| ← Joshua (3/24) → |
| 1. | Zingkar inhma takin Josua le Israel thlahai po po chu Sitim-a inthokin an inthok suok a, Jordan vadung an tlung a, an kan hmain chu taka chun an riek a. |
| 2. | Ni thum hnunga chun hotuhaiin riebuk chu an fang vel a, |
| 3. | "Thiempu Levi thlahaiin LALPA in Pathien Thuthlung Bawm zawna an suok in hmu pha leh in umnaa inthoka insonin anni chu in zui ding a nih. |
| 4. | Hi lampui hi a hmain in la hraw ngai naw leiin anni chun lampui kawkhmung an ti cheu. Amiruokchu, nangni le Thuthlung Bawm inkarah kilometer khat vel a um ding a nih; in va hnai taluo ding a ni nawh" tiin an hril a. |
| 5. | Josua chun mipui kuomah, "Insukthienghlim ro, zinga hin eini lai thil mak tak el LALPAN a thaw ding a nih" a ta. |
| 6. | Chun, thiempuhai kuoma chun, "Thuthlung Bawm chu zawn unla, mipui hmaah fe ro" a ti bok a. Chuongchun, bawm chu an zawn a, mipui hma an thuoi a. |
| 7. | LALPA chun Josua kuomah, "Mosie kuoma ka um hlak ang khan i kuoma khom ka um ding a nih ti an hriet theina dingin voisun hin Israel mi po po mithmua ngei ka chawimawi tan ding che a nih. |
| 8. | Thuthlung Bawm zawntu thiempuhai chu Jordan vadung kamah tui chu pala ngir dingin hril rawh" a ta. |
| 9. | Josua chun Israelhai kuomah, "Hi taka hin hung unla, LALPA in Pathien thuhai chu hung ngaithla ro. |
| 10. | Nangni lai Pathien hring chu a um zing a, in hmaah Kanan mihai, Hit mihai, Hiv mihai, Periz mihai, Girgas hai, Amor hai le Jebu hai chu matheiloin a hnot suok ding a nih ti hi thila inthok hin hre thei in tih. |
| 11. | Ngai ta u, khawvel po po LALPA Thuthlung Bawm chun in hma thuoiin hi Jordan vadung hi a kan hmasa ding a nih. |
| 12. | Tuhin, Israel hnam tina mi sawm le pahni thlang suok ro. |
| 13. | LALPA, khawvel po po LALPA thuthlung bawm zawntu thiempuhaiin Jordan vadung tui an pal tan charin Jordan vadung luong chu inchat a ta, a hnar tienga inthoka tui hung luong po po chu vum thura intiengin ngir a tih" a ta. |
| 14. | Chun, Jordan vadung kan dinga puon ina inthoka mipui an suok chun Thuthlung Bawm zawntu thiempuhai chu mipui hmaa chun an fe a. |
| 15. | Hi hun hi busik hun, Jordan vadung kuong a liem zur zur hun lai a nih. Bawm zawntuhai chun Jordan vadung chu an tlung a, bawm zawntu thiempuhai kein vakama tui a tawk charin, |
| 16. | a hnar tienga inthoka tui hung luong chu a tawp a, hla fea Zarethan sevela um khuo pakhat Adam an ti hmuna chun tumbu ang elin tui chu an tieng thur a, Tuipui Thi tienga luong thla ding chu a kangchat a, Jeriko khaw zawn taka chun mipui chun vadung chu an kai a. |
| 17. | Hnuoi chara Israel mipuiin vadung an kan vong chenin, LALPA Thuthlung Bawm zawntu thiempuhai chu Jordan vadung lailunga chun an ngir a. |
| ← Joshua (3/24) → |