| ← Joshua (18/24) → |
| 1. | Israel thlahai po po chu an rengin Silo khuoah an intuokkhawm a, chu taka chun Intuokna Puon in an zar a. |
| 2. | A ram chu an thu hnuoiah um ta sienkhom Israel thlahai laia hnam sarihai chun an chanpuol an la chang hri nawh. |
| 3. | Josua chun Israelhai kuomah, "LALPA in pi le puhai Pathienin a pek ta cheu ram hi ieng chen am hluo loin in la nghak ding a na? |
| 4. | Hnam tina mi pathum seng hung thlang suok unla, a ram va fang vel dingin tir suok ka ta, an ram hluo ding seng chanchin hung ziek an ta, chu zoah ka kuomah hung kir nawk an tih. |
| 5. | A ram chu hmun sariah the phot in ta, Juda thlahai chu sim tienga an chanpuolah um an ta, Josefa sungkuohai chu hmar tienga an chanpuolah um an tih. |
| 6. | Ram chu hmun sariah the unla, chu chu ziekin mi hung pe unla, hi taka hin LALPA ei Pathien hmaah thum lo vawrpek ka ti cheu. |
| 7. | Levihai ruok chun nangni lai chan an nei ve naw a, LALPA thiempu nina sin hi an chanpuol a nih. Chun, Gad thlahai, Reuben thlahai le Manase hnam zatve hai ruok chu Jordan ral sak tieng LALPA siehlaw Mosien an chanpuol seng a lo pek ta kha" a ta. |
| 8. | Ram entu le a um dan ziek thlatu dinghai an inthok suok lai chun Josuan, "Fe unla, ram chu va en chieng unla, a um dan ziek thlain ka kuomah hung kir nawk unla, Silo hmuna hin LALPA hmaah thum lo vawrpek ka ti cheu" tiin thu a'n cha a. |
| 9. | Mihai chu an fe a, ram chu an va fang a, hmun sariah an the a, lekhabuah a khuo po po chu an ziek thlak a, an riebuk Silo-ah chun an hung kir nawk a. |
| 10. | Silo-a chun Josuan LALPA hmaah thum a lo vawrpek a, chu taka chun an hnam inthe dan ang peiin ram chu a sem a. |
| 11. | An sungkuo zir ang peia ram sem dinga thum an vawr chu Benjamin thlahai chungah a tla hmasa tak a, an ramri chin chu Juda thlahai le Josefa thlahai inkar a nih. |
| 12. | Hmar tieng panga an ramri chu Jordan vadungah a'n tan a, ramri chu Jeriko sir hmar tieng a fe tung a, chu taka inthok chun thlang tieng panin tlang ramah a fe tung pei a, ramri tawpna chu Bet-aven thlaler a nih. |
| 13. | Chu taka inthok chun Luz (Bethel) sim tieng pangperah a fe a, chu taka inthok chun Bet Horon tlang chuonhnuoia um Atarot Adar tlangah a fe thlak a. |
| 14. | Bet Horon sim tieng tlang bula inthokin thlang tieng pangah sim tieng panin a fe kuol a, Juda thlahai khawpui Kiriat-Baal (Kiriat-jearim) ah a tawp a, chu chu thlang tienga an ramri chu a nih. |
| 15. | Sim tieng ramri chu Kiriat Jearim thlang tieng kotsuoa inthokin a'n tan a, Neftoa tuikhurah a hung suok a. |
| 16. | Ramri chu Refaim Ruom hmar tieng, Ben Hinom ruom ep tlang thuta chun a liem thla a, Jebuhai khawpui sim tieng pangper zuiin Hinom ruomah a fe thlak a, En Rogel a zu sun a. |
| 17. | Chu taka inthok chun hmar tieng a kawi a, En Semes tieng a fe a, Adumim Kawn epa um Gelilot chen a tlung a, chu taka inthok chun Reuben naupa Bohan Lungphun a zuk sun a. |
| 18. | Bet Araba hmar tieng pangper zuiin Araba-ah a fe thlak a. |
| 19. | Chu taka inthok chun Bet Hogla hmar tieng pangper a zui thlak a, sim tienga Jordan vadung suo, Tuipui Thi hmar tieng litengsawlah a tawp a. Hi hi sim tieng ramri chu a nih. |
| 20. | Sak tieng panga ramri chu Jordan vadung a nih.Chuonghai chu an sungkuo zir ang peia Benjamin thlahai chanpuol kil tina huoltu ramri chu a nih. |
| 21. | Benjamin thlahaiin an sungkuo zir ang peia khuo an hluohai chu Jeriko, Bet-holga, Emek-keziz, |
| 22. | Bet-Araba, Zemaraim, Bethel; |
| 23. | Avim, Para, Ofra, |
| 24. | Kefar-Amoni, Ofni le Geba, khaw sawmpahni le an khawperhai; |
| 25. | Gibeon, Rama le Berot, |
| 26. | Mizpa, Kefira le Moza, |
| 27. | Rekem, Irpel le Tarala, |
| 28. | Zela, Haelep le Jebuhai khawpui (Jerusalem), Gibea le Kiriat, khawpui sawmpali le an khawperhai an nih.Chuonghai chu Benjamin sungkuo ta dinga rochan chu a nih. |
| ← Joshua (18/24) → |