←  Joshua (22/24)  →
1. Josua chun Reuben hnam, Gad hnam le Manase hnam zatve hai chu a ko a,
2. an kuomah, "LALPA siehlaw Mosien thu a pek taphot chu in zawm pei a, ka thupekhai khom in zawm pei a,
3. hun sawt taka inthok khan voisun ni chen hin in unauhai thlathlam loin LALPA in Pathienin thaw dinga a ti cheu chu in hlen pei a.
4. Tu hin LALPA in Pathienin a lo tiem tah angin, in unauhai khomin muongna an lo chang ve tah leiin LALPA siehlaw Mosien Jordan rala in chanpuol dinga ram a lo pek tah cheua chun in puon in tieng kir nawk ta ro.
5. Amiruokchu, LALPA in Pathien chu hmangai a, a lampui po po hraw a, a thupekhai chu zawm a, ama chu chel tlat a, lungril po po le thlarau po poa a rong in bawl zing theina dingin LALPA siehlaw Mosien dan thu a pekhai cheu kha fimkhur takin kengkaw tlat ro" a ta.
6. Josuan anni chu mal a sawm a, a'n fetir a, an in tieng an kir nawk ta a.
7. Manase hnam zatve chanpuol chu Basan ramah Mosien ram a lo pek tah a, an chanpuol zatve dang chu Jordan ral thlang tieng an unauhai lai Josuan ram a pek a.
8. In tieng a'n kirtir tawm chun Josuan, "In puon in tieng ran ruol tam tak leh, tangkaruo le rangkachak, dar le thir le silfen tam tak leh hnienghnar takin kir nawk ta unla, in hmelmahai laka in rallakhai hi in unauhai leh insem tlang ro" tiin malsawmnain a'n thla a.
9. Chuongchun, Reuben thla hai, Gad thla hai le Manase hnam zatve hai chun Israel thlahai chu Kanan rama Silo khuoa chun maksanin, Mosie kuoma LALPA thupek angina an ram chan Gilead ram tieng chun an kir nawk ta a.
10. Kanan ram Jordan thlang tienga um Gelilot hmun an hung tlung chun, Reuben thla hai, Gad thla hai le Manase hnam zatve hai chun vadung kamah maicham ropui le langsar tak el an siem a.
11. Kanan ram bul tak, Jordan thlang tieng, Israel thlahai rama um Gelilot hmunah Reuben thla hai, Gad thla hai le Manase hnam zatve haiin maicham an siem ti thu chu Israel mi danghai kuoma chun an hung hril a.
12. Israel pung khawmhaiin an lo an hriet chun, anni chu do dingin Silo khuoah an hung tlan khawm a.
13. Thiempu Eleazar naupa Finehas chu Israel thlahai chun Reuben thla hai, Gad thla hai le Manase hnam zatve hai umna Gilead rama chun an tir a.
14. Ama ruol chun Israel hnam tina lu tak nina chel seng mi sawm an tir sa bok a.
15. Reuben thla hai, Gad thla hai le Manase hnam zatve hai kuomah Gilead rama chun an fe a, an kuomah,
16. "LALPA mi pungkhawmhai po poin, 'Hieng el hin ieng tin am Israel Pathien laka in ringna chu a'n phet ding a na? Iengtin am LALPA chu nghatsana helin, nangni ta dingin maicham chu in insiem el a na?
17. Peor-a an thil suol thaw hman kha a huntawk ta vei leh! LALPA mihai chungah hripui an leng hiela chu, tu chen khom hin kha taka ei bawsietna kha ei la tleng fai zo naw a ni si a.
18. Tu hin LALPA chu in nghatsan nawk an ta naw maw? Voisun hin LALPA lakah in hel chun, zinga hin Israel sungkuo chungah lungsen a tih.
19. In ram hluo hi a porche a ni chun, LALPA ram sung, LALPA biekbuk umnaah hung um unla, ram chu ei intlang el ding a nih. Amiruokchu, LALPA kan Pathien maicham ti lo maicham dang hrim hrim siem zawngin LALPA lakah hel naw unla, keini lakah hel bok naw ro.
