in a tanpek a nih.
8. Mi po poin ser an tan hnung chun, an dam hma khat an riebuk pangngaia chun an cham zing a.
9. LALPA chun Josua kuomah, "Voisun hin Aiguptahai hmusitna cheu hi nangnia inthokin ka lak hmang tah a nih" a ta, chuleiin, chu hmun chu voisun chen hin Gilgal tia ko a la ni zing.
10. Chu thla ni sawm le palina zan tieng chun Jeriko phai Gilgala an umna hmuna chun Israel thlahaiin Fekan Kut an hmang a.
11. Fekan Kut tumtiek tuk la la chun a ram tharsuok ngei bu, chol thang lo bei le beiper an fak tan a.
12. A ram suok bu an fak tuka inthok chun manna a tla ta naw a, Israel thlahai chun manna an dong ta ngai bok nawh. Chu kuma inthok chun Kanan ram bu le bal chu an ring ta lem a nih.
13. Josua chu Jeriko khaw bula a um laiin a hang ngha a, ngai ta, a hmaa chun mi pakhat, kawlhnam phawi saa ngir a hmu a. Josua chun a pan hnai a, a kuomah, "Keini tienga thang i ni, kan hmelmahai tienga thang lem?" tiin a'n don a.
14. Ama chun, "Ni lo e, LALPA sipaihai hotua hung ka nih" a ta. Josua chun hnuoiah bokkhupin chibai a buk a, a kuomah, "Ka lalpan a siehlaw kuoma hin ieng am hril ding a nei a na?" a ta.
15. LALPA sipaihai hotu chun Josua kuomah, "I kea inthokin i pheikhok kha hlip rawh; i ngirna kha hmun thienghlim a nih" a ta. Chuongchun, Josua chun a hlip a.
←  Joshua (5/24)  →