←  Joshua (21/24)  →
1. Thiempu Eleazar le Nuna naupa Josua le Israel thlahai laia hnam tin luhai kuoma chun Levi chia mi sungkuo luhai chu an fe a.
2. Kanan rama Silo khuoah chun, "LALPAN Mosie hmangin kan umna ding khawpuihai le kan ran tlatna ding dai vela hlobet hmunhai mi pe dingin thu a lo pek a nih" tiin an va hril a.
3. Chuongchun, LALPA thupek angin, Israel thlahai chun an chanpuola inthokin hieng khuohai le a dai velhai chu Levi chihai an pek a:
4. A sungkuo kuoa insemna dinga an thum vawr chu Kohat chungah a tla hmasa tak a. Levi hnama mi thiempu Aron thlahai chu Juda hnam le Simeon hnam le Benjamin hnam hai chanpuola mi khaw sawm le khaw thum an pek a.
5. Kohat thla a danghai po chun Efraim hnam, Dan hnam le Manase hnam zatve chanpuola inthokin khaw sawm an chang a.
6. Gerson thlahai chun Isakar hnam, Aser hnam, Nafthali hnam le Basana Manase hnam zatve hai chanpuola mi khaw sawm le khaw thum an chang a.
7. Merari thlaa sungkuohaiin Reuben, Gad le Zebulun hnamhai chanpuola inthokin khaw sawm le khaw hnih an chang a.
8. LALPAN thu Mosie a pek tah angin, chuong khuohai le a sevela ran tlatna hmunhai chu Israel thlahaiin an chanpuola inthokin Levi hnamhai ta dingin an lo pek a nih.
9. An thum vawr chu Levi chi, Kohat hnama mi Aron thlahai chunga chun a tla hmasa tak leiin,
10. hieng khuohai hi Juda hnam le Simeon hnam chanpuola inthokin an pek a:
11. Judai tlangrama Anak pu Arba hming chawi khuo Kiriat Arba (Hebron an ti bok) le a dai vel chu an pek a.
12. A khaw sevela lo hmunhai le khawperhai ruok chu Jefune naupa Kaleb rochan dingin an pek a.
13. Aron thla thiempuhai chu tuol that palhai tlanna dinga inhumhimna khuo an ruot Hebron khuo bakah Libna,
14. Jatir, Estemoa,
15. Holon, Debir,
16. Ain, Jita le Bet Semes khuohai le ran tlatna ding a dai vel, a rengin khaw kuo chu Juda le Simeon thlahai chanpuola inthokin an pek a nih.
17. Benjamin hnam chanpuola inthokin khaw li- Gibeon, Geba,
18. Anathot le Almon- hai chu ran tlatna hmun leh an pek bok a.
19. Aron thla thiempuhai ta dinga khuo le a dai vela ran tlatna hmun an pek po po chu khaw sawm le khaw thum a nih.
20. Levi chi, Kohat thla danghai po chu Efraim hnam chanpuola inthokin khuo an pek a.
21. Chuonghai chu Efraim tlangrama tuol thathai tlanna dinga inhumhimna khuoa ruot Sekem, Gezer,
22. Kibzaim le Bet Horon khuohai le a dai vel ran tlatna hmun, arengin khaw li a nih.
23. Chun, Dan hnama inthokin Elteke, Gibethon,
24. Aijalon le Gat Rimon, khaw li le a dai vela ran tlatna hmun an pek bok a.
25. Manase hnam zatvea inthokin Tanak le Gat Rimon, khaw hni le a dai vela ran tlatna hmun chu an pek bok a nih.
26. Hieng khaw sawm le a dai vela ran tlatna hmunhai chu Kohat thla danghai ta dinga pek a nih.
27. Levi chia mi Gerson hnamhai chu Manase hnam zatvea inthokin tuol thathai tlanna dinga inhumhimna khuo an ruot Basan rama Golan khuo le Be Estara, khaw hnihai le a dai vel ran tlatna hmun chu an pek a.
28. Isakar hnama inthokin Kishion, Daberat,
29. Jarmut le En Ganim, khaw li le a dai vela ran tlatna hmun chu an pek a.
30. Aser hnama inthokin Misal, Abdon,
31. Helka le Rehob, khaw li le a dai vela ran tlatna hmun chu an pek a.
32. Naftali hnama inthokin Galili biela inthoka tuol thathai tlanna ding inhumhimna khuo an ruot Kedes bakah Hamot Dor le Kartan, khaw thum le a dai vela ran tlatna hmun chu an pek bok a.
33. Gerson hnam kuoma khuo le a dai vela ran tlatna hmun an pek zat po chu khaw sawm le khaw thum a nih.
34. Levi chia mi Merari thlahai ta dinga an pek po chu: Zebulun hnama inthokin Jokneam, Karta,
35. Dimna le Nahalal, khaw li le a dai vela ran tlatna hmun hai;
36. Reuben hnama inthokin Bezer, Jahaz,
37. Kedemot le Mephat, khaw li le a dai vela ran tlatna hmun hai;
38. Gad hnama inthokin Gilead biela tuol thathai tlanna dinga inhumhimna khuo an ruot Ramot, Mahanaim,
39. Hesbon le Jazer, khaw li le a dai vela ran tlatna hmun hai chu a nih.
40. Chuonghai chu Levi chia mi Merari thlahai chang chu a na, a rengin khaw sawm le khaw hni a nih.
41. Israel thlahai ram sunga Levi chihaiin khuo le a dai vela ran tlatna hmun an hluo po po chu khaw sawmli le khaw riet a nih.
42. Hieng khaw tina hin, a khaw lai khuoa khom, a dai velah ran tlatna hmun a um vong a nih.
43. Chuongchun, an pi le pua inthoka Israel thlahai kuoma LALPAN inkham meua pek a tiem ram chu an hluo a, umhmun an khuor ta a.
44. LALPAN an thlatuhai kuoma inkham meua a lo tiem tah angin, hmun tinah muongna a pek a, an hmelmahai chu an kutah a pek leiin anni hmaa thang thei tu khom an um nawh.
45. LALPAN Israel sungkuo ta dinga thil tha a lo tiemhai po po chu a thlawn hrim um loin a hung tlung kim vong a nih.
←  Joshua (21/24)  →