←  Joshua (17/24)  →
1. Manase thlahai chanpuol chu hieng hi a nih. Manase chu Josefa nau lutir a na, Manase nau lutir chu Makir a na, Gilead mihai thlatu bul a nih. Makir chu mi ral hrat a ni leiin Gilead le Basan ram a nei a.
2. A chanpuol chu Manase thlahaiin an insem a, chuonghai chu Abiezer, Helek, Asriel, Sekem, Hefer le Semida hai an nih. Anni hi Josefa naupa Manase thla pasalhai chu an nih.
3. Manase naupa chu Makir, Makir naupa chu Gilead, Gilead naupa chu Hefer an nih. Hefer naupa Zelofehad chun nau nuhmei ngot a nei a, chuonghai chu Mahla, Noa, Hogla, Milka le Tirza an nih.
4. Anni chu thiempu Eleazar le Nuna naupa Josua le hotuhai kuoma chun an fe a, "Kan unauhai lai rochan mi pe ve dingin LALPA chun Mosie thu a pek a nih" an ta. Chuongchun, LALPA thupek angin Josua chun anni chu an pa unauhai lai chun chanpuol a pek ve ta a.
5. Jordan rala mi Gilead le Basan ram baka Manase thlahai chan chu biel sawm a nih;
6. pasal ang boka an naunuhaiin chanpuol an nei ve leiin Gilead ram chu Manase thla danghai chun an chang tah a nih.
7. Manase thlahai ramri chu Aserhai ramria inthoka Mikmetha le Sekem sak tieng inkar a nih. Chu zoah Entapua chenghai huom sa dingin sim tieng a fe a.
8. Tapua sevela ram chu Manase thlahaiin an chang a, ramria um Tapua khawpui ruok chu Efraim thlahai ta a nih.
9. Ramri chu Kana vadungteah a fe thlak a. Vadungte sim tienga khuohai chu Manase rama um ni sienkhom Efraim thlahaiin an chang a. Manase-hai ramri chu vadungte hmar tieng fein Mediterranean Tuipuiah a suok a.
10. Sim tieng Efraim-hai an um a, hmar tieng Manase-hai an um a, thlang tienga an ramri chu tuifinriet a nih. Aser hnamhai chu hmar thlangah an um a, Isakar hnamhai chu hmar sak tieng an um bok a.
11. Isakar le Aser ram hluo sunga um Bet Shan le Ibleam le an sevela khuohai le Dor, Endor, Tanak, Megido le an se vela khuohai chu Manase thlahaiin an chang a.
12. Nisienlakhom, Kanan mihai chun um lui an tum tlat leiin Manase thlahai chun chuong khawpuia umhai chu an hnot suok thei naw a.
13. Israel thlahai an hung hrat hnung ruok chun anni rawi chu sinthawa sor dingin an inumtir a, an hnot suok fai vong ta nawh.
14. Chun, Josefa thlahai chun Josua kuomah, "Keini hnam hi LALPAN nasa takin mal a mi sawm a, kan tam tak em em vei leh, ieng tiziea rochung ding chanpuol khat le hmun khat chauh i mi ruotpek bik am a na?" an ta.
15. Josua chun an kuomah, "Chuonga in tam a, Efraim tlang ram hi in ta dinga an chep taluo a ni chun Periz-hai le Refaim-hai ram ngaw dam khi umna dingin hang thiek ro chu" a ta.
16. Josefa thlahai chun, "Tlang ram hi a'n chep taluo deu a nih, phaia Kanan mi chenghai hlak chun thir tawlailir an nei a, Beth-sean khawpuia umhai le Jezreel phai ruom le a sevel khuohai chun thir tawlailir an nei fur bik a nih" an ta.
17. Josua chun Josefa sungkuo, Manase le Efraim thlahai kuoma chun, "In tam hle a, hrat khom in hrat bok a, chan khat ringot chu nei naw ti niu.
18. Tlangram khi in ta ding ning a ta, ram ngawpui khom ni sien thiek unla, in thiek phak chin chin chu in ta ning a tih. Kanan mihai chun thir tawlailir neiin hrat hle hai sienkhom, in la hnot suok vong ding annawm" a ta.
←  Joshua (17/24)  →