| ← Joshua (4/24) → |
| 1. | A hnam pumpuiin Jordan an kan hnung chun LALPAN Josua kuomah, |
| 2. | "Mipuihai laia inthokin mi sawmpahni, hnam tina inthokin mi pakhat pei, thlang suok la, |
| 3. | thiempuhai ngirna Jordan vadung lailung taka inthokin lung sawmpahni la hai sien, chu chu hung put hai sien, voizana in riekna ding hmunah i kuomah hung sie raw hai se" tiin thu a pek a. |
| 4. | Chuongchun, Josua chun Israel thlahai laia mi sawm le pahni, hnam tina inthoka a thlanghai chu a ko a. |
| 5. | Josua chun an kuomah, "LALPA in Pathien bawm hmaah fein Jordan vadung lailunga lung, Israel pahnam zat, lung pakhat seng put suok ro. |
| 6. | Tuta hnunga in nauhaiin, 'Hieng lunghai hi ieng tina am a na?' tia an la hung indon pha cheu leh in ta dinga inchikna tha tak la ning a tih. |
| 7. | Chu pha chun in nauhai kuomah, 'LALPA Thuthlung Bawm hmaah Jordan tui a kang chat lei a nih; Jordan an kan laiin tui chu a hung kang chat annawm. Hieng lunghai hi Israel thlahaiin chu thil chu kumkhuoa an hriet zingna dinga an bum a nih' tiin in la hril ding a nih" a ta. |
| 8. | Josua hril ang chun Israel thlahai chun an thaw a, vadung lai taka inthok chun Israel pahnam zat lung sawm le pahni chu an put suok a, an riekna hmuna chun an sie a. |
| 9. | Chun, Thuthlung Bawm zawntu thiempuhai ngirna lai tak, Jordan vadung lailunga chun Josuan lung sawm le pahni a phun a, chuonghai chu tu chen hin a la um zing. |
| 10. | Mosien Josua a hril ang le LALPAN thaw dinga thu Josua a pek po po anga mipuiin iengkim an thaw zo vong chenin, bawm zawntu thiempuhai chu Jordan vadung lailunga chun an ngir a, mipui chu inhmaw takin Jordan vadung chu an kai ta vong a. |
| 11. | An kai vong hnung chun LALPA bawm le a zawntu thiempuhai khom mipuihai mithmuah an kai ve ta a. |
| 12. | Reuben thla hai, Gad thla hai le Manase hnam laia a zatve hai chun ralthuom chawiin, Mosien an kuoma a lo hril tah ang khan, mipui hmaah an lo kai a. |
| 13. | Indo dinga inralthuom ngot mi singli laiin indo dingin Jeriko phai chu LALPA hmaah an tlung a. |
| 14. | Chu ni chun Israel thlahai po po mithmuah LALPAN Josua chu a chawimawi a; Mosie ang bokin a dam sung inzain an ngaisang a. |
| 15. | Chun, LALPAN Josua kuomah, |
| 16. | "Thuthlung Bawm zawntu thiempuhai kha Jordan vadunga inthoka hung suok dingin thu pe rawh" a ta. |
| 17. | Josua chun, "Jordan vadunga inthok khan hung suok ta ro leh" tiin thiempuhai chu thu a pek a. |
| 18. | LALPA Thuthlung Bawm chu zawnin thiempuhai chu vadunga inthokin an hung suok a, an suok charin Jordan vadung tui chu a pangngaiin a kuong liem zur zurin a hung luong nawk a. |
| 19. | Thla khatna ni sawma chun Jordan vadunga inthokin an suok a, Jeriko sak tieng Gilgal-ah umhmun an khuor a. |
| 20. | Jordan vadunga inthoka an hung put lung sawm le pahni chu Gilgala chun Josua-in a phun a. |
| 21. | Israel thlahai kuoma chun, "Nakie hunah in thlahaiin an pahai kuomah, 'Hieng lunghai hi ieng tina am a na?' tia an la hung indon pha cheu chun, |
| 22. | Israel thlahaiin Jordan vadung hi hnuoi charah an fe kai lei a nih' tiin in la hril ding a nih. |
| 23. | LALPA in Pathien chun Tuipui Sen kan kan hma khata kan hmaa a lo sukkangchat ang khan Jordan vadung khom hi in kai hma khat chu in hmaah LALPA in Pathien chun a sukkangchat a nih. |
| 24. | Hnuoia hnam po poin LALPA kut hratzie an hriet theina ding le LALPA in Pathien chu in ti zing theina dingin hieng hi a thaw a nih" a ta. |
| ← Joshua (4/24) → |