←  Joshua (24/24)    
1. Josua chun Israel hnam po po chu Sekemah a ko khawm a, Israel upahai, thuoituhai, roreltuhai le hotuhai chu a'n kotir vong a, Pathien hmaa chun an hung inlang a.
2. Josua chun mi po po kuomah, "Hieng hin LALPA, Israel Pathien chun a hril: 'Tiena tlanga in thlatuhai, Abraham le Nahor pa Tera chen kha, Vadungpui khel tieng an um a, pathien dang an biek hlak a.
3. Amiruokchu, in pu Abraham chu a umna Vadungpui khela inthokin ka thuoi suok a, Kanan ram sung po po-ah ka thuoi a, chi thla tam tak ka pek a, Isak khom ka pek a ni kha.
4. Isak-a inthokin Jakob le Esau ka pek nawk a. Seir tlangram chu Esau chanpuol dingin ka pek a, Jakob le a nauhai ruok chu Aigupta ramah an fe thla a.
5. "'Chun, Mosie le Aron ka tir a, Aigupta ram chu thil mak thawa ka hrem zo hnungin ka thuoi suok cheu a.
6. Aigupta rama inthoka ka thuoi suok cheu hnungin tuipui in va tlung a, Aigupta mihai chun in thlatuhai chu tawlailir le sakor chung chuong mihai leh Tuipui Sen chenin an hung hnot a.
7. Anni chun thangpuitu dingin LALPA an ko a, Aigupta mihai le nangni inkara chun thimpui ka'n tlaktir a; chun, anni chu tuipuiin ka'n tuomtir a, a chim pil ta vong a. Aigupta mihai chunga ka thaw po po chu mit ngeiin in hmu vong a ni kha. Chu zoah thlalerah hun sawt tak in khawsa a.
8. " 'Chun, Jordan sak tienga um Amor mihai ramah ka thuoi tlung cheu a. An lo do cheu a, sienkhom in kutah ka pek tawl a. In mithmua ngei ka sukbohmang tawl a, an ram ka lakpek a.
9. Moab lal Zipor naupa Balak-in a do ding lai cheu khan tongsie inphurtu ding cheuin Beor naupa Balaam chu a ko a.
10. Amiruokchu, Balaam thu chu ka ngaithlakpek naw a, nangni mal a sawm ta lem hlauh cheu a, a kuta inthokin ka sansuok cheu a ni kha.
11. "'Chu zoah Jordan in kan a, Jeriko in hung tlung a. Jeriko khuohai chun an lo do cheu a, chuong ang bokin Amor mi hai, Periz mi hai, Kanan mi hai, Hit mi hai, Girgas mi hai, Hiv mi hai le Jebu mi hai chun an do cheu a, sienkhom in kutah ka pek tawl vong a.
12. In hmaah khuoingal hon ka tir a, in hmaah anni chu an lo hnot hmang a, Amor lal pahnihai ngei khom kha, in kawlhnam le in thalngul leia zam an ni nawh.
13. Chuongchun, in thaw sawl thak lo ram le nangni bawl ni der lo khawpuihai ka pek cheu a, chu taka chun in um a; in ching sawl khom ni lo grep huon le oliv huona mi in fak a ni hi' tiin.
14. Josua chun a hril pei a. "Chuleiin, LALPA chu ti unla, titakzet le indik takin a rong bawl unla, in thlatuhaiin Vadungpui ral le Aiguptaa an biek hlak pathienhai kha pei hawn vong unla, LALPA rong chauh bawl ro.
15. LALPA rongbawl hi tha lo awma hrie in um a ni chun, tu rong am in bawl ding, Vadung rala in pi le puhaiin an rong an bawl hlak pathienhai rong am, annawleh tuta in umna Amorhai rama an pathienhai rong lem am in bawl ding ti voisun hin thlang ro. Kei le ka sunghai ruok hin chu LALPA rong a nih kan bawl ding" a ta.
16. Mipui chun, "LALPA Pathien maksana pathien danghai rong kan bawl chu thil hnai lo a nih.
17. LALPA kan Pathien ngei chu annawm keini le kan thlatuhai Aigupta bawia inthoka mi thuoi suok a, kan mithmu ngeia thilmak nasa tak thaw a, kan inzin sung po po le lampuia hnam tam tak kan pal tlanghai laka khom mi huolhimtu chu.
18. LALPA chun kan hmaah hnam po po, chu rama um Amor-hai ngei khom chu, a hnot suok vong a nih. Chuleiin, keini khomin LALPA rong a nih kan bawl ding; ama chu kan Pathien a ni si a" tiin an don a.
19. Josua chun mipui kuomah, "LALPA rong chu in bawl thei ngut dim maw! Ama chu Pathien thienghlim a na; ama chu Pathien thikthu sie a nih. In helna le in suolnahai ngaidam naw nih.
20. LALPA chu nghatsan a, ram dang mi pathienhai rong in bawl vai chun, in chunga a that zing lai hin hung ngha let thut a ta, in chungah sietna intlunin sukbohmang a ti cheu" a ta.
21. Mipuihai ruok chun Josua kuomah, "Ni lo e, LALPA rong a nih kan bawl ding chu" an ta.
22. Josua chun, "LALPA rongbawl inthlang lem thua hrepuitu chu nangni ngei hi in nih" a ta. Mipui chun, "Ni e, hrepuitu kan nih" tiin an don a.
23. Josua chun, "Chuong a ni leh tu hin ram dang mi pathien umhai po po chu inthiel fai vong unla, LALPA, Israel Pathien kuoma chun in lungrilhai pe ro" a ta.
24. Mipuihai chun, "LALPA kan Pathien rong bawl kan ta, a thu zawm pei kan tih" an ta.
25. Chu ni chun mipuihai ta dingin Josua chun thuthlung a siem a, Sekema chun an zawm ding thupek le danhai chu a pek a.
26. Hieng thupekhai hi Josua chun Pathien Danbu-ah a ziek thlak a. Chun, lung lien tak a lak a, LALPA hmun thienghlim bul saisaw kung hnuoia chun a phun a.
27. Mipui kuoma chun, "En ta u, hi lung hi ei thu mi hrepuitu ni raw se. LALPAN ei kuoma thu a hril po po kha hi lung hin a hriet vong a. LALPA lakah in ringum naw chun hi lung hi nangni kara hrepuitua ngir ding chu a nih" a ta.
28. Chu zoah Josua chun mipuihai chu anni chanpuol ram sengah a'n kirtir a.
29. Chu hnunga chun Nuna naupa Josua, LALPA siehlaw chu kum za le sawm mi niin a thi a.
30. Gaza tlang hmar tieng pang, Efraim tlang rama ama chanpuol ramri sung Timnat-sera hmuna chun an phum a.
31. Josua dam sung po le ama neka dam sawt upahai, Israelhai ta dinga iengkim LALPAN a thawpek dan tonhriettuhai an la dam sung po chun Israelhai chun LALPA rong an bawl hlak a.
32. Chun, Israel thlahaiin Aigupta rama inthoka Josefa ru an hung hawn tung chu Sekem khuoa hmun, Sekem pa Hamor nauhaia inthoka Jakobin tangka zaa ram a'n chawka chun an phum a, chu hmun chu Josefa thlahai rochanin a hung um ta a nih.
33. Aron naupa Eleazar khom chu a thi a, Efraim tlang rama ama puola hmun an pek, a naupa Finehas rochung tlanga chun an phum a.
←  Joshua (24/24)