←  Joshua (23/24)  →
1. LALPAN Israelhai chu an kawl le kienga hmelmahai laka inthoka sawt rei muongna a pek hnung chun Josua khom hung upain a tar ta hle a.
2. Josua chun Israel upa hai, thuoitu hai, roreltu hai le hotu hai chu a ko khawm a, an kuomah, "Ka upa tain ka kum khom a lo tam ta hle a.
3. LALPA in Pathienin hieng laia hnamhai chunga nangni leia a thaw danhai kha in hmu a, LALPA in Pathien chun ama ngeiin a dopek cheu a ni kha.
4. Sak tieng Jordan vadung le thlang tieng Tuipui Lien chen inkara cheng hnam ei hne tahai le ei la tukdol lohai umna ram chenin in ram chanpuola dingin ka ruot fel vong tah kha hre zing ro.
5. Anni chu in hmaa inthokin LALPA in Pathien ngei chun hnot suok vong a ta, in mithmu ngeiah nam dok tawl a ta, LALPA in Pathienin a tiem cheu ang khan an ram chu hluong in tih.
6. "Chuleiin, hrat takin um unla, Mosie dan lekhabua chuong po po hi voi tieng amanih chang tieng amanih in petsan nawna dingin fimkhur takin zawm ro.
7. Nangni laia hnam la umhai leh hin inpolsop naw ro; an pathien hminghai lam naw unla, an pathien hming salin inkham naw unla, an rong bawl naw unla, an hmaah bokkhup bok naw ro.
8. Tuta chena in um ang hin, LALPA chu chel nghet tlat ro.
9. LALPA chun in hmaa hnam ropui le hrat tak tak hai a hnotsuokpek cheu a, nangni hmaa thang thei voisun ni chen hin tu khom an um nawh.
10. A tiem tah angin LALPA chun in hmelmahai a dopui cheu leiin nangni laia mi pakhat khomin a sang tel in hnot zam el a ni khah.
11. Chuleiin, LALPA in Pathien hi hmangai dingin fimkhur ro.
12. "Amiruokchu, LALPA chu in nghatsan a, hieng hnam tam tak, nangni laia la umhai leh hin inkeizap a, nuhmei pasala in innei tuo a, in inkoppui vai chun,
13. LALPA in Pathienin in hmaah hieng hnamhai hi hnotsuokpek ta naw ni cheu ti hre chieng ro. LALPA in Pathienin a pek cheu ram tha taka inthoka a sukchimit vong hma khat chu anni chu in ta dinga bil le chang, in ruongzang ta dinga vuokna hmol, le in mit ta dinga hling hung ni lem an tih ti chieng takin hre ro.
14. "Tu hin leilung dan angin kei chu ka liem ve ding a ni tah. LALPA in Pathienin in chungchang thua thil tha a tiemhai po po a tlung kim naw pakhat khom a um nawh ti lungril le ngaituona po poin in hriet. A tiem taphot chu a hung tlung kim vong a, pakhat khom inkhel a um nawh.
15. Amiruokchu, LALPA in Pathienin thil tha a tiemhai po po a hung tlung kim tah ang bok hin, LALPA in Pathienin hi ram tha tak a pek cheua inthoka a sukbohmang vong hma khat cheu chun LALPAN thil tha lo in chunga hung tlung thei a hrilhai po po cheu khom kha la hung intlungtir a tih.
16. LALPA in Pathienin a thuthlung zawm dinga thu a pek cheu chu bawse a, ama chu fesan a, pathien danghai rong bawl a, an hmaah in kun vai chun, LALPA lungsenna chu in chungah inling a ta, ram tha tak a pek cheua inthok hin sukbohmang nghal a ti cheu" a ta.
←  Joshua (23/24)  →