| ← Joshua (20/24) → |
| 1. | Chun, LALPA chun Josua a biek a, |
| 2. | "Mosie hmanga ka hril ta cheu ang khan, tu khom tum lawk lei ni loa tuol that palh chu thisen phuba la tumtu laka a him theina dingin, |
| 3. | a tuol tlanna ding khawpui ruotpek dingin Israelhai chu hril rawh. |
| 4. | Chuong khawpui laia a ienga khom chun tlan a ta, khawpui lutna kotkharah va ngir a ta, chu taka khaw upahai hrieta chun a chanchin intlun a ta, anni chun khaw sungah thuoi lut an ta, anni lai a cheng ve theina dingin a umna ding ruotpek an tih. |
| 5. | Thisen phubalatu dingin a hung hnot a ni khomin a kutah an lo pek ding a ni nawh, a tuolbawm chu a hmaa theidana nei loa pangpala a that a ni leiin. |
| 6. | Mipui roreltuhai hmaa ngira a chungthu rel a ni hma le chuong laia chu khuoa thiempu chu a thi hma khat chun, chu khuoa chun a um zing ding a nih. Chu zoah a hung tlan suoksan khuoa chun ama ina ngei kir nawk thei a tih ti hril rawh" a ta. |
| 7. | Chuongchun, Galili biel tlangrama Naftali-hai khuo Kedes dam, tlang rama Efraim-hai khuo Sekem dam, tlang rama Juda-hai khuo Kiriat Arba (Hebron) dam chu an ruot a. |
| 8. | Jordan ral sak tieng chun Reuben-hai biela thlaler tlang zawla um Bezer dam, Gilead biela Gad-hai khuo Ramot dam le Basan biela Manase-hai khuo Golan dam chu an ruot bok a. |
| 9. | Israel thlahai laia mi amanih anni laia um hnam dang mi amanih tu khom tum reng lei ni loa pangpala tuol thattu chu roreltuhaiin a chungthu an rel hma khat thisen phubalatu laka a him theina dingin, chuong khuo ruota hai chun a tuol tlan thei a nih. |
| ← Joshua (20/24) → |