←  Joshua (2/24)  →
1. Nuna naupa Josua chun, "Fe unla, a ram va thlithlai ro, abikin Jeriko khuo saw" tiin a rukin Sitima inthokin enthlatu mi pahnih a tir a. Chuongchun, an fe a, nawchizor pakhat, a hming Rahab inah an lut a, chu taka chun an tlung a.
2. Miin, "Ngai ta, voizan khan a ram enthla dingin Israel thlahai an hung a nih" tiin Jeriko lal chu an hril a.
3. Jeriko lal chun Rahab kuomah mi a tir a, "I ina hung tlung mikhuolhai kha hung thuoi rawh, a ram pumpui enthla dinga hung an nih" tiin thu a'n cha a.
4. Nuhmei chun mi pahnihai chu a thuoi a, a thup a. Lal mi tirhai kuoma chun, "A ni ngei, an hung annawm, ana chu khaw laia inthoka hung am an nih ti ka hriet nawh.
5. Thimbut, khaw kul kotkhar an khar hun lai vel khan mihai chu an suok nawk a, khaw tieng am an pan ti ka hriet naw a, hnot vat inla chu in la hnot phak el thei" a ta.
6. Amiruokchu, anni chu in chungah a thuoi a, ziza kuong a buk khawmna hnuoia chun a thup a.
7. Jordan vadung kai chena hnot dinga a khaw mihai an suok charin kul kotkhar chu an khar a.
8. Enthlatuhai chu an zal hmain in chunga chun an kuomah a hang fe a.
9. Chuong mihai kuoma chun, "Hi ram hi LALPAN a pek ta cheu ti ka hriet a, nangni tinain a mi man tawl a, hi rama chenghai hi nangni tiin kan intui zop el a nih.
10. Aigupta rama inthoka in hung suoka in ta dinga LALPAN Tuipui Sen a sukkangpek dan cheu le Jordan suo tienga Amorhai lal pahnih, Sihon le Oga hai in sukbohmang dan hai kha kan lo hriet vong a.
11. In chanchin kan lo hrietin kan lungril a'n tui zop a, nangni leia lungril zam naw hrim hrim an um nawh: LALPA in Pathien chu chung tieng vana le hnuoi tieng leihnuoia Pathien a ni si a.
12. Chuleiin, in chunga lunginsietna ka'n entir cheu ang bok hin nangni khomin ka sungkuohai chungah lunginsietna inentir ve unla,
13. ka nu le ka pahai, ka tahai le ka zuorpuihai le an thil nei taphothai chu hla a, kan hringna hi mi humpek dingin LALPA hming salin lunginsiet takin ka kuomah inkham unla, inchikna chieng tak mi maksanpek ro" a ta.
14. Mihai chun a kuomah, "Kan thilthaw hi i hril suok naw phot chun in thi aiin thing kan ta, LALPAN ram hi a mi pek pha khom lunginsiet kan ti che a, i chungah ringum takin thawng kan tih" an ta.
15. Chuongchun, a in chu khawpui inhuonna kul chunga um a ni leiin, anni chu tukvera inthokin hruihruolin a thlak thla a.
16. An kuoma chun, "A hnottuhai cheu khan an hmu pal hlauh nawna ding cheuin tlang tieng pan unla, chu taka chun ni thum vel, an hung kir nawk hma po chu, inbi hmang unla, chu hnung chun in kir nawk ding a nih" tiin thu a'n cha a.
17. Mihai chun a kuomah, "Inkhama thu i mi'n tiemtir ringot hin chu mi khuop el thei naw nih.
18. Hi rama kan hung lut pha leh, i mi khai thlakna tukvera hin hi pat sen hi lo khai la, i nu le pahai, i tahai le zuorpuihai le i sungkuohai po po khom hi ina hin i lo thuoi lut vong ngai a tih.
19. Tu khom, hi ina inthoka tuola suok thisen maw chu kan chungah tla thei naw nih. Nang le hi ina i kuoma umhai laka ruok chu tu khomin kut an thlak chun a thisen maw chu keinin phur kan tih.
20. Chun, kan thilthaw hi i hril suok vai chun inkhama thu kan intiemnaa hin maw kan phur thei bok nawh" an ta.
21. Ama chun, "In thu ang peiin ni raw se" a ta. Chuongchun, anni chu a'n fetir a, an suok a, tukvera chun puon sen chu a khit de a.
22. Anni chu an fe a, tlang chu an va tlung a, chu taka chun ni thum sung, anni hnottuhai an kir nawk hma po chu, an inbi a; anni hnottuhai chun lampui intluonin an zong an zong a, sienkhom an hmu zo si nawh.
23. Chu zoah mi pahnihai chu tlanga inthok chun an kir thla a, Jordan vadung an kan a, Nuna naupa Josua kuom an tlung a, an chunga thil tlung po po chu an hril vong a.
24. Josua kuoma chun, "LALPAN ram chu ei kutah a lo pek takzet el; eini leiin a ram mipuihai chu thlabarin an intui zop el a nih" an ta.
←  Joshua (2/24)  →