20. Zera naupa Akan-in hluihlawn thila thupek a bawsiet lei khan Israel mipui po po chungah lungsenna a tla a ni naw maw? A suolna kha ama chauin a thipui naw kha' an ti a nih" tiin an hril a.
21. Reuben thla hai, Gad thla hai le Manase hnam zatve hai chun Israel hnam tin luhai kuoma chun,
22. "LALPA ropui chu LALPA Pathien a nih. LALPA ropui, LALPA Pathien chun a hriet. Israelhai khomin hre raw hai se. Hi kan thilthaw hi LALPA laka helna le bawsietna a ni chun, voisun hin mi hla der naw ro.
23. LALPA nghatsan tuma keini ta dinga pumraw inthawina amanih, bu le bal thilhlan amanih le inremna thilhlan inhlanna dinga maicham kan insiem a ni chun LALPA ngeiin kan chungthu ngaituo raw se.
24. A nih, mi hla teu naw raw se! Nakie hin in thlahaiin kan thlahai kuomah, 'Nangni hin LALPA, Israelhai Pathien hi in hmang phak vena ding iem a um a?
25. Nangni Reuben thlahai le Gad thlahai, LALPAN nangni le keini ramri dingin Jordan hi a siem a na, LALPAA hin chanpuol in nei ve hrim hrim nawh' la hung ti hlauh rawi an ta, kan thlahai chu LALPA ti nachang hre loin siem pal an tih ti inlauna leia fimkhur thu hlaah hi thil hi kan thaw a nih.
26. Hi maicham kan siem hi pumraw thilhlan inhlanna ding amanih le inthawina ding amania kan siem a ni nawh.
27. Chuong nek hmanin, nangni le keini chun LALPA chu a hmun thienghlima ngei chawibiekin, pumraw thilhlan le inthawina thilhlanhai chu ei inhlan lem hlak a nizie eini le ei thlahai inkara inchikna dinga kan thaw a nih. Chuongchun, nakie hunah in thlahaiin kan thlahai kuomah, 'LALPA-ah chan ieng khom in nei ve nawh' an la hung ti nawna ding a nih.
28. Hi thil hi a hung tlung pal hlauh a ni khomin, kan thlahai chun, 'En ta u, ei thlatuhai khan LALPA maicham ang ang an siem hi. Hi maicham hi pumraw thil inhlanna ding le inthawina inhlanna dinga an siem a ni nawh; nangni le keini inkara hrepuitu dinga an siem a nih' an la hung ti thei ding thil ngaituoa kan thaw a ni lem.
29. LALPA chungah helin, LALPA chu voisun hin nghatsan nawng kan ta, a biekbuk hmaa LALPA ei Pathien maicham ti ngot naw chu pumraw thilhlan le inthawina thilhlan dang dang hai inhlanna dingin maicham dang siem naw top kan tih" an ta.
30. Thiempu Finehas le a hungpui Israel hnam tin luhaiin Reuben thla hai, Gad thla hai le Manase thla chanve hai thukhawchang an hriet chun an lawm hle a.
31. Thiempu Eleazar naupa Finehas chun Reuben thla hai, Gad thla hai le Manase thla hai kuoma chun, "LALPA lakah in lo hel nawzie le LALPA chu voisun hin ei kuomah a um ti ka hriet ta a, LALPA khomin Israelhai a hrem naw ding a ni chuh" a ta.
32. An inbiek zo chun thiempu Eleazar naupa Finehas le hotuhai chu Reuben le Gad thla hai umna Gilead-a inthok chun Kanan ram tieng an kir nawk a, Israelhai kuomah an thu hawn chu an ripawt a.
33. An ripawt an hriet chun an lawm hle a, Pathien an inpak a, Reuben le Gad thla hai umna hang run a, sukchimit vong ding ti thu hrim an hril ri ta nawh.
34. Reuben le Gad thlahai chun maicham hmingah Ed an inbuk a, chu chu 'LALPA chu Pathien a nizie eini inkara hrepuitu a nih' tina a nih.
←  Joshua (22/24)  →